Ki dia Kòrsou lo bira asina?


Komo un mucha ku a lanta den Kanga di añanan 80 nunka mi a pensa di resultá den eksterior. Mi a lanta den un bario kaminda ladronisia, droga i krímen tabata dominá e bida di tur dia. Fakansi den eksterior a pone mi realisá ku mi por hasi mi mundu kon grandi òf chikí ku mi kièr. Mi a skohe pa grandi i awor mi ta hasi 5 aña biba na Singapore. Kada bes ku mi bishita Kòrsou mi konosínan ta puntra mi pa konta nan mi eksperensianan bibando den e siudat di mas karu di mundu, ku ta konosí pa su efisiensia, su limpiesa, su leinan super estrikto y ku ta sirbi komo ehèmpel pa hopi otro pais. Ora ku mi konta nan, mayoria bes nos kombersashon ta terminá ku e pregunta “Ki dia Kòrsou lo bira asina?”

Singapore Skyline. Source: Flickr.com

Aunke mi tabata determiná pa amplia mi mundu, tòg mi no tabata sa kiko pa spera di Singapore promé ku mi a yega aki. Un di e promé eksperensianan ku a sorprendé mi positivamente tabata e efisiensia di e pais. Por ehèmpel mi a solisitá online pa trabou riba un djabièrnè, su siguiente djaluna mainta e kompania a bèl mi pa areglá mi promé entrevista ku tabata djamars mainta. Atardi nan a yama mi y bisa mi ku mi a pasa pa e siguiente ròndu ku tabata 2 entrevista riba djaweps di e mesun siman. Den e siguiente dos simannan mi a pasa den 1 tèst sikológiko, 4 entrevista mas, nan a screen mi y nos a negosiá e salario. Na final di e di tres siman mi a firma un kontrakt pa tempu indefiní. Kuater dia despues mi mester a pasa tuma mi pèrmit di empleo. Esaki ta mara na bo pèrmit di estadia. Ku otro palabra un estranhero sin trabou no por keda biba aki.

Tur loke mi a lesa di e pais a resultá bèrdat. Tur kaminda ta limpi limpi, desempleo i krímen kasi no ta eksistí, tin Mall plama riba e isla mané tin toko na Kòrsou, e hendenan ta sumamente disipliná, supermerkado ta habrí 24 ora pa dia, “shopping” ta e hòbi number 1 di e singapureño i Mac Donalds ta entrega bo happy meal na kas si bo kièr 365 dia pa aña.

Na fin di mi promé luna mi tabata konvensí ku maske mi ta leu for di mi famia T’aki mi kier BEBA!

E pais ta asina safe ku ta fásil lubidá ku sobrá di mundu no ta asina ki. Unda otro na mundu bo por blòkia un mesa den plasa dor di pone bo iphone riba mesa promé bo para den rei i pidi bo kuminda? Niun hende no ta tribi di mishi kuné paso nan sa ku e leinan kontra ladronisia ta pika. Un estranhero lo wòrdu deportá asina ku e kaba di sinta su kastigu. Individualmente e leinan di Singapore ta hopi pisa i asta bo por bisa eksagerá, pero mi ta kere ku konhuntamente nan ta yuda mantené e nivel di bida haltu. Ademas ora bo tin un komunidat ku ta konsistí di hende fo’i tur skina di mundu ku nan mes definishon di loke por y loke no por, ta leinan estrikto so ta yuda mantené òrdu. E pais su leinan ta konosí i miéntras komo estranhero bo biba segun regla, bo no tin nodi di preokupá ku nada.

E kontraste ku mi Dushi Kòrsou no por ta mas grandi.

Diferente investigashon mundial a konkluí ku Singapore ta e lugá ku e kosto di bida di mas altu na mundu. Meskos ku Kòrsou, mayoria produkto ta importá y esaki ta resultá den un preis altu. Un bòter di Heineken ta fásilmente 13 pa 16 dollar dependé e bar ku bo kumpr’é. Bibienda ta masha karu mes i tur outo ta mara na un plachi number pa 10 aña. Un plachi number ta kosta 75 mil dollar pa 10 aña. Despues di e periodo aki e outo mester bai sloperij of e doño tin ku bolbe paga 75 mil pa e próksimo 10 aña. Konsekuentemente no tin outo bieu riba kaya.

Tambe estudionan a konstatá ku e nashon por wòrdu konsiderá komo esun ménos emoshonal na mundu. Basa riba e añanan ku mi tin trahando ku asiátikonan mi no lo kategorisá nan komo ménos emoshonal. Den mi bista nan tin bastante emoshon pero si nan ta hopi konservativo pa ekspresá emoshon. Kaminda e Yu di Kòrsou ta kombersá na bos haltu, hari duru den públiko, halsa bos di frustrashon i tin biaha asta manda un grandi, e singapureñonan ta skohe pa no mustra e parti aki di nan.

Aki nan lo sigui wak mi straño ora mi grita hari mané un bon Yu di Kòrsou!

Advertenties