Resúmen di siman (32)


1. E diskushon tokante matrimonio entre e mesun sekso a bolbe lanta kabes na Kòrsou. Hopi ta esnan ku ta kere di por disidí kon un otro persona mester biba su bida. Ta uza tekstonan di beibel i otro argumento pa prueba ku homoseksualidat ta robes den bista di Dios. Tur esaki ta sosode den un afan pa por logra prohibishon di un lei ku lo permití “spada ku spada” i “konènchi ku konènchi” drenta den boto matrimonial.

Si bo mira kuantu tempu ta wòrdu hinka den e asuntu aki bo ta puntra bo mes si na Kòrsou nos no tin nada útil di hasi òf problemanan mas grandi pa dil kuné. Paso ta un lastramentu di Tana i Rep’i Pampuna tin  siendo ku:

  • Ainda nos no tin un ombudsman
  • Preis di gasolin ta mas instabil ku Insel Air su skema di vuelo
  • Na Bandabou ketu bai ta wardando riba un ambulans i truk di brantwer
  • Tur dia di nobo Isla ta bati habitantenan den besindario ku huma

Djis sigui. Sigui pone enfoke riba loke no ta nos asuntu lubidando tur kos ku si ta importante pa atende kune.

2. Un ladron ku a bai purba su suerte na Building Depot a hañ’e ku sorpresa grandi. Tin hende ta lanta mainta, gloria nan kurpa i bai traha. Pero tambe tin esnan ku tur dia di nobo ta sali kas ku mal intenshon. E biaha aki si kosnan a kana otro i esei ta danki na un bewaker femenino. Na momentu ku e tipo aki a nota ku e la wòrdu gará, e la disidi di saka un kareda kore limpi bai.

Un bewaker femenino atento no a perde pa gana i a kuminsa ku un persekushon ku speed di Churandy Martina. Den ratu kòrtiku ela logra benta e tipo aki na suela i boei e. E potrètnan ta papia pa nan mes.

Awor aparte di ladron bo ta bai den historia komo e tipo ku un bewaker femenino a domina estilo di lucha libre despues kubo a balote. Nos ta desea bo suerte ku bo fama nobo den prizòn.

3. Nos ta sigui ku mas ladron ku un IQ bou di 50. Si tin un aparato eletroniko ku ta popular anto esei ta e famoso ‘aaifoon’. No ta un sorpresa si nos bisabu ku tambe e ta un di e smartphone ku ladron tin mas interes den dje. Echo ta ku pa bo horta un di e aparatonan aki i keda sin wòrdu gará ta rekeri sierto grado di inteligensia. E tipo riba e potretnan aki sea a hòrta un ‘aaifoon’ òf e la kumpra unu hòrtá.

FullSizeRender

Bo ta mira klaramentu ku e hoben ehemplar aki tin diferente hobi i ku e ta gusta pasa tempu ku su revolver sakando selfie. Si akaso unu di boso konosé e suheto aki por fabor pidié pe bai entrega e ‘aaifoon’ na polis.

4. Un aña eskolar nobo a kuminsa ayera i kasi tur skol por a risibí nan alumnonan. Facebook tabatin difikultat pa prosesá tur e kantidat grandi di potrèt ku mayornan tabata post. Muchanan bunita bisti na unifòrm nobo, sapatu di marka i tablet den rugtas.

E último aki ta kousante di tristesa serka muchanan di ménos rekurso. Nan mester para mira kon otronan si ta presentá bon bistí tur na ‘kèps’ di marka ‘hèrmèks kaminda ku nan si tin sapatu kibrá na pia. Nos kier a rekordá mayornan lo siguiente. Bo yu ta bai skol pa siña i no pa broma. Ta tipo di hendenan asin’aki ta manda Kòrsou stret den krili su wela. Nan lo krese bira grandi pensando ku ta kosnan material so ta konta riba e mundu aki.

Back-to-School

Lástimamente tin bastante di nan ku ya kaba ta kana rònt i  bo por rekonosé nan entre otro dor:

  • Di e outonan luhoso ku nan ta kore pero tòg bibando na kas di nan mayornan
  • Ku tur fiesta nan ta na blanku bistí den VIP
  • Ku 6 biaha pa aña nan ta bai ku ‘vongkonsi’ pero tòg ta skonde pa DUO

En todo kaso. Danki pa laga nos mira ku boso yunan a kuminsá skol awe tur na paña i sapatu nobo. Éksito i si e keda sinta kòrda pone esei tambe riba Facebook. Besos.

