Mi yu robòt


Un nostalgia ta drenta mi ora mi pensa riba mi infansia. Tempu a kambia asina tantu, tur kos ta bai asina lihé. Tur hende a lanta otro, pero si ta na Kòrsou bo a wòrdu lantá bo sa kiko mi ke men. Ora bo sali skol mèrdia bo ta kome despues sosegá un tiki i traha hùiswèrk. Den mi kaso mama tabata bai trabou bèk, i ami ta keda kas ku mi ruman i opa warda mama bin kas atardi. E regla ta: ‘no ta sali kas promé ku mama bini’. Abo komo mucha tin biaha no por warda pa atardi sera pa bo bai hunga. Ke men asina mama yega mi ta sali pia’bou kore den hanchi kas wak ken ta pafó pa nos bai hunga. Loke nos tabata hunga hopi den mi bario ta:

“Tik

Tapa kara

Bula kabuya 

Ana maria kukuk

Mama ku yu

Pélé

Kore baiskel

Luna ku solo”

Asina mi por menshoná hopi mas. Bo no tin ni tres ora na drechi mama ta sali grita: ‘Bin paden awor’. Awèl, ami no ta laga mi mama bin yama mi di dos biaha paso ta na bèrgwensa mi ta keda. E ta kuminsá grita bu na ful bo nòmber pa tur hende tende i esei di mes bo no ke.

Aña pasá mi a bai kas bèk den fakansi i tur e rekuerdonan aki a bin ariba. Naturalmente e muchanan ku ami a lanta kuné tambe a bira grandi i a bai for di kas. Pa mi sorpresa e generashon nobo ta kompletamente otro. No tabata tin korementu di baiskel i ‘tik’ mas, pero sintamentu di wak den telefòn (smartphone) i tablet nobo. Hunga spèl riba e aparatonan aki, banda di otro sin bisa ni un pia di palabra kasi. Otronan riba PSP òf laptop òf tin ku no ta ni sali kas hunga ku muchanan di bario mas. Ami no por kòrda ku ami no tabata kier sali kas, al kontrario mi tabata drumi riba e oloshi.

Otro dia mi ta sintá den bus un yu chikí ta papia i buska kontakto ku e mama, mama mes ta kabes den telefòn. Un ora e mama a kansa i saka un tablet duna e mucha hunga riba dje pa e por keda bezig den telefòn. Unda nos ta bai?

Ami no tin nada kontra di teknologia, basta e wòrdu uzá na e manera ku ta benefisiá bu. Ami ta punta mi mes pakiko un mucha di 10 aña òf mas hóben mester di telefòn. No bisa mi pa ora skol kaba bo por app e paso tur tempu tur mucha sa ku ora skol kaba e mester warda pafó te ora su mayornan yega. No bisa mi tampoko paso su amigunan tin, e tambe mester tin. Ami no tin yu ainda i mi no ke bisa niun hende kon pa lanta nan yu. Pero imposibel ku awor aki nos ta lantando par di robòt. Ku tur rèspèt pero no ta pòrnada nan ta yama e generashon ku ta bini aki dòm i no ta pensa mas leu ku nan nanishi. Ta manera nan ta programá.

Dunando mucha e aparatonan aki for di chikí kaminda nan por sali pafó i sosialisá, nos ta stroba nan di fantasiá, tin un infansia ku hopi rekuerdo manera nos tabata tin i eksperimentá. Nos ta konsiente di kuantu kos tin riba social media? No ta tur hende ta lanta nan yu asin’aki, esei mi sa. Pero nos mester ta hopi sinsero i mira ku ta pió so ta birando.

Purba no laga teknologia i social media eduká bo yu. P’esei abo komo mayor tei! Si bo dun’é un telefòn mes, abo mester tin kòntròl di dje. Abo ta mayor, no e aparato. Por fabor, yuda muchanan bira mucha bèk?

Ku amor,

Raedreamer

cropped-cropped-blurred_bg412.png