Bo parse Haitiano


Dia mi a bin biba Hulanda mesora mi a sinti mi otro. E klima ta hopi diferente, e kultura ta menos amikal, hendenan su aparensia ta otro, diferente tipo di hende ku nunka mi a mira promé. Na Kòrsou bo ta sintibu parti di e totalidat. E sintimentu ei ta hopi menos pa ami bibando aki. Mi a tende ku na Hulanda hendenan ta diskriminá personanan ku ta bini di otro pais. Den e promé lunanan kumi tabata aki mi no a eksperensia esei te ora mi a drenta un pakus. Temporada di friu tabata yegando i mi a tende ku UGG, sapatu un tiki burusí, ta tene bo tenchinan dushi kayente. Nan ta un tiki karu kiermen mi a bai un pakus ku ta basta ‘blanku’, na modi bisa. Mi a bai kue un UGG pa mi puntra un trahado pa mi size, un dje trahadonan mes a pasa kita e UGG foi mi man sin pidi despensa ni nada. Manera ku kier bisami ku mi no por òf lo no kumpra e sapatu. Ami poko di shòk a sali for di eiden i bai kas. Mi a keda pensa un rason dikon e señora a hasi asina. Ta mi koló? Mi a keda para wak e sapatu muchu largu? E tabata tin purá?

Esaki por ta algu chikí pero algun hende ta pasa den kosnan mas pihó. Nan ta yamanan aap paso nan ta ‘pretu’, bisanan si nan no por adapta nan bai nan ‘kutland’ bѐk, hasi weganan deskriminativo. Asta polis sa hasi abuzu ku nos hendenan djis paso nos no ta di e pais. Kasi manera Merka pero danki Dios no ta asina leu ahinda. Tambe hobennan ta keda sin haña stage òf trabou djis paso nan ta ekstranhero. Ta hopi kos bo ta hañabu ta deal kuné djis paso bo ta na un pais ku no ta dibo.

Segun añanan ta bai mi a bin asepta e situashon, pero mi no ta laga niun hende papia kosnan ofensivo kumi paso mi no tin mesun koló òf desendensia ku nan. Mi a asta kuminsa sinti pa tur e ekstranheronan ku ta biba na Kòrsou. Nos tambe ta kaba ku nan. Yamanan tur sorto di kos i tira falta riba nan pa diferente problema ku nos tin. No papia mes di deskriminashon ku ta tuma luga entre nos mes ku nos mes. Ken ta mas skur ku ken, ken tin mas sѐn òf nò. Hopi tiki rѐspѐt nos tin pa otro.

E Dominikana shushinan ei ta kita nos hòmbunan.

Haitiano pretu ku ta hole stinki.

Chino nami un saté ku batata.

E hendena’i ta bin kue tur nos trabounan, yunan di tera mes ta keda desemplea.

 

Bo ta puntra bo mes dikon e hòmbu gusta e Dominikana ei? E Haitiano ku bo ta yama pretu ei mes ta bin limpia bo kurá paso awendia niun yu hòmber no kier para den solo chapi. Chino ta mesun mener òf señora ku e yu’i Kòrsou den bo bario. I no ta paso bo ta miré ku ‘spleetoog’ ta nifika ku ta China e ta bin. Por ta di Japon, Korea òf Filipina. Nan ta asta sintinan mas Kurasoleño ku ami mes. Nan ta hasi tur tipo di trabou paso nan sa kiko ta miseria i ta balorá nan pan di kada dia. Basta nan por haña sѐn pa manda pa nan famia ku tiné hopi mas malu ku nos. Nos ta tenta nan aksѐnt pero nos mester ta kontentu ku nan por papia nos lenga. Nan ta hasi nan esfuerso pa por drenta den kultura. Un ekstranhero su bida no ta dushi ni fasil, ta pesei el a sali for di su pais. Pa buska mihó bida. Esei nos tin ku realisá.

Semper lo tin esnan ku ta hasi dimas, pero ban siña di otro enbes di kaba ku otro. Ekstranheronan ta hendenan ku sa sintinan hopi nan so. Nan no ta na kas. Ami ta un di nan akinan, tin biaha e no ta dushi. Ban stòp ku deskriminashon!

Ku amor,

Richailine Elisa

Advertenties

Auteur: raedreamer

Mi a sali Kòrsou na aña 2011 pa bin studia na Hulanda. Un soñadó mi ta yama mi mes, paso dia mi a sali mi pais mi tabata tin soñonan grandi sin pensa den kuantu kos mi por pasa aden pa logra esna’i. Awor aki mi a lanta fo’i soño i mi kier kompartí mi eksperiensianan ku mas hóben. Realidat no ta asina bunita manera bo ta soñ’é. Mi a kaba e aña aki ku un dimi estudionan kual ta un acteursopleiding, mi ta ofisialmente Aktris. Culturele en Maatschappelijke Vorming ta mi di dos estudio, i esei mi ta trahando riba dje pa kaba tambe. Dos opleiding den un mi a hasi. Ku mi blog mi ke konsientisá hóbennan ku ta bin biba akinan òf ku ta biba akinan kaba. Sí bo no ta bin biba akinan, e blog aki tambe ta pa abo paso mi ta bai toka hopi otro temanan ku por siña òf yuda abo tambe. Pa ami ta hopi importante duna mi aporte na yuda forma nos generashon nobo. Mi no por kambia mundu, pero si mi por yuda mi mes pueblo. Ora bo ta leu bo ta wak hopi kos otro i sigur loke por mihó. Mi stima mi paraiso chikí..

