Resúmen di siman (49)


Yolanda Smallegange prospekto pa Tazs Angels

Ta fresku den nos tur su memoria kon na yüli último e grupo Tazs Angels a sòru pa un show espektakular den klup Kuchara. E dia ei vários hende su a kabes a suta i nan a kombertí e klup den un set di filmashon pa un pelíkula pornográfiko yamá:

“Las mas finas son las mas TAZS”

Den tur e Sodoma i Gomora ku tabata tumando lugá Yolanda Smallegange tòg a sa di skor un oportunidat pa figura komo prospekto pa e grupo aki. Kosnan a kuminsá kana na momentu ku un di e miembronan a disidí ku e ta bandoná e grupo.

Yolanda ta un damita ku na 2013 a partisipá na e sertámen di  tantu Miss Kòrsou komo Miss intercontinental. Talento i beyesa e tin de sobra.

Yolanda
Yolanda Smallegange ta e promé damita na parti links di potrèt
Laga esaki ta un lès pa tur sobra ku ta saka selfie i potrèt para di banda ta wak abou. Si bo no ta un “Yolanda Smallegange” ta bo estudio i trabou duru a sobra bo.

Basta di para hasi pantomina den spil.

Pelea pa hòmber na hotèl Kura Hulanda

Pa moderno ku nos ta hunga ròl di ta, ketu bai e fenómeno di “bringa pa hòmbu” ta popular. E historia semper ta mes kos. Mai ku Pai ta biba dushi na ‘pès’ den nan ‘kès’. Riba un dia Pai ta trompeká i kai den baisait su ‘lès’. Pai ta sinti smak di pòrchòp i ta stòp di kome Mai su galiña. Despues ku Pai a kome e pòrchòp di baisait, chupa wesu saka tur su djus e ta realisá ku ta Mai su galiña mes t’esun!.

Lo bo pensa “ala fin ala fan” e kuenta a kaba. Awèl tur kaminda ménos serka nos hendenan. Paso mester kaba e kos na malu. Ta traha plan pa bai bati Mai na su boka di trabou anto naturalmente mester graba esaki pa tur hende mira. Ta dje bruá aki nos a bira òf ta zumbi di desèmber ta poderá di nos sintí?

En todo kaso. Nos ta spera di kurason ku e pelea tabata na tur esnan envolví su agrado. Sigui bringa i aportá na Kòrsou su baimentu den abou di su Le mèmè .

Historia ta ripití: desèmber ta luna di “mi frei ku ta hunga beisbòl na merka”

Nos ta den luna di desèmber. Tiki tiki pero sigur nos hóben peloteronan i otro deportistanan profeshonal ta kohiendo rumbo pa kas. Despues di a traha duru den 2015 ta ora pa sosegá e kurpa i gosa ku famia i amigunan. Den e luna aki gatieronan ta por la goma tratando di skor entre otro un “gai di beisbol’. Nan ta para na waya di ballpark sèksi bistí lur nan víktima.

Tera ta bula, sodó ta kore di frenta pa tenchi i e “weave” ta kuminsá kishikí pero nada no por stroba nan for di nan meta. E esfuerso aki sigur ta algu di aploudí pero mester tene kuenta tambe ku na yanüari tur kos ta kaba i ku mester lanta for di un soño profundo di mentira. Pa evitá ku yanüari 2016 ta kuminsá ku bòmbòshi paso “a subi plato komo pinchhitter dal un bala den kuadro kore yega primera pa despues tira casco abou i kana bai dogout” nos a saka e siguiente komunikado:

Atenshon tur gatiero:

Mayoria pelotero di liganan profeshonal tei kaba na Kòrsou. Awor ta falta esnan di futbòl, tènis etcetera etcetera…. Nos kier a pidi boso enkaresidamente pa ora yanüari habri no pone boso lamento i pesadia riba facebook.

Realisá ku pa desèmber bo mishon ta mes kos ku di un ayaka:

Lo bo wòrdu mará, herebé, kome i despues depositá den berpùt. Bo no a frei niun “gai di beisbòl”.

Bo tabata djis un pasapalu.

Besos.

Ps. Pa esnan burdá: ata un link pa e reportahe di Curaçao Baseball week 2015

Happy hunting.

Ta asina ta dera òf laga

Ora un persona yegá na bo fayesé semper e ta hasi doló. Djis despues di e doló ya mester kuminsá hasi preparashon pa e entiero. Segun nos kultura ta hopi kos mester wòrdu reglá. Den otro kulturanan manera esun di e hulandes oropeo kosnan ta bai hopi fásil. Manera bo dal abou hik muri ya tur hende sa ki dia ta dera. Si bo muri por ehèmpel riba un djaluna, pa djárason atardi ya a muha e mata na bo graf tres bia i pluma bo kas.

Segun añanan ta bai mas i mas ta tene kuenta ku deseo di e defuntu. Tin ku ta pidi pa pasa dilanti porta di su kas, trabou, snèk òf baisait. Tambe tin esnan ku ke pa e dia di entiero ta unu alegre. Riba internèt nos a bin topa ku e siguiente video. E entiero aki ta mustra asina bon reglá ku e ta duna bo gana di muri.  Klaramente bo por mira tantu tristesa komo alegria serka esnan ku tabata presente.

Na final bo ta keda satisfecho paso aunke e persona no tei mas bo a dun’e un despedida ku tur honor.

Miss Kòrsou Kanisha Sluis rumbo pa Las Vegas

Apesar di tur e kosnan robes ku ta sosodiendo tòg nos no mester lubidá ku, na Las Vegas tin un damita ku ta preparando su mes pa Miss Universo 2015.

Coridja Star Productions a fail e siguiente reportahe:

Laga nos tur ban apoyá e damita aki. E evento lo tuma lugá dia 20 di desèmber.

Ala fin ala fan e kuenta a kaba i asina nos a bolbe logra yega djabièrnè sano i salvo. Bientu a supla asina duru e dianan aki te ku Mariano Luis Heyden su account di facebook a dònder abou. Djaya banda Insel Air a saka un komunikado indikando ku tur kos ta bek bou di kontrol. Djis un ratu despues un informashon a drenta ku e promé vuelo di mainta pa Venezuela mester a bira bèk pa motibu di problema ku motor. Agiws.

12308206_802389613240646_8711921923344511684_o.jpg

En todo kaso. Mañan Color Events lo ta anfitrion pa e fiesta “Where My Ladies At”. Boso tur a kobra ke men kumpra bo karchi, bebe un tiki zeta WD40 pa e sintura lòs i bai gosa.

Nos mes lo ta riba laman piskando pero promé ku esei laga nos rekordá bo ku maske:

gerensia di hotèl Renaissance a prohibí su trahadónan pa laborá ku nan kabei estilo flèktu òf gueni pa motibu di holó malu, e rumor ta kore ku obispu a manda pastor Simon Wilson bai skondé na pastorí den Rincon pero manera e la yega tur klòk a bati “remailo”  i kòrda ku despues di desèmber yanüari ta hopi largu…

 

T’aki mi ta BEBA