Resúmen di Siman (22)


1. Shofùr di konvoi  ta kana pasa dilanti tur hende sin sikiera gruña un bon tardi. Pa su di malu Yves ‘The punisher’ Cooper ta drenta komo promé pasahero. E shofùr a keda para den e entrada i ta bisa Yves ‘para einan’. Yves ta keda trankil i kontest’é: ‘unda bo ta kere mi por bai tan ten bo ta para den e entrada ?’.

Esaki ta un motibu mas pa kiko mester introdusi e ‘vibmandje’ mas lihé posibel. Si e shofùr di konvoi lo tabatin su ‘vibmandje’ e diálogo lo a kana di e manera akí:

Shofùr di konvoi: Papi bondia.. bo por warda mi un minüt ya mi konvoi por KENTA promé bo KORE aden ?

Yves Cooper: Sigur no mami… kent’é pa nos bai !

Fin.

2. Agente polisial su aparensia (barba) ta keda kuestioná. Ta lansa krítika den direkshon di mando polisial puntrando si no tin regla i mas leu ta premirá ku aki poko dia ‘ta ku maton i dread bo ta mira nan’. E agente polisial a tuma nota di kiko ta pasando i a saka un komunikado ofisial bisando:

‘Yves bonochi i bon siman. Bisa e hendenan si nan tin kos di reklama of komenta, hasie open i no skonde tras di bo inbox. loke ta molestia mi mas ta ku e kobarde ei a kita e potret ei for di riba mi wall. Si akaso nan ke wak of hole mi barba aserka mi libramente’.

Pa no laga e oportunidad aki bai perdí Fundashon Bon Holó ta organisá djasabra dia 30 di mei un grandioso Ban Topa.  Aparte di holementu di barba lo bai tin otro atrakshon manera:

•         Mr. Block
•         Suiker Spin
•         Bouncer
•         Kushina di Oompie Stroopie

Bini unu bini tur.

3. Lio Plantijn di Sitek ta denunsiá ku diferente kabes di skol a instruí maestronan pa hasi sèks solamente si segun kálkulo e yu lo nase den fakansi grandi. E ta sigui bisa ku kabesnan di skol ya  a bini ku un plan pa kontrolá esaki. Maestronan lo keda someté na un detektor di mentira kada dieskuater dia.

Ademas lo forma dos tim ku lo tin na nan enkargo pa patruyá tantu e parti pariba komo esun pabou di Kòrsou.  E dos timnan aki lo drenta rapidamente den akshon na momentu ku detektá un aktividat ilegal di ‘stokjes gooien’.

Nos ta keda pendiente pa e paso nan ku Sitek lo bai tuma.

4. Ministerio Públiko entrante promé di augùstùs awor lo kuminsá tuma tur propiedat prosedente di aktonan ilegal den beslag. Ta trata aki di por ehèmpel kas, outo, boto, seadoo, quad, djente di oro, kortina i kabei falsu.

Segun Norma(n) Serphos, na momentu ku O.M presentá na un adrès lo duna e supuesto doño di loke a bin pa pone den beslag un chèns pa entregá esaki di un forma boluntario.

Si no e no duna oido na esaki lo persiguié penalmente. Tur loke tuma den beslag lo pasa pa findishi riba un término hopi kòrtiku.

Esaki sigur lo ta un sla duru pa Fuikdag 2016.

5. Ta un sekreto públiko ku hopi hende ta iritá nan mes na mal kustumber di nan kolega. Riba e lista largu tokante esaki tin entre otro:

•         Kobamentu den nanishi
•         Mal aliento
•         Papiamentu duru
•         Kòrtamentu di orea
•         Yoramentu di bashí
•         Slùrpmentu

E último aki ta unu sigur di atenshon. For di un fuente digno di konfiansa nos a bin komprondé ku e akto di slùrpmentu akí por tendé  for di 10 meter di distansia. Esaki ta kousa un nivel di iritashon haltu serka esnan den serkania.

Nos ta supliká tur bebedó di te, kòfi òf sòp’i yuana na trabou, pa tene kuenta ku e asuntu aki. Si e bibida ta muchu kayente, lag’é fria of trah’é ku awa ku ta di tal temperatura ku e slùrpmentu no ta nesesario.

E bon Yu di Korsou no ta slùrp. E ta bebe su sopi di brek na kas pa evita di stroba su koleganan di konsentra.

6. E programa Desirees Gourmet tabata tópiko di interes den e siman ku a pasa. Durante di esaki a surgi un esena kaminda a selebrá fiesta di Spiritu Santu. Te kaminda ku nos ta na altura ta trata aki di un tradishon Katóliko. Tèstament Nobo ta bisa esaki:

Echonan 2:1-21:

PENTEKÒSTER
Binida di Spiritu Santu

Ora fiesta di Pentekòster a yega, tur e siguidónan di Hesus tabata huntu na e mesun lugá. Diripiente un zonido manera un bientu fuerte a bini for di shelu i yena henter e kas kaminda nan tabata. Algu manera kandela a aparesé: el a parti su mes na lenga ku a bai para riba kada un. Nan tur a keda yená ku Spiritu Santu i a kuminsá papia na otro lenga, segun Spiritu Santu tabata inspirá nan.

