Kayente pa fiesta, friu pa paisano


Djamars. Rònt di dos’or, mi kolega ta chèk su Facebook i ta bisa na mesa: “Ata, nan a haña un señora di 80 aña morto den su kas.” Na niun momentu a pasa den mi kabes ku e kaso aki lo trata di un krimen. Ami a suponé ku e dama di edat lo mester a haña un atake òf algu partikular. Pero nò?! Resèrshi a bin haña señora boka abou, kas ku tur kos di bòltu, bentana di patras den kas ku yalusinan poné na suela. Het zal je moeder, zuster of tante wezen.

Ma keda di shòk. Mi so na mesa. Ya mi koleganan a ‘kustumbra’ ku sierto notisia. “Ai yu, probablemente, nan a atraká e señora.” Serio, serio, SERIO?! Ahn, dùs ta hende grandi ta atraká awó? No a ni sobrabu, un tiki eskrupulo pa rèspèt pa bida di ansianunan? Anto, bosnan a bòltu kas. Kiko boso a haña? Un pòchi oro den kashi?Tòg, tòg?! Ta pesei mes, bo ta mek riba e ansianunan. Un t’asina mi bròder?

E barbaridat aki no ta zinloos.E ta geweld. Mihó bisa blind geweld. Violensha sin sentidu. Djis pasó por. Pasó mi EGO a bisami. Ku niun klase di tenementu kuenta di prohimo. Hahaha, ata un palabra saká f’oi bahul ei. Prohimo. Nos sa ainda kiko ta su nifikashon? E ser humano banda di bo. Bo bisiña, e shon den e outo bo dilanti, e ansiana boka abou den su kas.

Ta notisia manera esaki ta ponemi pensa ta na unda Kòrsou ta bayendo? Mi sa ku aworaki mayoria di hende ta kabes den karnaval. Djùmp in. Kua shert kòrta i stail pa bo keda lusi den ambiente. Of kuantu paña tin ku kaba ainda promé karnaval kuminsa. Yen strès, pasó ta yegando dètlain. I señora ta boka abou den Vigilante. Niun hende ku ta organisá un stille tocht den bario? Komo protestá pa e lokual a sosodé. Gewoon algu. Un gesto. Kon chikí ku e ta.

Mi no por laga e imagen lòs. Ta kon nos a bira kayente pa fiesta. Pero nos a fria pa nos paisanonan? Ta na unda kosnan ta bayendo?

Happy Sunday!

Nef