Kultura Laboral


“Siew Tian, why don’t you speak up? I know you have something to say, and you’re not saying it,”  Asina mi ta purba enkurashá un di e miembronan di mas hóben den mi tim. E ta bini di Malasia i nos ta bai hasi 2 aña trahando huntu. Mi sa kiko tur e tin aden, ta un mucha masha inteligente, kla pa siña i ku un ambishon enorme. Unabes mi manager drenta sala di reunion e i tur sobrá di mi tim ta keda ketu i laga pa ami hiba palabra kontestando tur pregunta. Asta ora ta trata tópikonan spesífikamente riba nan tereno. Ta parse ku nan tur ta perde lenga. No ta sobra kasi nada di e profeshonalnan ku mi a pasa asina tantu tempu rekrutando.

our_tennants2_large

Porta Siew Tian tin problema ku su “self-esteem”? Kisas masha bon. Loke ta hunga un ròl grandi aki ta e fenómeno kultural kaminda esun ku mas senioridad tin (kasi) tur e poder pa disidí kiko si i kiko no ta sosode. Pues mi tim ta skucha ami i ami ta skucha mi manager. Si personalmente e pregunta no ta dirigí na bo, bo tin no tin níun motibu pa kontestá. Esaki ta e kultura Asíatiko. Bo por imaginabo kaba kuantu problema mi tataba tin ku esaki ora mi a kuminsa traha aki. Pa un yu di Kòrsou ku a haña su fundeshi laboral na Hulanda, e kambio tabata unu drastíko.

Den un reunion ku 8 kolega na Hulanda, tur 8 lo tin ku hiba palabra i dunan nan opinion aunke 7 ripití eksaktamente loke e prome a bisa.

Singapore su kultura laboral ta un mix uniko kaminda “East meets West”.  Asia ta topa Europa i Merka kreando masha regla kultural na trabou. Den kompanianan chikitu e kultura Asiatiko ta prevalese mas i e komportashon ta mas tradishonal. Despues di mas ku 5 aña ahinda tin biaha ku mi no sa kon pa komportá. E delaster kos ku bo kier hasi ta insulta un hende djis paso bo no sa e reglanan apropiá. Semper ora mi duda mi ta bai bek na e reglanan basíko ku mi a siña ora mi a kuminsa traha aki.

  1. Si bo ta kuminda un kolega o kliente femenino, djis bisa “Hello” i baha bo kabes un tiki. Si e saka su man, bo ta saka dibo.

Pa motibunan di religion hopi muher no ta duna hende homber man. Pues bo por ofendenan si abo saka bo man. Anto ora bo duna un hende homber man bo no tin nodi di ta firme. Ta normal pa duna un man ku den nos kultura ta wordu konsiderá komo slap.

  1. Duna bo tarjeta di trabou semper ku dos man i ku kara pa bo kliente. Tuma di dje tambe ku dos man, lesé mesora i nunka hinke den bo saku di karson (patras) o skirbi riba dje

“Business cards” ta wordu konsidera komo parti di bo personalidad. Trata nan ku rèspèt. Tur pero tur kaminda nan ta wordu husá. Su un kliente presenta ku un tim di 10 persona, ami ta bai kas ku 10 karchi. Ta normal pa pone  e karchinan riba mesa durante reunion pa asina bo korda e nombernan. (ku hopi biaha mi no por pronunsiá)

  1. Durante reunion o sena, komo invitado bo tin ku warda te ora e otro partido kuminsa papia tokante negoshi. Tur sobra ta “small talk”

Na Asia, “business is very personal”. Mi a yega di pasa henter anochi papiando “small talk” pa den e ultimo 5 minüt e kliente bai di akuerdo ku nos proposishon.

  1. No emoshoná. (Mane mi ta bisa mi mes “Chill bo bil”)

Harmonia ta tur kos na Asia. Nunka rabia o mustra ku bo ta rabiá, bo no ta gana níun tiki rèspèt asina.

