Asina bo ta hasi na kas? Porko!

source: caribischnetwerk.ntr,nl

Kòrsòu tin un bida nokturno hopi aktivo. Tur hende sa esei. Dushi hende nos ta tòg ?

Baña, bisti i sali kas mane keke. Baila, wak redu, hasi redu, kome, bebe. Tur esei ta parti di e estilo di bida riba nos isla. Nos hendenan sa kon pa kore bon un paranda.

Hopi biaha e anochinan aki ta keda klousurá ku un bon truk di pan. Fiestero i paranderonan ta baha bin kayente kayente pa nan karko of lomitu ku batata.

Anto laga nos no hunga ròl. E basilon despues di e tremendo “road” hopi biaha sa kaba na laman. Einan bo tin e oportunidat pa sinta den òuto i den tur trankilidat kome bo kuminda, bebe bo kos di bebe i kombersa ku bo mari òf ta esun di hende. Dushi bida nò? Riba un dushi isla tòg ?

Pero kiko ta pasa ku tur e ;

Fòrki, baki di foam, fapel di fòil, kùp, bòter di serbes, bòter di limonada, wesu di galiña, wesu di spareribs i kòndòn ku nos pueblo ta deshasi di dje na un manera ilegal i iresponsabel ?

Tin baki di shushi rònt Kòrsòu. Spesialmente na tur laman. Kiko ta e motibu pues pa habri bo bentana òf porta di òuto, benta e kos ku bo a kaba di huza ei riba kaya i sigui ku bo bida manera nada no a kaba di pasa?

Ta un muestra real di komportashon asosial e kos aki ta. Puru kos di hende brua mihó bisá. A kaso bo a kere ku e ta disparse asina asina ? Di su so ?

Semper mi mama a siña nos pa warda tur shushi i tira nan afo ora bo yega na un konteiner òf ora bo yega kas. Si niun hende no piki e shushinan ku ta wòrdu tirá riba kaya nan ta keda keiru pa años largu hasiendo daño.

E pipa ku bo a huza pa bebe limonada ei : bo a kòu e tanten bo tabata piropia un galiña ku masha dia bo tin bista riba dje, pa despues bo bent’é abou pa bo hala serka di e galiña. E por kòusa bastante desgrasia den naturalesa.

bird-trash
source: http://www.petfinder.my

E tiramentu di shushi estilo PORKO aki, ku ta pasa den dia tambe por sierto, ta hasi daño no solamente na nos naturalesa, pero na hopi kos mas ;

Nos imagen di “paradeis” òf “Perla di Karibe” tambe ta kambia si nos isla ta fis. Niun paradeis no ta shushi. Nunka b’a mira of tende di paradeis dòrná na boter di Zulia, kaha di KFC i wesu seku di spareribs antó?

No lubida ku tanten bo ta huza “snèpchèt” riba yate di bo “best frend” mustrando tur hende kon master e serbes friu ta dal den solo kayente, un turtuga ta stek den awa bo tras den e plèstik di bo six-pack.

turtuga
source: http://www.thepetitionsite.com
Tur esaki por afekta nos turismo di un manera negativo i al final nos ekonomia tambe.

Ba mira si kuantu kos un akto di PORKO por trese ku ne ?

Mayornan, siña boso yunan norma i balornan ku ta aporta na un miho Kòrsòu tambe.

Kuantu kos pa bo tene nos isla nechi i òrdènt?

Stop di tira shushi pa loko riba kaya. Si bo no ta hasi’é na bo kas, no hasi’é riba kaya tampoko !!

Kordialmente,

Nicole