Baha fo’i mi matris


Nos ta biba den otro un tempu. Tempu kaminda traha famia no nesesariamente ta un prioridat. Un tempu kaminda material ta mas importante ku humanidat, kaminda no mester kasa pa ta ku e hende ku bo ke. Un siglo kaminda hende a kuminsa stima bestia mas tantu ku hende mes. Tempu ku teknologia den frakshon di sekònde ta keda kambia. 24 ora ta parse manera no ta sufisiente mas. Nos mester di mas. Dekada kaminda kontakto físiko ta sinti manera no nòrmal. Siglo kaminda hende muhénan a modernisá i no tur ta ama di kas mas. Prioridatnan a bira otro.

Proménan aya ta wòrdu sperá di bo ku na edat di 25 aña ya kaba bo mester ta un mama i ku bo mester tin un kasá. Abo mes komo persona su soñonan no tabata masha importante, esaki ta mi interpretashon mihó bisa. Ta manera hende muhé tabata tin un trabou so: kria yu. Awendia ta totalmente otro. Muhénan ta traha mes òf mas duru ku hòmber, nan mes por drecha kos na kurpa di un kas i nan ta wak mas tantu pa nan mes. Hende muhé a kuminsa disidi pa nan mes awor. Nos tambe tin derechi di disidí riba nos bida. E ta zona un tiki feminista pero e ser muhé a kuminsa sali pa nan derechinan i mustra ku nan por para riba nan mes pia.

Kosnan ta asina avansá ku si un muhé kier un yu,  no nesesariamente e mester tene relashon ku un hòmber. E por bai un ‘spermabank’ i skohe kua tipo di spѐrma e kier. E por skohe e kolo, rasa, kabei ku e kier pa e yu meskla kuné. Tambe si e kier satisfase su mes e por wak un vibrator (dildo). E hende muhé por yuda su kurpa riba diferente tereno. Naturalmente no ta tur hende muhé ta di akuerdo òf lo hasié pero awor aki nan tin mas opshon.

Awor aki ku bo ta den bo 20 piku yegando 30 i no tin yu ahinda hende ta wak bo straño. Òf henter ora bo ta haña e pregunta: ‘ki dia bo ta kuminsa traha mucha?’. Tambe e hendenan ku ta kasá un par di aña kaba i no tin yu ahinda nan ta puntra: ‘ta ki bosonan ta warda anto?’. Tin hende lo komentá ku ta haña e muhé no por haña yu òf ta e hòmber ta impotente, sin buska drechi. Mi ta puntra mi mes si ta ku nan kos di traha mucha mi ta kana kuné. Hende tin ku baha for di matris di hende. No ta asina asina ta traha mucha shonnan. Promé ku traha mucha mester tin manera pa kria tambe. Mester ta un tiki stabil pará den bida. Tantu mentalmente komo finasieramente. No ta pa loko kosnan ta bai.

Hende su prioridatnan a kambia.

Nos tin hopi preshon riba nos pa funshona den e komunidat aki. Di tur banda e ta bini. Tur ora tin hende ta spera algu di bo. Bo mama, bo trabou, bo pareha, bo amigunan, asta bo mes. Prokrea no ta na number unu riba tur hende su lista mas. Logra metanan, gana sѐn i tin un bon trabou a bira hopi importante. Loke a kambia hopi den tur esakinan ta, ku muhé ta traha pa nan pan di kada dia sin nesesariamente mester stѐns riba hòmber. Difinishon nobo di ‘pal’i muhé’. Tin hòmbernan ku gusta e muhénan aki un mundu. Otronan gusta esnan di ántes.

Si bo ta sinti ku bo ta kla pa traha un famia, hasié. Si no ta asina, warda masha trankil. Tin ora preshon di afó ta pone bo tuma e desishonnan purá ku despues lo bo haña duele. Bo prioridatnan no mester ta meskos ku tur hende. Un bida bo tin, bibé manera bo ta sinti ta bon pa abo. Pa niun hende mas!

Ku amor,

Richailine Elisa