Resúmen di siman (28)


1. Pelea entre dos hòmber den Otrobanda. Un diskushon ku kuminsá den un Kasino a kulminá den un pelea formal. Dos bon samaritano ku a bai intervení entre e dos hòmbernan a kome un áwaseru di moketa komo agradesimentu. Un di nan a hasta risibí un nòkout fulminante.

Polis a presentá pa tuma nota di loke a sosodé i tambe mester a pidi presensia di ambulans pa atendé ku e heridonan. Boso a tuma nota di un detaye pekuliar ? Ta trata aki di un simpel pelea. Sin hinkamentu òf tiramentu i esaki sinseramente ta duna nos speransa. Naturalmente lo tabata mihó si e pelea por a keda evitá pero nos ta kontentu ku a bringa man na man.

Ta bon pa TeleCuraçao tuma nota di e suseso aki. E lo ta un bon atkisishon pa e spòt di É Bon Yu di Kòrsou. Por ehèmpel:

Hugo Lew Jen Tai (stèm):

É Bon Yu di Kòrsou no ta uza arma durante di un pelea. E ta tira moketa, kibra djente, blousa wowo i hincha lep. Despues e ta laba su man paso É Bon Yu di Kòrsou ta un persona higiéniko !

 (jingle)

2. Ta gara dos dama ta hòrta den un establesimentu. Esaki no ta nada nobo, pero e echo ku tabatin un baby envolví den e asuntu aki ta pone bo pensa mas aleu. Ta kon un mama por hinka den su kabes pa bai hòrta ku su yu. Ata bo awor kubo man robes di bui i den bo brasa drechi un yu kargá.

IMG_1638

Kisas e yu lo mester a sirbi komo un método pa kita atenshon di e trahadónan. Òf no tabatin ningun hende pa tira bista riba dje miéntras ku mama i kompinchi a bai ‘kue job’. Pa lei, ladronisia ta keda algu kastigabel den tur sirkunstansia. Komo hende si nos ta huzga diferente. Si bo hòrta kuminda, mester analisá e motibu ku a hiba bo na esaki. Paso laga nos ser sinsero ku otro. Tur dia di nobo tin hopi hende ku difikultat pa haña trabou i esaki por hinka nan den desesperashon.

Mirando nan yunan òf famia ta pasa den miseria nan ta opta pa kometé aktonan kontra di lei. En fin laga nos spera ku aparte di enkarselá e damanan aki tambe lo ofresé nan e guia nesesario pa esaki no bolbe sosodé.

3. Pelea na Aruba den Lucianitastraat. Dos tipo ku tabata hasiendo trabounan di konstrukshon na un kas dado momentu a pega formalmente ku otro i kuminsá bringa. Nos no sa si ta algu ku ta komun na Aruba, pero na final di e pelea e tipo nan aki a pasa man kue hèmber yen di fèrf i basha otro kuné. Nan a keda mes kos ku dos bogibogi di lechi grandi.

1

Pa bo mira ei. Ta tur kaminda tin kosnan pekuliar ta sosodé. Si nos tin algu en komun ku nos hermana isla Aruba anto esei ta nos sentido di humor. Di unda dos persona ku opviamente kier solushoná algu pa medio di agreshon físiko ta bini na e idea pa basha otro ku fèrf ?

Esaki mester ta un símbolo di afekshon pa otro. Kon a para e dos tiponan aki nos no sa. Ta di spera ku na final nan a sa di baña otro i sinta dal un beter na kualke snèk.

4. Doño di lokalidat den sentro komersial Sambil ta kita dama for di trabou ku resientemente a kuminsá traha. Ta di tantísimo biaha ku nos ta tende di tipo di kasonan manera esaki. E dama aki mester a atendé ku malesa di su yu despues ku su a kasa a pidié pa bini kas.

Segun e dama:

‘Segun e dia ta bai mi a mira ku mi yu su kurpa a sigui malu, ora mi a app e donjo bise ku awe tmpk lo mi no tin ku bai tra esaki tbt e kontesta sokete ku mi a hanja:

 Mira no me sirve asi .. por favor lleva el uniforme y busca a yony para que te pague los dias .. que trabajaste .. gracias’

 Tin hende ta komentá ku doñonan di pakus i otro tipo di lokalidat den Sambil ta preferá di skohe Latinonan pa traha i esei ta e motibu pa kita hendenan lokal purá for di trabou.

download

Di otro un banda bo por puntra bo mes si e dama aki a aktua korekto sigur si bo konsiderá e echo ku e la kaba di kuminsá traha. Loke tambe ta dudoso ta e ròl di e kasa den hinter e kos aki. Komo hòmber ta bo deber di yuda buska un solushon. Bo no por kai drumi bògòro sin wak un manera p’abo señora tòg por bai traha. No ta paso e ta mama ta nifiká ku e mester hiba tur e vra.

Di tur manera nos tin un mensahe pa doño di e lokalidat:

Cuando fuiste martillo no tuviste clemencia, ahora que eres yunque, ten paciencia.