5. Gobièrnu ta aprobá lei ku ta prohibí artistanan djafó presentá desèmber i temporada di karnaval kompletu. Asina mes. Fiesta a kaba i ta kùp a sobra pa piki. Entrante 1 di ougùstùs artíkulo 47 ta drenta na vigor. E lei aki ta prohibí un artista ku no ta residensia na Kòrsou pa presentá sin ku e tin un pèrmit pa hasi esaki.

amak

Konsekuensia di esaki ta ku festivalnan manera Sulegria ta kore peliger di keda anulá. Awor no a keda promotornan nada otro ku ta kontratá bandanan lokal. Den esaki nos no ta mira nada malu pero laga nos rekordá bo ku tin bastante agrupashon musikal lokal ku:

  • Mester saka e integrantenan for di chòlhous i baña nan promé ku nan por toka
  • Super Dynamic i Sonora Matancera ya tin integrantenan ku ta surdu òf morto
  • E kansion “splits bo jangadoow’ di Paul Welvaart no ta apto pa toka riba Pasku di nasementu

Nos kier a duna un sugerensha na promotornan:

En bes di fiesta laga nos kuminsá organisá Entiero. Hasi e zaal nan manera El tributo etc. bashí i laga e artista nan toka ei’den. Pone anunsio di morto den korant i invitá tur hende bin yora henter anochi.

A yega ora pa Feco Metusalem Gomez hala un banda i laga hóbennan manera Roderick Papa Volk fiha un direkshon nobo pa AMAK. Feco no ta kore nos ke kore kubo pero BO TIN KU BAI.

E siman aki nos ta kategoris’é komo unu hopi laf. Aparte di ku Ivar Asjes, siendo Batman kaba, a postulá su mes komo Robin (kandidato pa bira lider di Direktiva pa Pueblo Soberano) i alabes ta traha trabou di obispado i ke bai invita Papa pa bin bishita Kòrsou….no tabatin masha asuntu ku a meresé atenshon di nos Resúmen. Apesar di tur esaki nos a skibié ku sumo plaser i dedikashon.

Takimitabeba.com ta resultado di un nesesidat pa alegria i kritiká konstruktivo den un tempu ku gran parti di notisianan ta karga un tono negativo. Nos ta skibi pa bo hari, yora, pensa i wòrdu eduká.

Tur komienso tin nan final pero promé ku nos laga lastra nos kier rekordá bo ku maske:

2 bòter di awa na Kura Hulanda ta kosta 23 florin, aya na Aruba un hóben a kome basta wanta despues di a joyride outo di su señora madre kousando aksidente i na Boneiru plattegrond di e prizòn den konstrukshon a keda hasi públiko…

T’aki mi ta BEBA

E reseta aki nos ta dedik’é na tur miembro di partido Pueblo Soberano. Uze komo inspirashon pa skohe un lider nobo pa direktiva di boso partido. Suerte.

Pòrchòp den sous di Pineapple

Ingredientenan:

4 pida pòrchòp 1 òns di spèki na pida 1 bleki di pineapple crushed 1 bleki di pineapple chunks 1 siboyo, 1 promentòn 2 wòrtel, 1 lamunchi 1 paki di rasenchi chikitu 3 djente di konofló 1 kuchara di kome kuné di siboyo na puiru 1 kuchara di kome kuné di ketjap zoet 1 theelepel di binager destilá Algun klabu dushi Algun blachi di orégano

Preparashon:

Primeramente nos ta laba e pòrchòp bon ku su salu i lamunchi i ora ta kla ta pone e konofló, siboyo na puiru, orégano, e klabunan i e djus di e pineapple chunks riba e pòrchòpnan. Ta brua esakinan bon den otro i ta laga e tempero aki para pa mas o ménos mei ora.

Despues ta saka e pòrchòpnan i hasa nan den masha nada di manteka i ta kòrta e spèkinan na pida pida i pone aserka. Na momento ku e pòrchòp i e spèki a kushiná bon, ta kòrta e wòrtelnan sea na largu òf rondó i ta pone nan tambe huntu ku e djus di e crushed pineapple den e wea. Ora ku e wòrtelnan bira poko moli ta agregá e siboyo, promentòn, rasenchi i e pineapple chunks i laga nan tambe kushiná huntu ku e pòrchòp un ratu.

Awor ku tur kos ta bon kushiná ta agregá e theelepel di binager destilá, i si ta deseá e sous un tiki mas diki ta agregá un tiki tomati pasta. Por sirbi e plato aki ku su aros brùin òf blanku i algun berdura.