Devaluá e diploma


Tabata un djaweps atardi, mi a kaba ku mi tareanan di skol pero mi a keda skondí den mi kamber warda ora pasa. Via bentana mi tabata wak si mi mama su auto ta den kura ahinda. E auto den kura ta indika ku e a lubida riba “ouderavond”. Mi puntonan di skol no tabata di kanta makamba, pero mi no tabata esun mas mal para den klas tampoko. Mi preokupashon tabata ku mi no sa kiko mi dosentenan lo konta mi mama tokante mi komportashon. Asina 7ór a bati mi a sali for di kamber y bisa mi mama “Atá Mama, nos a lubiba riba “ouderavond” awe y awor ya ta lat!”. Riba un trankil mi mama a kontestá “Mi no a lubida, mi a manda tata e biaha aki”. Ta poko bes den mi bida mi a pidi tera habri y tumami.

Mi tata tabata un autoridad den kas. Un homber di tiki chansa, tiki palabra pero ku un amor profundo pa kada un di nos den kas. Un tipo ku si e wakbo so ya bo ta kuminsa kana stret y legumai pensa malu pa tres dia. Mi ta tin e opshon di sinta warda mi tata regresá o drenta mi kamber y subi mi kama mitar di ocho. E eskoho no tabata difísil.

Ta baha a bahami for di kama pa mi tende lokual dosentenan a splika mi tata. Aparentemente mi tabata tin tur e potensial di ta e mihó alumno den klas, pero mi tabata pasa mi tempu na skol hasiendo payaso y bentando mi talento afo. Al final mi mayornan a ponemi priminti ku mi lo buska otro amigunan pafó di mi klas, kuminsa sinta te dilanti den klas y tambe pone muchu mas atenshon den sierto vak. Mi a kambia mi komportashon kompletu y te asta bira esun ku ta yuda yùfrou kontrola ken a spik dor di skirbi nan nomber na final di mi prufwèrk. Mi amigunan nobo te dia di awe ta mi mihó amigunan y na final di e aña eskolar mi tabata e uniko mucha homber den klas ku a pasa pa VWO.

Mi ta ken mi ta awe pa motibu di loke a sosode e djaweps atardi ey.

Un sita entre maestro y mayor por nifiká masha hopi mes pa futuro di un mucha. Esey ta e motibu ku aki na Singapore tur mayor mester bai skol personalmente pa tuma rapòrt di nan yu. Mi sorpresa tabata grandi ora ku e prome rapòrt di mi yu a resultá unu di 10 paginá. Mi a pensa ku algu mester ta hopi robes ku un mucha di dos aña si bo mester di 10 pagina pa deskirbí. No tabata asina. Ta e detayenan kompaña pa potretnan komo prueba di su desaroyo a pone e rapòrt bira diki asina. Ora ku mi a puntra dikon tantu detaye asina a resulta ku esaki ta normal y lo bira aun mas detayá e próksimo dos añanan. Tambe e yùfrou a kordami ku mi mester kuminsa traha riba mi yu su portafolio paso mi lo tin ku presentá esaki ora ku apliká pa skol básiko.

Which country does best at reading, maths and science?
Which country does best at reading, maths and science?

Singapore ta rekonosé mundialmente pa su systema di edukashon. Ta un reputashon ku e pais ta traha duru pa mantene. Regularmente studiantenan lokal ta gana kompetensia mundial di matemátika y sensia. E systema di skol ta asina ku e singapureño ta haña preferensia, sigui pa esnan ku tin pèrmit pa residensia permanentemente aki y despues pa yu di e estranhero. E kompetensia ta grandi. E mihó skolnan lokal tur aña di nobo tin ku ninga un kantidad grandi di mucha. Pa e motibu aki e skolnan tin permit pa selekta e mihó muchanan komo nan alumno husando e rapòrtnan di Kleuterschool y un karta di motivashon skirbí pa e mayornan. Un fenómeno remarkabel ta ku muchanan ku ta biba dentro di 1 kilometer for di skol tambe ta hanja preferensia. Esaki ta pone ku mayornan ta dispuesto pa henter famia muda pa biba serka di skol.

