Si reklamá tabata un deporte, Kòrsou lo tabata kampion mundial.


Puntra kualke yu di kòrsou ku a biba na Hulanda i nan lo konta bo ku “makamba gusta zeur”. No ta importa unda nan yega, sea trabou, kas, skol, den trein, den bus nan ta kla pa reklamá. Ora koi reklamá kaba, nan ta reklamá tokante e “weer”. Algu ku niun hende no por kambia ni maske kuantu nan bula riba kai abou. Hulandesnan a presta di bin biba komo bisiña di un hofi konosí pa su fiestanan den wikènt. Nan a reklamá tokante molester di musika te dia e hofi a stop di pone fiesta. Awor e Yu di Kòrsou a kopia e komportashon aki.

 

complaining

Ami semper a kere fielmente ku hende ku ta reklamá tur ora bai ta kontagosio. E koi ta pega!. Sin ku bo pensa bo tambe ta kuminsa. Pesey mi ta forsa mi mes di keda leu foi hende negativo. Sigur esnan ku ta reklamá sin propone un solushon. Esaki ta e kategoria ku ta sintá mas serka di mi irritatiezone. Kièrmen esunnan ku mas ta traha riba mi nervio. Asina ku un hende kuminsa reklamá kos sin pia sin kabes o ninga ta propone un solushon pa ku su reklamo, ami ta hala kita!.

complaints

Antes ora ku bo kièr reklamá algu, bo mester haña un hende dispuesto pa skucha.
Awendia retnan sosial ta pone ku hopi por kanalisa nan reklamo sintá nan so den nan stul di zoya ku telefon den man. Djis primi “submit” o  “post” i miles di hende lo mira kiko nan tin di reklamá. Esaki ta asina fasil ku un grupo grandi a hasi’e nan hobby. Bo no por subi FaceBook sin topa reklamo. Yu di tera a bira ta reklamá delaster un kos riba e pida baranka ku yama Kòrsou sin puntra nan mes kiko nan por hasi pa mehora e situashon.

 

Facebook

Taxista ta reklamá bus chiki i bus di turista, pero ta ninga di introdusi un tarifa basá riba meter. Trahado di Selikor ta reklamá ku tur truck ta kibrá pero ninga di bisa ta ken a korenan mane loko i kibranan. Trahado di ISLA ta reklamá ku “makamba”kièr kita nan pan i sera ISLA , pero ta ninga di bisa ku anochi e raffinaderia ta saka e huma ku mas ta daña salú di tur ku ta biba pabou. Pueblo en general ta reklamá ku e premiashon di Tumba no ta korecto i ku hurado a faya, pero niun kara nobo no ta inskribi pa partisipá na 2017.


Key complaints

E uniko momentu ku Yu di Korsou ta baha man na reklamo, ta den e temporada di Karnaval paso e ora ey ta gosamentu tin! Fiesta ta e segundo hobby nashonal.

Ora e YDK poné pa fiesta, nada na mundu no por pare!

Felis Karnaval