5 thoughts on “Bo parse Haitiano”

  1. Richailine, bo artíkulo ta great i balente. Ora nos papia di establesimentu di relashonnan mas honesto, esta, sin diskriminashon, nos ta papia di un mirada transnashonal, un mirada ku no ta buska diskriminá segun bo nashonalidat òf koló, ma ku tin interes di konosé esun otro, siña huntu i kòmbersá.

    Den nos blòg nos a skirbi hopi biaha tokante transnashonalidat pero e artíkulo https://lasindias.com/las-ventajas-de-la-transnacionalidad aki tin spesial interes den e tópiko aki. Mi ta spera bo por komprendé Spaño.

    Liked by 1 persoon

  2. Juff Elisa mi ta eens ku bo paso mi a biba i studia 8 ana na Hulanda. Un kos si mi ke klarifika. Berdat ku aki na Korsou tambe nos ta deskrimina, pero e deskriminashon ku ta tuma luga aki NO ta basa riba superioridat. Ora e yu di Korsou un tiki bruin deskrimina esun un tiki mas skur, no ta pasobra esun bruin ta sintie superior, pero ta basa riba e tiki diferensha di kolo! Lokual ta logiko, paso hendenan di mes rasa NO por deskrimina otro pa kolo. Bo a yega di mira makambanan deskrimina otro basa riba kolo? Imposibel. Ora e makamba deskriminabo ta pasobra definitivamente e ta sinti su rasa superior na esun di bo. E echo ku hopi Yu di Korsou ta yama e Chines, Chino, no ta nechi, pero no ta pasobra e Yu di Korsou ta sinti su rasa superior na di e Chines. Mi ta garantisa bo ku NIUN Yu di Korsou no ta hana su rasa superior na di Chines. Pues asuntu di yama Chino no ta deskriminashon pero mas bien falta di edukashon. Pues no worry bo kabes ku e supuesto deskriminashon na Korsou, E NO TA BASA RIBA SUPERIORIDAT.

    Liked by 1 persoon

    1. Sorry pero mi no ta si akuerdo. Diskriminashon entre yu di Korsou tambe ta basá riba e sintimentu di superioridat. Berdat tin ku ra gewoon tenta pa ta leuk pero tin tambe kaso nan den kual no por papia di tentamentu mas sino di ofensa i separashon. I asina ta yega tiki tiki na diskriminashon. Pensa riba e mucha ku no k’e hunga ku ‘e mucha pretu ei’, e dama ku no k’e ‘un tata pretu ku kabei duru’ pa si yu, òf e kabayero ku ta ‘mucha blanku ku nètchi forma di kurpa i kabei largu’. Tur esaki ta bin paso esun persona ta haña ku e otro di koló mas skur ta menos nètchi ku nan ku ta mas kla i muchu mas bruhá i dom-verstand ku nan. Pa mi esei ta superioridat.

      Anto sí tin Hulandés ku tambe ta diskrimina Hulandés mes. Korda riba esnan ku ta bai ‘tan’ tur siman i ta yega laman wak esun ku no a ni pasa dilanti di e luga pa ‘tan’ ku kara fis i bisa esun otro ei ku e ta mustra bleek.

      Liked by 1 persoon

    1. Deskriminashon tin rond mundu.
      Paisano ku paisano, bisinja ku bisinja,na trabou etc mes tambe ta tira palabra pa otro of papiele tras di lomba di otro.
      Ami a realisa un kos: Mita laga tur pa Dios, mi forza, mi fe y mi rosea, mita usa pa kosnn positivo. Pami yuinan, mi nietunan y pa tur ku merese.
      Sibo bai sinta stress of pensa, bo salud ta bai atras, di nn ta bai door gewoon sin sa mes kiko abo ta sinti.
      Dios si sa y ta mira, y e dia di aktua tambe tei.
      Mita biba na Hulanda ja pa 33 anja, ma studia y kaba y mita traha dushi sin reklamo. Mi yuinan meskos, Danki na Senjor.
      Dios ta habri kaminda nn ku tnta sera, ta abo mester kuminsa y bota mira kon kos nn lo kana.
      Sibo sinta warda y kana pidi so, lo tin semper un otro pa bisabo of reklamabo algu y e orei bota sintibo malu y deskrimina.
      Mita nace na Korsou y mi stima Korsou.
      Pero mi a forma mi bida aki, te ki dia mino sa.
      Mita bai vakantie kada 2 of 3 anja nami pais natal Korsou, y mita pasa bon, nunka ma pasa malu ni hanjami den kosnn malu.
      Ma gosa y pasa dushi.
      Hiba hopi panja ku sapatu pa esnan ku mester of hina nn misa pa nn ser parti den hende nn menos bon financieramente.
      Mita duna sin spera bek.
      Lomi wordu bendishona otro manera,Dios sa esei.

      Aunke lotin otro hende ku moeite y kisas no a logra hopi aki na Hulanda of otro pais.
      Korda bo balor kubo tin, bo kapasidad ta pa usa.
      Dios a duna nos tur un taak aki na mundu y sabiduria pa usa.
      Sibo use na e manera ku mester ta, semper bota keda bendishona.
      Al kontrario, sibo no hasi uso di dje, semper lo botin algu pa bisa y reklama y sintibo menos.
      Lanta para, lucha y tene bo fe.
      Dios bendishona bosnn tur: Amen.

      Liked by 1 persoon

Geef een reactie

Vul je gegevens in of klik op een icoon om in te loggen.

WordPress.com logo

Je reageert onder je WordPress.com account. Log uit / Bijwerken )

Twitter-afbeelding

Je reageert onder je Twitter account. Log uit / Bijwerken )

Facebook foto

Je reageert onder je Facebook account. Log uit / Bijwerken )

Google+ photo

Je reageert onder je Google+ account. Log uit / Bijwerken )

Verbinden met %s