Despues di kuaresma tin “Risibimentu”  


Awor ku Amber Rose a bini te bai no a keda nos nada mas ku sinta warda invitashon pa fiesta di boutismo, primera santa komunion i konfirmashon. Ta rònt mundu esaki ta tuma lugá pero nos hendenan semper ta sòru pa un toke úniko. Aki ta sigui un relato korto di un kantidat di kos ku nos tur a pasa den dje promé, durante i despues di e tipo di fiestanan aki.

Promé ku fiesta

Segun tradishon tur kos ta kuminsá ku búskeda di madrina, padrino , (awendia madrino òf padrina). E idea ta pa haña un hende ku por yuda eduká e mucha si akaso un di e mayornan dal abou hik muri. Ta un lastimá ku nos a desviá for di e idea aki. Awendia nos ta kis madrina/padrino a base di nan forsa pa kumpra bibida, pasapalu i paga banda di músika. Tambe e mester enkargá su mes ku limusin, helikòpter òf djip di Tim di Aresto pa asina su ihá biaha di un forma “safe” pa misa i despues pa fiesta.

Padrinonan semper ta sali mas malu for di e asuntu aki paso nan tin ku kumpra regalo pa e madrina tambe. Ántes un renchi orea di plata, 50 florin na komestibel òf un set di tapeit pa den outo tabata hasi hopi kurason bati duru di alegria. Na 2016 ya tur kos a kambia. Madrinanan ta eksigí entre otro Kia Sportage, biahe pa Dubai, operashon di pechu i “pompis” i tereno na verkavelingsplan Harmonie.

Mayornan semper ke pa nan fiesta ta esun di mihó. P’esei mes nan drenta avion i bula bai Venezuela pa kumpra rekuerdo, Hulanda pa paña, sapatu i hanskun. No lubidá riba e tantísimo kabritu nan ku ta pèrdè misteriosamente den e temporada aki. Kunukero nan ta haña nan obligá ta pega “gps” na nan bestia. Ata nan awor sintá tras di kòmpiuter ta klek riba “find my kabritu”

Na misa

Tráfiko pegá tantu riba suela komo den laira. Fotógrafonan para na rei pa saka potrèt i bòshi “ drone” ta bula bai bin den misa. Unu pa unu ta baha tur mucha for di nan karosa kompañá pa madrina sexy bistí. Tatuahe nan den forma di pata di tiger riba pechu i nòmber di nan promé yu “Shunuelivensjelieson” ta bria riba e kòrsèt di lingerie ku a wòrdu modifiká pa sirbi komo shimis di madrina. Padrinonan ta baha ku telefòn den man, krag di kamisa ta kologá riba nan bachi òf simplemente nan a bini bisti na tishùrt “v hals” i djins. Ku un kara serio nan ta kana pasa dilanti di pastor bisando e: “Se, ki ba hasi anto Saimen”.

Ata no papia di e pober kriatura mes. For di anochi a transform’é den un bòm di makiahe, spreinèt i te di “Badia”. Si antes tabata lanta e mucha for di mardugá pe kuminsá bisti i strika su kabei na stof awe kosnan a kambia totalmente. Ta hinter un tim ta ser kontratá pa hasi e trabou. Na final bo tin un yu ku ora e yega dilanti di altar pober pastor ta kere ku ta kasa e la bin kasa.

Durante fiesta

Helikòpter ta baha riba tereno di gòlf na Sta Barbara Beach Resort & Casino, brantwer ta spùit awa na honor di e yegada i TeleCuraçao ta bai un minüt for di aire. Manera e yu pone un pia riba suela banda ta kuminsá toka i tur hende waiter ta bati man. Na porta tin un señora kara di machete ta tuma regalo. Tur kos ta mustra di ta kanando di forma fabuloso pero den kushina tin bòmbòshi. E señora ku a bin trese batrei, shofùr i pilot ni tampoko doño di banda a haña nan sèn. Anto si nan tribi di eksigí nan plaka, doño di fiesta i su famia kompletu ta baha riba nan. Dilanti, fiesta ta sigui normal ku tur e gatieronan ku a forma grupo pa bin hasi kos di haragan i sinta wak redu pa nan bai papia.

Despues di fiesta

Laman a seka. Drechi pa bo.

 

 

Advertenties

One thought on “Despues di kuaresma tin “Risibimentu”  ”

Geef een reactie

Vul je gegevens in of klik op een icoon om in te loggen.

WordPress.com logo

Je reageert onder je WordPress.com account. Log uit / Bijwerken )

Twitter-afbeelding

Je reageert onder je Twitter account. Log uit / Bijwerken )

Facebook foto

Je reageert onder je Facebook account. Log uit / Bijwerken )

Google+ photo

Je reageert onder je Google+ account. Log uit / Bijwerken )

Verbinden met %s