Top Blog: Mi muhé su kabei duru


Si muhé. No frei, amiga òf mucha muhé. Ta hende grandi nos ta i e ta mi muhé. En fin. Laga mi konta e motibu pa kiko mi ke papia di su kabei. Ya tin un par di aña ku e trènt di kabei natural a hasi su entrada bou di nos mes hendenan. Poko poko pero sigur bo ta mira ménos “weef” i pochinan di “straight” ta pasa over di tonbank den establesimentunan.  Amiganan ta influensia otro i direpente riba un dia bo muhé ta bin kas i bisa bo ku e hasi un “Big Chop”. Esaki ta nifiká un etapa nobo di bo bida komo hòmber.

FullSizeRender14

E famoso Big Chop

Despues di a skucha su desishon bo wowo ta yena ku awa, bo nanishi ku katara i bo ta haña un gana di uriná. E muher ku bo a konosé i kustumbrá ku su kabei kan kan di amoniak òf/ kabei falsu ke basha tur kos abou i kuminsá ku e proseso di kabei natural. Ku un ansha di morto bo ta sinta ward’é bin kas p’abo mira e resultado. Fo’i porta di kurá kosnan ta bai robes. Kachó ta wou, lora no ta kumindá i tur yuana a kore subi palu bai skonde. Bo mes ta kuminsá hik i morde lenga ora e puntra bo kon e la keda: “Mes kos ku un travestí ku a kita peluka!!!” bo ke grita pero pa tene pas bo ta sera bo boka. Sóbadje awor ku e la pela a sali asina un frenta…

Big Chop
Big Chop

Kompra di produktonan pa kabei natural

Hopi hende ta kere ku ora bo tin kabei natural bo ta skapa plaka di bai kapsalon. Al kontrario si tin un tipo di kabei ku ta kosta plaka anto esei ta e tipo di kabei aki. E promé luna di djis pasa un skeiru i un tiki di wax òf gel di hende hòmber ta kambia rápidamente pa hèmber grandi i kostoso di produktonan manera:

  • Shea butter
  • Leave in conditioner
  • Coconut oil
  • Jamaican black castor oil
  • Holy H2O

No puntra mi ta kon mester uza nan paso mi no sa. Un kos si mi sa: ta un buraku formal ta keda atras den bo pòtmòni.

0

Despues di hipotek i fiansa pa outo ainda mester saka un fortuna na produkto. P’esei hopi hende muhé ku e tipo di kabei aki ta vegetariano. No pa nan mes eskoho si no pa e echo ku no ta sobra plaka pa kome karni.

Den dia un flor di kayena i anochi un rama di pal’i indju

Komo hende hòmber bo mester kustumbrá ku den dia bo tin un “natural ebony queen” i anochi bo mester drumi banda di Whoopi Goldberg den e pelíkula The Color Purple. Promé ku drumi mester flèktu e kabei i mar’e den lensu pa sigurá ku mainta e kabei ta sali bunita. No ta importá nan si e hòmber haña pesadia , basta e muhé keda bunita su siguiente dia.

M1daab2420d7792b2e609e0357429598a

Kabei natural versus baimentu di laman (fábula)

Hopi hende ta kere ku un hende muhé kabei natural por bai landa tur ora. Esaki ta un mentira fragante. Mes kos ku ora e kabei ta di “straight” e kabei natural tambe ta kosta hopi trabou pa hink’e bek den un estado ku no ta bai kontra di derechinan humano. Mester bai laman trempan paso ya den kareda di 2 or di mèrdia mester laga lastra pa bai kas i hasi kabei. Ta dura mas o ménos 45 minüt pa lab’e. Si bo tin suerte e muhé por skohe pa hasi un “wash & go” si no simplemente bo ta den krili bo wela. Lo bo keda sinta mir’e:

  • Seka su kabei i wak Scandal
  • Hinka tur tipo di produkto den su kabei i wak Scandal
  • Flèktu e kabei (protective style) i wak Scandal
  • Mara e kabei den un lensu i wak Scandal

En total e la wak 4 episodio di Scandal i bo mester por saka afó ta kuantu ora e proseso aki a dura en total.

1634

En todo kaso. Laga mi stòp di skibi promé ku aktivistanan feminista di fam Sin-Pai bin kou mi. Tambe mi tin asina un lista largu di produkto ku atrobe mi mester bestèl via di internèt pa mevrouw paso kon ku bai bin:

E ta mi pan i ami su keshi, ami ta su “kongflees” i e mi lechi.

FullSizeRender3

Oompie Stroopie