Mi a “flip the script” riba nan

Source: Straitstimes.com

Aki na Singapore un auto ta masha karu mes. E plachi number so ta kostabo alrededor di 75mil dollar pa 10 aña. Despues di 10 aña bo tin ku kumpra un nobo of hiba bo auto sloperij. Esey ta pone ku di baina bo ta mira un auto model 2005 riba kaya. E pueblo ketu bai tin asina tantu pa gasta ku agensia nan di auto ketubai ta bende nan modelnan manera pan kayente.  E otro un banda di e medaya ta ku gobierrnu a soru pa transporte publíko ta bon reglá ku bo no mester di un auto. Bus ku trein ta yega delastèr un bario. E opshon aki ta mucha mas barata tambe.

Otro opshon ku ami ta huza basta regular ta taxi. Tin biaha ta pa flohera otro biaha ta paso un taxi ta e opshon mas kumbiniente. Ki tin mas mihor ku un hende buskabo na bo porta di kas i bahabo den porta di happy hour? Asina ku bo drenta taxi akinan e taxistanan ta kumindá i buska moda pa hiba kombersashon. Ta keda na ami si mi kièr papia o keda ketu. Dia ku mi no tin gana di kombersá, mi kontestanan ta korto i será. Pero mayoría biaha mi ta entretene nan i nan ami. Paso ta un grupo di hende sa tur e “ins & outs” nan di e país aki. Taxista.

Den taxi na Singapore mi a siña di spera tur tipo di pregunta. Di kua país den Afrika bo ta bini?, kuantu tempo bo tin akinan?, unda bo ta traha?, Kuantu sen bo ta gana? bo tin yu?, kuantu yu bo tin?, kuantu bo ta paga pa skol pa nan?. Niun topikó no ta off limits. Ta masha normal pa un taxista puntrabo kuantu bo ta paga na hür di kas. Pret ta ku na ta bisabo tambe si bo ta pagando dimas of no. Tambe kiko bo tin ku hasi pa paga menos. Ata ora nan tende ku bo tin paspoort Hulandes, e topíko ta bira futbol mesora. Kon bon Hulanda ta, pero tambe kon mala suerte nan tin. Mi a siña mas di “totaal voetbal” akinan ku mi a siña durante mi tempu na Maastricht.

Tin biaha mi ta “flip the script” ribanan i kuminsa basha nan ku pregunta. Puntranan kiko nan ta pensa di e expatsnan biba akinan. Kuantu sen nan ta gana koriendo taxi, ken tabata nan pasahero mas gustá o si nan ta felis kasá. Mi kasa ta muri di bergwensa ora mi hasi esaki anto ami ta hari mi morto! Hopi biaha e tripnan aki ta resulta den e mihor kombersashonnan i un mira den bida di e hende lokal. Ata un historia ku mi a yega di tende aki.

Mi ta kore taxi pa evita ku mi tin ku skucha mi kasa kanta henter dia. Mi señora ta un artista lokal. E tipo ku ta pone concierto den buurtcentrum, praktika na kas pero nunka lo gana The Voice.  Tempu ku mi tabata traha, mi tabata lanta mainta trempan i sali kas net ora ku e kuminsa kanta den “warm up mode”. Poko poko su volumen ta bai haltu pa merdia e ta yega i terminá den su “tuning up mode”. Mi kasa tin bunita bos, pero pa tende e mesun kantikanan den su bos tur mainta i tur dia di siman a bira dimas. Pesey mi a disidi di bai kore taxi tur mainta. Mi ta sali marduga tira dos tres kareda, kaba pasa desayuna, lesa korant trankil pa después mi sigui. Tra’i merdia mi ta bai kas bèk.”

 

Felis Djamars!

Pic source: Straitstimes.com