Fuku den Barberia


Baf, puya, hòr, saka, bestia morto, mi mes na bo lugá lo pensa ta ki e fiserei aki? Pero figurá ku bo a eksperensiá e kosnan aki na un bishita seif den èrko na un barberia…

Awèl esaki a yega di pasa mi un par di bes. Ami ku mi vishon nobo  pa duna diferente hende chèns i redusí mi tempu di warda na barberia pa pela, a pone mi for di na sèptèmber 2015 bai i pela na kua ku ta barberia.


Kódigo; ma kambia òf makambiá?
E mundu di barberia mi a lubidá ta kon e ta hinká di otro. Esaki ta bini fo’i tempu ku e edat a subi un tiki mas i e kabeinan ta krese ménos dilanti riba mi kabes. Na Oropa mi tabata haña e preisnan karu i na Antia e lista di warda largu. Prinsipalmente si bo tin bo peladó faborito. Motibunan ku a pone mi kumpra mi mes mashin i basha koroto mi mes abou. Ke men mi no tabata sa (mas) ku bo mester pensa bo dos biaha bon, ora bo drenta un barberia ku ta kasi yen anto un peladó ta liber i abo ta na turno. “Thug” tur hende ta warda riba e barbero ku nan a kustumbrá pela serka dje òf ta warda riba esun ku nan ta pela mas mihó. Ami ku (ainda) no konosé nan tur, ta mas ku kontentu ku e momentu ei mi ta na bùrt. Alabes mi estilo di pela (feita limpi ku blet) no ta unu difísil. Pero no balotá, paso …

‘E frèt no mester pela’

Di e 13 pelánan na 6 diferente barberia serka 13 diferente peladó, mi a eksperensiá 4 insidente. Tres a kòrta mi kabes ku blet i e di kuater barbero a heridá mi frèt na altura di mi sla di sintí. Siendo ku mi a bisa e brò pa e tene kuenta ku e kosnan opvio pa mira ei, mustrando e -manera mi ta hasi semper ta kiko mi ke men. Bo por imaginá bo ku despues di kada un insidente asina aki a dura mi sigur dos pelá (ku mi mes ta hasi ku mi mashin e ora ei numa) pa mi rekuperá di e trouma aki?


Pesadia; ‘babadó’ pa pela
Abo sa kon e ta bai tòg?! Bo ta kumindá, kai sinta, splika kon bo ke bo pelá. I e barbero ta pone man na obra. Seis di mi 13 pelánan mi ‘kabes a kue rel’ ora nan a pone e ‘skòrt’ na mi garganta ku mayoria be ta di plèstik. Gewon nan tabata hole hòr. Anto pa kolmo e spesialista pa kòrta kabei di hende hòmber no tabatin ni papel di wc pa pone na e rant dje ‘babadó’ pa pela. Awèl, e ora ei bo ta sinti e sodó di esun ku tabata promé ku bo na bo garganta. No kere ku b’a skapa, paso e dedenan ku touch bo kabes pa duna bo ki direkshon bo mester hala bo kabes, sa tin holónan pa wal bo stoma. Fragansianan no agradabel ku ta duna bo un rekorido den henter e barberia ei…. Ta masha show ta hasi ora ta kue blet nobo sin desinfektá e kos ku e blet ta aden. Mi a yega di mira ku asta kaska masha grandi ariba. Pero super ku mayoria ta drecha kos na final; ‘mener por a sera wowo? Mi ta bai spùit alkohòl …’

Fin di aña ta yegando. Un periodo ku hopi hende kier dal un pelá. Ki abo su kontribushon konstruktivo lo ta pa fomentá plùs stimulá higiena na barberianan?

RAM

**Fo’i 2012 RAM a bolbe Antia despues di biba pa mas ku 15 aña na Oropa. Insidentalmente e ta aportá pa entre otro “T’aki mi ta BEBA”.