Djis un tiki bomboshi


No ta un sekreto ku nos pueblo ta stima un bòmbòshi. Aunke tin hopi ta bisa ku NO mi sa ku den sekreto nan ta gusta un tiki tòg. Bo skucha un lantamentu di bos, un aglomerashon di persona òf poko gritu ta zona ja kaba nos ta drai kabes òf bai den e direkshon pa wak kiko tin.

Na Kòrsou  bòmbòshi ta kana sam sam ku redu, hopi bia no basa riba bèrdat pero hei ken ta wòri basta unu por kana plama i otro haña sa kiko esun a laga sa! Ta forma e ingrediente perfekto pa harma un bon bòmbòshi.

Mi ta kòrda ántes kos por a bira kayente lihé. Mane mi ta kòrda un bisiña ku ta gusta wak den kas di hende, a mira Sonaida un mama soltera kologá dos djòki pafó. Ta un pasa te na e otro waya e la bai pa hiba e bon nobo ” Gladys yu ma mira Sonaida a kologá algun djòki size poko grandi ei…. ta pai e la haña òf ta hòmbu di hende e ta hois kune?  Sin perde pa gana Gladys a bai jama Sonaida bise kiko a sosode i kiko bisiña a laga sa. Sonaida dimes ku no ta tuma ta sali pafó harma un gran eskandalo paso Gladys a bai laga sá ku ta hòmbu di hende e ta hòis kuné.I naturalmente kos a bira un bòmbòshi . I kaminda tin bòmbòshi…. dimes tur hende tei mane batrei na kasamentu pa nan no pèrdè nada.

Pero den 2016 aki kos a kambia…

Lamentablemente  bòmbòshi nan ku tabata ser harma den bario, Punda, Kapsalon i tin bia asta na entiero, a muda bai e tan famoso Facebook. Pa hasi e kos pió, si ántes e tabata bai kara kara awor kos ta bai “anomino” via di inbox di otro persona (saludo pa Oompie Stroopie) òf pagina di Facebook nan netamente pa esaki, pa nan ser publiká. Nòmber nan ta ser benta, tur paña sushi ta serka saká riba Internet i tin bia asta portrèt i video nan ta ser mandá pa hasi kos mas “Hot”. Bo ta ripara tambe ku e tipo di pòst nan aki ta haña masha hopi reakshon den tempu record i mas bulgar nan ta, ta mas nos ta gusta.

Un di nan sin duda ku ta domina awor aki ta e tan famoso Solange, mi ta ripara ke drama di Solange aki a haña mas ekspetadó ku e tan famoso novela ku bo por a wak via PPV poko tempu pasa ei. Pa es nan ku no sa kiko mi ke men, ata aki un resúmen korto. Un persona a laga sa ku Solange a hòrta marí, ora nan a bende Solange su yerba, Lisette a bin defendé su asmiga kaba pa pone chèri riba e bolo un polsje a.k.a Brendita a bin laga sa lo siguiente

E Bòmbòshi kuenti publiká problema ku nomber ei si, mi no ta hasi. E pober guy di Solange ku Lisette ei mare mi por hañé. Nunka mas e lo bai serka niun dje dos “Tostones” nai. Paso e kos ku mi lo hasi ku ne ei, e no tin nad’i bai hasi mas.

Bon ta haña… Ke men ora nos a kere hende por a bin bisa algu den chikí via inbox, kos a harma bira un tángana online di kual tin mas expektadó ku hende riba plasa Brion pa habri aña nobo!

Mi tin gana di sa ta kiko ta “prikkel” nos pa por sigui tipo di akontesimentu nan aki ku no ta yuda nos ku nada. Òf haña e kos great pa lanta mainta kue nos smartphone i desayuná ku bòmbòshi manera ta pan di Libanesa.

Wèl si un di boso sa, laga mi sa!  paso mi a skirbi tokante bòmbòshi pero mi ta atmití honestamente. Mi tambe ta stèl mi popkorn pa wak kon e novela aki di Solange lo kaba.

Paso mi tambe ta stima un pida bomboshi!  140228-utah-new-mexico-bball-brawl-1234-01_9211c7fcab05cae962617e4ec3d423fe.nbcnews-ux-2880-1000