Den un pais ku tin méritokrasia na pechu un mucha ta siña foi chiki ku ta su sifranan ta konta y no su fam, posishon di su mayornan ni madrina o padrino. Sin duda Singapore su model di enseñansa ta unu hopi kompetitivo y tur mucha sa ku nan tin ku hasi lo máksimo. Mi tin kolega ku a wòrdu yamá dor di skol paso su yu a skor 8.5 riba dos prufwèrk tras di otro. Tur dos bes e sifra a resultá esun di mas abou den klas. Skol a puntra si e mayornan a konsidera inskribí e yu pa bijles despues di skol. Ahinda mi lo tin ku topa e alumno ku no ta bai bijles. Ademas e sistema ta duna fruta paso tur aña Singapore ta resulta un di e paisnan ku ta manda relativamente hopi mucha bai studia na universidadnan renombrá rònt mundu kla pa kompetí ku e mihónan di mundu.

Ami ta kere ku enseñansa pa kada mucha mester ta un plaser, algu eksitante, desafiante y tin ku sosodé den un ambiente interaktivo y stimulante. Suavisando e nivel rekerí pa pasa èksamen sigur no ta kontribuí na un mihó futuro di nos muchanan ni pais.

Si e mucha na Kòrsou tin problema ku e hulandes na skol, ta keda na e adultonan pa invertí, plania, ehekutá y revisá e sistema di edukashon. Muchanan mester wòrdu enkurashá pa realisa lo maximo di nan potensial. Devaluá e diploma ta e prome paso pa frakaso.

E solushon ta pa kuminsa duna hopi mas guia na e alumno y tambe invulkrá e mayornan. Skol apsolutamente no por bira un luga kaminda bo ta baha bo yu y sigui sin bira wak patras

Advertenties

Auteur: Endilo Lourens

Un Yu di Kòrsou biba na Singapore ku for di e punto di bista personal lo kompara e situashon di Singapore ku esun di Korsou indikando di un manera positivo e lesnan ku Korsou por siña y ehekutá pa drecha e kalidat di bida di Dushi Kòrsou.

7 thoughts on “Devaluá e diploma”

  1. Hopi bon mes!! Ami ta kontribuí na mi nieta su edukashon door di inverti hopi tempu na su edukashon. Tantu na tarea di skol komo komportashon di tur dia. Prome kos kumi a siñe ta respet.

    Liked by 1 persoon

    1. Asina mester ta Jackie. Tur dia un tiki ta para bira hopi un dia. Riba un dia e nieta lo wak bèk y lo ta gradesido! Sigui ku e bon trabou !

      Like

      1. Bonochi Endilo…ami ta un maestra di skol basiko aki na Korsou..ku semper tbt tin gana di bai Singapore pa wak skol i kon ta duna les eynan. Bo ta kere ku tin un manera pa mi forma un grupo di kolega i nos por tuma kontakto ku un skol i nos lo por bin Singapore pa enterkambia of manera in studiereis? Giana Anasagasti…gigigasti@live.com

        Like

  2. Oh master pa lesa e kos aki !!! E ta keda un esfuerso enorme pa hasi un diferensha den un luga/pais kaminda tur hende no ta wak den mesun direkshon. Maar nos ta keda hasi e loke ku SI ta den nos mes man!

    Liked by 1 persoon

  3. top. masterlijk! Ma rekonose mi tata den bo verhaal. great pa lesa kon e kosnan ta na Singapore. Sigur interesant Endilo. Mi ta volg bo!

    Like

  4. Sr. Lourens bo artíkulo ta great. Mi ta share pa habri majornan su wowo.

    Ta masha importante pa majornan ta dedika na ensenjansa di junan. Ku majornan ta motiva e junan pa kies pa execelencia. Awendia tin hende ta bisa no kansa e muchanan y pone nan onder druk….maar goed nan asuntu. Pero aki ratu nan mes ta lamenta.

    Like

Geef een reactie

Vul je gegevens in of klik op een icoon om in te loggen.

WordPress.com logo

Je reageert onder je WordPress.com account. Log uit / Bijwerken )

Twitter-afbeelding

Je reageert onder je Twitter account. Log uit / Bijwerken )

Facebook foto

Je reageert onder je Facebook account. Log uit / Bijwerken )

Google+ photo

Je reageert onder je Google+ account. Log uit / Bijwerken )

Verbinden met %s