Bo mama gusta Donkey Kong


Ami no ta hende ku ta gusta bai fiesta masha mi tin ku bisa pa mi ta honesto. Pero ora mi saka mi sèn pa bai mi kier baila i gosa na abundansia. Tambe mi no sa tende tur tipo di músika i tin ora mi por kai den shòk ora mi tende e tipo di kantikanan ku hendenan ta ‘turn up’ riba dje awor aki. Den december mi a bai un fiesta despues di 8 luna (agiws) ku mi amiganan. Mi tabata baila entretené mi mes, paso fiesta no tabata masha yen, ora ku mi a tende: ‘bati e ko’i ku skupi, keda lik e ko’i ’. Mira’ki ta promé biaha mi e tende e kantika ei. Ami a stòp di baila pa mi a skucha bon ta kiko e kantika ta bisa, paso mi no por a kere. E kos di mas tristu ku mi persona ta haña ta ku esunnan ku ta baila atras riba dje ta hende muhénan. Yen señora ku por ta mi mama den fiesta medio sunú bisti. Ata Donkey Kong ta zona nan ta riba dje atrobe. Ta di abo komo hende muhé nan ta kanta asina detayá mamita.

HOW

Awor aki mayoria kantika ta bai over di hende muhé su flor òf kiko nan ta hasi kuné. No tin nada mas pa kanta amplio di dje? Unda metáfora a keda? Ketu ku inspirashon? Bo tin mama, ruman? Nada? E kosnan aki nan tin ta kanta over di dje awor aki:

‘Estilo 6 9 nan ta supla blòkflùit keda hasi ko’i mas.. Pone e P nan spùit

‘E gusta sla duru, sla di kaballo.. Spang e konai’

‘E peki gusta Donkey Kong, palu aki palu aya..’

‘Semper bo ta m*ha mané un postzegel’

‘Subi riba e ko’i stail di dalakochi’

Tin hopi mas ku ami ta haña ku no por. Wak, e beat ta zona great pa bo baila ariba. Mi no por gaña. Awor aki ta masha tiki ta uza dòbel sinti i laga abo komo skuchadó su imaginashon bai traha. Tur kos nan ta splika. Kompará ku ántes músika a kambia hopi. Loke nos mes ta skohe pa skucha i baila ariba a tambe kambia.

Awor aki tambe tin hopi kantika ku ta bai tokante di ‘gun’, bula kabes di hende, kue bo B**ch i plaka. Tur hende mes mester sa kiko nan ta skucha pero kòrda ku músika tin hopi influensia riba hende. Ku bo ta konsiente di dje òf nò. Kuantu biaha bo ta tende un kantika i e melodia òf un frase ta keda drai den bo kabes. Asta muchanan ta baila chanchan òf traha señal di gun riba e tipo di kantikanan aki. Nos ta hari haña masha leuk. T’esaki nos kier anto ora hóbennan ta hasi stinki òf tira atrako nos ke yora? Pens’é!

Músika tambe ta un medio di eduká un pueblo. Hopi artista ta skibi loke nan ta pasa aden òf loke ta pasa den e komunidat. Òf nan ta wòrdu influensiá dor di artistanan Merikano. Paso e kosnan ku nan tambe ta kanta ta mesun kos òf pió, pero dor ku no ta den nos lenga nan kanta nos ta baila sin sa. E Merikanonan ta skibi kos ku ta pasa den nan pais. Nos ta un isla. Via di nan músika nos ta kontagiá ku sierto kos na mi pareser. Ta keda na abo komo artista kiko bo ke trese dilanti. Di mes bo no mester sensura bo mes, nò. Lovey dovey so no ta e kos tampoko pero si bo ke skibi algu mas brutu metáfora lo ta na lugá.

Tur hòmber i muhé sa kon otro su parti íntimo ta. Bo no mester para splika tur hende kiko bo ta hasi den bo kamber i kiko tur mi flor por fungi p’é. Hòmbu no sa papia kòrda bon!

Ku Amor,

Richailine Elisa