GrOciOs

5. Interes haltu serka Anthony Bitorina i Shon Fia. Si tin un algu ku ta peligroso pa bida di hende anto esaki ta ser planbari. Un hende planbari por kometé basta lokura. Un di nan ta fia plaka na un interes inhumano. Paso no tin otro manera pa deskribié. Island Finance, Shon Fia, Anthony Bitorina i tur sobra ta un set di probechadó. Ku man habri nan ta sinta warda personanan den desesperashon paso nan no a keda kla serka famia, konosí, banko òf kas di brua.

Rumornan insistente ta indiká ku serka Anthony Bitorina e interes ta 300 porshento. Asina mes. Si bo fia 200 florin serka Anthony bo mester paga en total 600 florin den 10 luna. Tambe e lo ta laga su víktimanan firma standing order bashí pa na su antoho e subi e pago mensual manera e haña ta bon. Mi ta komprondé ku hasiendo negoshi bo mester saka ganashi, pero esaki si ta bai kontra di tur prinsipio, norma i balor, karakter, amor p’abo próhimo i derechi humano.

images

E úniko motibu ku tipo di hendenan asina aki por sigui kometé fechoria ta paso nos mes gusta. Nos gusta kas grandi, bai fakansi, bai kasino, karchi pa NSJF, karchi di VIP den fiesta, mesa ku bòter, mas bòter, hopi bòter, tur bòter. Tas di LV, Gucci, Prada, Coach, MK. Spoonz, Spaanz, Fòrki, Kuchú, Hacha… na tur mester hasi akto di presensia. Outo nobo, outo karu, hopi karu, pero drumi na kas di mama, den un kamber chikí, hopi chikí, pero bo tin outo nobo.

Mi ta bolbe ripití, ta nos mes gusta.

6. Pa selebrá su di 10 aña Insel Air ta lansa grupo di Karnaval Ata Insel. E servisio di Insel Air ta muchu mas mihó awendia i esei klaramente ta sòru pa kos nobo. Segun Insel Air despues di a sirbi, a yega ora pa disfrutá i tambe selebrá. E trahe kreativo ta karga e nòmber di ‘lokura di Insel’. Diseñadó di e trahe ta miembronan di e direktiva den koperashon ku Ludgene Balentien.

Di un banda ta nos ta haña fantástiko ku Insel Air kontinuamente ta aportá na nos Karnaval. Pabien, danki, chapeau. Awó ke tal si e mesun energia wòrdu hinka den e servisio diario na su klientenan ? Nos no ta papiando di e servisio unabes bo ta na bordo si no e trabuko promé ku esaki.

FullSizeRender

Retraso, mas retraso, hopi retraso i un kantidat enorme di retraso. Sigur e vuelonan entre Kòrsou, Boneiru i Aruba kada bes ta retrasá. Aki nan si ta masha poko bia bo por yega aeropuerto i bisa ‘Ata Insel’. En bes di esaki bo ta bisa ‘Kos pa Awe si Insel’.

Pero laga nos tene e kos aki positivo. Karnaval 2016 ta bai bira e aña di ‘Ata Insel’. Spera nan manera nos ta spera vuelo 7I 341 kasi tur siman. E ta bin lat si.. pero e ta bin BON !

7. No opstante un informashon inkorekto ZAJ Summer Fun ta sigui normal. Ta tristu pa konstatá ku kada bes ku un hende òf grupo bini ku algu positivo ta trata di kibr’e. Meskos ta e kaso di ZAJ Summer Fun.

Ta trata aki di un grupo di profeshonal ku entre 13 pa 17 di yüli próksimo ta organisá un siman yena ku aktividatnan dibertido i alabes edukativo pa muchanan entre 6 pa 12 aña.

Loke ta hasi e ‘vongkongsiplon’ aki otro for di tur otro ta e parti di seguridat. Tur partisipante lo wòrdu kubri pa un ongevallen verzekering dado kaso esaki bira nesesario. Nos tur sa kon fèrfelu nos yu(nan) ta. Hopi mayor ta mira ‘vongkongsiplon’ komo un salbashon. Ta un siman largu kaminda nan por hisa yu benta pa ‘tante’ i ‘tio’ sin mester tin ku drai wak patras.

Imaginá bu si aparte di esaki bo yu ta sigurá pa kualkier kos durante bo ousensia. Ta kiko mas bo por deseá ? awèl hasi lihé i inskribí e ‘kabes di playstation i ipad’ ei pa ZAJ Summer Fun !

Ai si. No tin moda di hasi. Nos tur sa ki dia awe ta. E siman ku a pasa tabata karga ku diferente suseso. Nos a skohe esnan ku na nos pareser ta bale la pena pa menshoná. Naturalmente esei no ta kubri tur kos. Aparte di loke bo a lesa tabatin entre otro pelea na un laman pariba kaminda tabatin 6 dama latino envolví, parlamento a bai ku reseso sin trata nubia skur riba kabes di Marvelyne Wiels i tarifa di bus lo oumentá ku 15 sèn.

En fin di tur manera mi tin ku sera i p’esei mi ke rekordá bo ku maske:

Sedreko a laga un desaster atras na Landhuis Hel, Gobièrnu ta bai laga studiantenan kore den bùs pa registrá kantidat di ‘kareda’ i kilometer i atrakadó ta bai ku un miserabel 85 florin for di Toko Lusitano…

T’aki mi ta BEBA