Kada hende mester disidí pa nan mes si esaki tin un balor agregá den nan bida. Un kos si ta sigur:

E kurpa estilo ‘loader’ ku Tan Cleta ta karga tin mester di intervenshon pa medio Tata Yu i di Spiritu Santu

Amèn.

7. Entretantu gran parti di e resultadonan pa CITO toets ta konosí. Feesbuk ta pestá ku mayornan indikando ku nan yu a slag pa HaaVoow. Naturalmente bo mag di ta orguyoso di e logro aki pero manera hóbennan popularmente sa bisa ‘calm des fucks down’.

Tin muchanan ku a slag pa VSBO ku ta sinti nan mes malu na momentu ku konfrontá nan ku tipo di selebrashon nan eksagerá asina.

Dus maske:

•         El a slag pa Haavoow
•         Su amiganan yama Sophia i Astrid
•         Su ‘kòzen’ ta biba na L.A
•         E ta baila balèt, hunga tènes i traha cupcake na Seru Boca Estate

Por fabor hasi normal.

8. Awe nos ta ser’é bunita ku e wega di Charlie ku e dia nan aki a lanta kabes formalmente prinsipalmente bou di muchanan. Ya pa basta generashon e hunga e wega aki. E úniko kos ku bo tin mester ta dos pèn i un pida papel. Tin hende ku no a eksperensiá nada sobrenatural i otro ku a mira spoki. En todo kaso Charlie ta eksperto den kontestá pregunta i p’esei mes…

Mi tin gana di sa:

•         Ki dia un restorant Mac Donalds ta habri na Bonaire
•         Ken ta gana elekshon otro aña
•         I si Charlie ke bira direktor di e hòspital nobo

Pa bo mira. Ta un djis nos ta drenta e di dos mitar di aña. Kiko bo ke logra promé ku 2016 bati na bo porta? Of bo ta preferá di keda drumi laga e koriente yaya bo manera kabaron ?

En fin. Wikènt ta den kurpa i no a resta mi nada mas pa bisa bo ku maske:
Armand Hellement jr. a susha un sofa den sentro komersial Sambil, Yves Cooper ta kere ku Kòrsou lo kai den un abismo i ainda e wanta-lodonan kumi a bestèl 3 luna pasa no a yega

Ta’ki mi ta BEBA

Aki ta sigui un reseta pa Bolo Muda:

Ingredientenan:

4 kùp di hariña di pan 3 telep di baking powder ½ telep di salu 2 paki manteka dushi 2¼ kùp di suku 10 webu 1 kuchara di vaniya 1 kuchara di almendra ½ kilo di dadel 1 kilo di prùimu ½ kilo di rasenchi 1 kuchara di vaniya 1 telep di kané na puiru suku na smaak 1 bòter di cherry cordial

Preparashon:

Mula dadel, prùimu i rasenchi. Pone nan kushiná ku un tiki awa, suku, vaniya i kané. Ora e mara, paga stof i agregá e cherry cordial. Por laga esaki para 24 te 48 ora. Bolo : Hunta bo forma ku res i sende fòrnu. Krema manteka ku suku. Agregá e webunan un pa un, mex bon despues di kada webu. Despues bo ta agregá e esensianan. E salu , baking powder i hariña di pan ta sigi.

Awor bo ta agregá e meskla di prùimu, dadel i rasenchi. Bati djis un ratu i bo bolo muda ta kla pa basha den bo forma i bai fòrnu.
Ora bo bolo ta kla, sak’é for di fòrnu i basha poko cherry cordial ariba i lag’é fria. Fornu 350º — Tempu /-60

Advertenties

One thought on “Resúmen di Siman (22)”

  1. Mane semper Oompie Stroopie su Resumen di Siman ta ON Point! Mi tampoko no por ku e mayornan ‘aanstellerig’ aki! Ora e mucha keda sinta na HAAVOO, nan lo pone riba Facebook? ‪#‎Bromadomalu‬ ‪#‎hasigewoon‬ whahahaha

    Like

Geef een reactie

Vul je gegevens in of klik op een icoon om in te loggen.

WordPress.com logo

Je reageert onder je WordPress.com account. Log uit / Bijwerken )

Twitter-afbeelding

Je reageert onder je Twitter account. Log uit / Bijwerken )

Facebook foto

Je reageert onder je Facebook account. Log uit / Bijwerken )

Google+ photo

Je reageert onder je Google+ account. Log uit / Bijwerken )

Verbinden met %s