Resúmen di siman (51)


Ana Montana, pòtmòni santana!

2015 lo bai den buki di historia komo e aña ku mundu farándula di Kòrsou a sera konosí ku e fenómeno di buska stripper for di Merka pa bin kana rònt den fiesta. Promotornan a gana asina tantu plaka ku ni Afpakteam no por a kibra e trènt aki. Wikènt ku a pasa a toka turno na Ana Montana pa fungi komo atrakshon durante di un fiesta organisá pa Bold Events. Nos a komprondé ku e ambiente tabata tremendo. Hendenan a baila, gosa te gasta sèn di gasolin i saku di aros pa yega fin di luna.

Aki ta sigui dos video kaminda bo por atmirá Ana Montana i un amiga. Le sènk falsu, pechu falsu i kabei falsu. E plaka ku Ana Montana body Santana a gana bailando riba Dj Iski su hit “Donkey Kong” si tabata real!

Forlestu konosé? Forlestu sera sm*l!

E pueblo aki ta unu hopi kreativo. No ta eksistí un situashon ku nos no por imitá. Ta fresku den tur hende su memoria kon un par di luna pasá e video di “forlestu” a sali riba internèt i kousa estrago. No a dura muchu ku músikonan a kue e frase famoso “forlestu” konosé? forlestu sera sm*l” i traha un bunita kansion. Aki ta sigui e promé vershon.

Nos tin sigur ku un djis lo saka un vershon riba ritmo di roadfire i naturalmente Paul Welvaart ta e úniko ku lo por kant’e mané mester.

R-2624546-1364663156-2244.jpeg

Hopi hende for di Hulanda ku vòngkòngsi

Nan tei! Si, e hasidónan di drùk. Fo’i na porta di avion kortina di sirko ta habri pa pantomina por kuminsá. Ku asina un yas diki na kurpa nan ta kana pasa den slùrf i para na imigrashon. Hulandes malu ta sali for di nan boka di baf i tur frase ta kaba ku “jeetje man”. Para den rei na Starbucks (ku e yas bistí) bo ta tende:

“Siiii ami ku mi dochtertje en zoontje tei pa 3 luna yu… nos tin vònkòngsi te despues di kòrnòvol.”

Despues di 2 dia ya nan ta keha di e kalor, ku aki si no tin “frietsaus” i e mesun paki di djus na Hulanda ta kosta 1 “ero”. Pa no papia mes di e kantidat di pañanan ku ta kumpra na Primarkt i bin bende nos pueblo mansu na preisnan demasiado haltu.

advertentiekrese2

 

En todo kaso. Bon biní na boso tur, gosa di e dianan di fiesta i no lubidá ku yanüari e acceptgironan ta warda boso ku mil amor den brivenbùs.

Bululú na Aeropuerto Internashonal Hato

Esnan ku a biaha den e último 3 simannan sa mesora ta kiko nos ta bai divulgá. Tur dia di nobo “fulan” tin retraso riba diferente di su vuelonan. Aparte di esei tabatin tambe esenanan for di pelíkula kaminda un par di biaha mester a hasi aterisahe di emergensia. “Fulan” a splika den un di e kasonan aki ku tabata trata di un alarma falsu. E sobránan aparentemente a bai den X-files.

IMG_4581

Djaluna último nos mes tabata testigu di un situashon ku por poko a sali for di man. E vuelonan ku destinashon pa Jamaica i Haiti tur dos tabatin retraso. Miéntras ku e pasaheronan pa Jamaica a kuminsá grita palabranan manera “Bomboclaat”, “Pussyclaat” un pasahero a bira puntra nos:

“A weh ya baan?” ku ta para pa “na unda ba nase?”.

Aya banda e pasaheronan di Haiti a kuminsá menasa e personal di “fulan” te ku mester a yama e personal di seguridat.

Ta un lastimá ku e personal di “fulan” mester hiba vra pa motibu di mal maneho. Nan tambe ta mama i tata ku mester kria nan famia i ta aseptá un kantidat di abuzu pa logra esei. “Fulan” tin suerte ku su personal pa un gran parti ta yòn i fleksibel. Si no masha dia nan lo a sali bai laga koroto.

Òl bai Òl nos mester felisitá e personal ku den tur situashon a sòru pa nos yega nos destinashon sano i salvo.

“Damita” fuma drumí den outo na Aruba

Luna di desèmber ta karga ku tur tipo di fiesta. No ta nada straño ku e konsumo di alkohòl ta mas haltu ku nunka. Na Aruba djis pega ku eks edifisio di Kooyman polis a bin topa ku un vehíkulo un tiki straño stashoná. Mesora nan a baha i bai wak kiko tabata pasando. A bin topa ku un “damita” morto na soño i ku su paña tur na saka.

Te ainda e motibu pa kiko e damita aki a disidí na pega soño riba kaya pero nos tin e leve sospecho ku e la konsumí hopi glas di e biña marka: Kono

IMG_3820

Aparentemente e biña aki a dale asina duru i pone ku por poko e la kore bai dal i kibra tur su….

Aki ta sigui un splikashon kòrtiku di e biña aki:

Ala fin ala fan e kuenta a kaba.

Asina ei nos a bolbe presentá bo tur loke na nos pareser tabata bale la pena menshoná. Riba e djabièrnè aki e pueblo di Boneiru lo hasi nan eskoho pa medio di un referendum. Tambe ta e dia ku hopi trahadó ta risibí nan salario i bónùs. Kòrda uz’e konsiente i no lubidá ku e luna di yanüari ta hopi largu. En todo kaso. Nos ta bai herebé dos ayaka pero promé ku esei laga nos ke rekordá bo ku maske:

Julius Koko ta gusta hunga ròl di miradó di destino, Nostradamus i Rasti Rostelli, hopi hende ta lesa Resúmen 12 or palu palu pará den klup Spoonz i si pastor Simon no aparesé obispu no mag deseá ningun hende un bon aña for di Brionplein…

 

T’aki mi ta BEBA