Bo tambe stima plaka?


Tur aña mi apresio pa Deva-dee, Maarten Schakel i tur sobra ku a kontribuí na Curaçao Clean Up ta krese aun mas. Un tremendo inisiativa pa duna un man i konsientisá pueblo kompletu di un problema ku no mester ta eksistí mes. Tur aña e boluntarionan ta rekohé míles di kilo di shushi pa e aña siguiente bolbe bin topa shushi bentá na mes un lugá. Laga nos ta sinsero, 20 aña pasá tambe Kòrsou tabata shushi i nos a konosé diferente kampaña di konsientisashon. Tur tabata sèn tirá afó paso nada no a kambia. Na 2015 ketu bai Kòrsou tin demasiado adulto porko ta biba.

Dikon skolnan no ta hasi partisipashon na Curaçao Clean Up obligatorio pa tur alumno?

E shushedat di Kòrsou no ta solamente e kùp, tayó, kolchon bieu o saku di plèstik bentá riba kaya. E shushinan aki ta bisto, pero gran parti di e shushedat no ta bisto. E shushedat den enseñansa, deporte, turismo, prensa, den proyektonan rondó di airopuerto, hospital, megapir II, haf, den mundu di notario, abogado i polítiko ta keda skondí pa mayoria. Ta rònt Kòrsou tin wega shushi tumando lugá i demasiado hende ta kedando ketu pa e simpel motibu ku nan stima plaka.

Tanten ku e no sek’é, karpata no ta bai laga kachó.

Tin mas o ménos 5 famia tras di tur e gran desishonnan di Kòrsou. Nan tin e gobernantenan “by the balls” loke ta enserá ku nan por hasi i keda sin hasi loke nan haña ta bon. Si nan kièr nan ta pone un minister presidente lanta for di mesa, stof su atras i baha bai sin duna niun motibu pa ku su retiro. Nan ta poné un hòmber ku semper a gusta papia tene su boka será pa e pueblo ku e la sirbi, na esnan ku a paga su salario medio di belasting.

Asta e 21 payasonan ku ta suponé di representá pueblo no tin e kurashi pa hasi nèt nèt nada tokante e asuntu aki. Payasonan ku ta tin palabranan masha bunita poko aña pasá kanando den bario pidiendo sosten, hasiendo promesanan bashí indikando ku nan si lo traha pa pueblo. Sera ku urna a sera nan a pèrdè lenga. 20 di e payasonan aki a kore drenta konvoi bai keiru den Roodeweg i pone preshon pa saka 500 mil florin pa fiesta sigui. Awe ku e clown mayó a baha bai, tur a tapa nan nanishi kòrá i sali di porta patras bai en bes di drenta konvoi bai blòkia su porta di kas. Ora aña bòltu lo bo mira nan den un bachi nobo buskando voto den bo bario atrobe.

Sirko Politiko

Loke no ta tumando luga ta e dialogonan tokante tópikonan di importansia pa futuro di Kòrsou. E pais ku nos tur lo muri bai laga atras pa nos yunan i nan yunan. Tópikonan manera; ki tipo di pais nos kier laga atras pa futuro generashon, konta bai hasi ora venesolanonan kuminsa bin buska refugio na Kòrsou, kua strategia ta bai ehekutá pa strukturalmente baha desempleo bou di hoben? Kon ta bai kubri e gastunan astronómiko di salubridat públiko den futuro? Kon ta garantisa ku kalidat di bida di e yu di Kòrsou lo krese den futuro? Un pais ku no ta pensa riba su futuro ta destiná pa frakasá.

Payaso

Un kos ta sigur, ku e protagonistanan di e sirko aktual Kòrsou lo no logra niun krenchi di adelanto. Mi ta konvensí ku Kòrsou tin lidernan kapas pa hiba e pais dilanti. Tin mas ku 31 hende hóben, bon studia, ku gana di traha i sin interes propio den e 150 mil abitantenan. Pero mientrastantu e situashon aktual permanesé ta komprendibel ku e lidernan aki hamas de los hamases lo mete ku polítika. E preis ku nan mester paga ta muchu haltu.

Si por pidi un invershonista paga 48 mion dòler pa un pèrmit ekonómiko, no mester eksigí tur partido polítiko meskos? Historia a demonstrá ku fayonan kometé dor di polítikonan, nan partido i kompinchinan a laga pueblo atras ku debe muchu mas grandi.

Pa esei mi ta kere Curaçao Clean Up su trabou no ta kla. Ainda falta por lo ménos 31 kliko pa pueblo tira e sèt di payaso egoista afó. Nan a resultá di no ta digno pa sirbi pueblo. Tampoko ta bale la pena resiklá nan. Pueblo di Kòrsou a hasi esei na diferente okashon kaba tòg e resultadonan a desapuntá.

politiko den Kliko