  1. Durante reunion, dirigí bo mes na esun di mas senior den sala, pero nunka kuestioná e persona

Herárkia ta importante. Kuestioná sea un miembro di mi tim, un kolega o un kliente dilanti di otro hende ta pone nos tur su kara na bèrgwensa

Si tin un regla ku mi no ta praktiká i esey ta “arrive before the boss, leave after the boss”.

kultura laboral

Ami nunka a traha na Kòrsou, pues mi no por kompara ku propio eksperensia. Si mi tin sufisiente famia, amigu i konosi trahando den differente kompania na Kòrsou. For di esnan ku a traha na Hulanda y awor na Kòrsou mi ta kompronde ku nan mester a ahustá hopi. Mi ta korda bon kla kon unu a kontami di su reunion ku mester a kuminsa 10’or. Algu pasá di 10 e prome partisipante ta yega, hinka kara den sala i realisá ku e otronan no tey. E ta bai bèk su luga. Algun ratu despues e di dos ta yega i hasi meskos. E di tres ta yega pone su pèn i papel riba mesa i sali bai buska sobrá. Mei ora lat tur ta presente i reunion por kuminsa. 10 minüt despues unu ta bisa ku tin ku diskulpé, pero e tin ku sali pa bai buska su yu prome ku tráfiko pega den Saliña.

Mi ta spera ku den 2015 e senario aki no ta e kaso mas

 

Advertenties

Auteur: Endilo Lourens

Un Yu di Kòrsou biba na Singapore ku for di e punto di bista personal lo kompara e situashon di Singapore ku esun di Korsou indikando di un manera positivo e lesnan ku Korsou por siña y ehekutá pa drecha e kalidat di bida di Dushi Kòrsou.

3 thoughts on “Kultura Laboral”

  1. Endilo masha danki pa e informashon aki. Hopi hende por siña di dje.
    Mi mester a hari ora b’a skibi: “Den un reunion ku 8 kolega na Hulanda, tur 8 lo tin ku hiba palabra i dunan nan opinion aunke 7 ripití eksaktamente loke e prome a bisa.” Mane nan ta bisa na Ulandes: ‘een waarheid als een koe!’. Ta mashá pèrdèment’i tempu tin! Lokual mi ta kompronde ta ku si ta posibel awendia nan ta buta un expat pa presidiá reunion pa kaba ku e lokura’ki.

    Liked by 1 persoon

  2. Masha danki pa komparti bo experensia ku nos.

    Mi experencia na Hulanda ta ku a resulta ku mi ta te mondig. Es decir mi no ta laga nada pasa por alto. Y for di den mi sollicitatie gesprek mi ta geef aan ku mi ta gusta pa mi hefe y coleganan ta eerlijk. Eseinan ta mi kondishonnan pa traha. Pero despues di 6 luna mi coleganan no ta gusta e style ey mas.

    Ami y mi coleganan hulandes na un okashon a tuma basta tempu pa bespreek un punto ku tabata molestia nos dilanti. Nos tabata un team di 6 secretaria. Nos a spreek af ku nos kada unu ta trese nos punto dilanti durante e reunion ku e director. Boso lo kere, pero na momento di rondvraag tur mi coleganan a keda muisstil. Ora ami a jega na beurt ami a hisa mi dede y trese mi punto y nan tur su punto dilanti. Y geef aan tambe ku nos a tuma nos tempu pa bespreek e situashon aki.

    Mi coleganan a pone man na boka y kabes…..keda wak mi manera, really???

    Dus manera boso por kompronde ami a keda mal mira paso mi si a durf di trese e puntonan dilanti.

    Liked by 1 persoon

Geef een reactie

Vul je gegevens in of klik op een icoon om in te loggen.

WordPress.com logo

Je reageert onder je WordPress.com account. Log uit / Bijwerken )

Twitter-afbeelding

Je reageert onder je Twitter account. Log uit / Bijwerken )

Facebook foto

Je reageert onder je Facebook account. Log uit / Bijwerken )

Google+ photo

Je reageert onder je Google+ account. Log uit / Bijwerken )

Verbinden met %s