‘Hulanda mi kier bai’


Ora nos ta biba na Kòrsou nos ta tende hopi kos bon di Hulanda. Hopi hende ta hasi manera akinan ta e lugá kaminda nan por solushoná tur nan problemanan. Wèl no ta asina!

Bibando na Kòrsou bo mester a tende e siguiente frasenan aki di un hende òf famia ku ta biba aki:

1.jpg

‘Bin biba Hulanda serka mi, mi ta yudabu ku tur kos’

‘Hey akinan tin masha bon skol mes’

‘Hulanda no ta wega’

‘Akinan lo bo tin kos di hasi sigur’

‘Bo ta haña masha sèn mes di kinderbijslag’

‘Paña ta masha masha barata mes’

‘Ku 5 euro ba kome’

‘Si bo tin debe nan ta yudabu paga tur’

‘Hendenan ta tene kuenta kubo na Hulanda’

‘Tur kos ta mas fasil akinan ku na Kòrsou’

‘Einan bo tin hopi mas libertat’

‘Hulanda ta mas grandi ku Kòrsou, dus einan bo por logra hopi mas’

 

Asina mi por menshoná hopi mas..

Tur hende ta bisabu bai òf tin ta bisabu no bai, pero niun no ta splika dikon. Ami ta pensa ku tur hende tin nan mes eksperiensianan i mi realidat no ta esun di abo. Pero na Kòrsou nos ta gusta mira riba otro kere ku loke esun ta hasi nos tambe por òf nos no ta puntra nos mes kon e a hasi’é.

Dia ami a disidí di bin biba Hulanda tabata basta disfisil pa mi a tuma e desishon ei. Mi a pensa: ‘Mi no kier laga mi mama’. Si tabata pa ami, ami lo no a bin biba akinan. Dor ku mi ta hasi un ‘acteursopleiding’ mi a hañami ta bin pa mi kumpli mi soño di bira aktris. Hopi kos mi a tende di Hulanda pero niun hende no por a splikami ta kiko tur mi mester sa pa mi ta bon prepará. Úniko kos ku mi mama por a bisa ami ta: ‘Einan ta hasi hopi friu i bo mes tin ku bai hasi TUR kos’. Mi tabata sa eseinan kaba. Pero mama, kiko ta tur kos? Esei e mes no por a splika paso e mes no a biba akinan nunka.

Aparentemente hopi hóben no ta bon informá. Ora nan yega ta desepshon i hopi di e hóbennan ta pèrdè riba kaminda. Tin di nan ta kambia di estudio mas ku tres bes, otronan ta legumai skol kuminsá traha i manera nos tur sa, tin ta bai pa e bida ‘fasil’. Naturalmente tin hóben tambe ku a kaba nan estudio ku éxito i ta asta trahando komo profeshonal akinan.

Falta di informashon ta e yabi prinsipal dikon nos studiantenan no ta logra nan metanan.

Mi sa tambe di sierto hóben ku kier bin Hulanda pa skapa di mayor, pa mas libertat i pa tur e frasenan ku mi a menshoná ariba. Ami ta bisa semper: si bo ta bin Hulanda sin un meta, sin un soño, nó bin. No ta pa kibra niun hende pero akinan no ta asina fasil manera e ta zona. Si bo no ta fuerte na mente i alma, kere ami, bo ta dualdu masha lihé. Akinan tin tentashon di tur sistema i di tur banda. No bini Hulanda pa skapa di un problema paso asina e problema no ta resolvé. Tambe esunnan ku ta bin paso famia a bisanan bin biba. Dushi, despues di un luna nan mes ta hasi tur posibel pabo sali for di nan kas. Hulanda ta: ‘Ieder voor zichzelf, God voor ons allen’.

Akinan bèrdat tin hopi posibilidat ku Kòrsou no por brindabu, pero abo mester disidí kua di tur bo ta bai tras di dje.

Ku amor,

Richailine Elisa