Oost west, Thuis ….. part 2


Sintá den avion ku rumbo pa Singapore mi a saka mi lista di kos ku mi kier a logra den mi 10 dianan na Kòrsou. Mayoria mi a logra, pero tòg tin kos ku mi no a alkansá o hendenan ku mi no topa pa kòmbersá. Di otro banda mi a hasi kosnan ku mi no a spera di hasi den e periodo kortiku ey.

Un di e puntonan ku mi a palabra ku mi mes tabata pa no kompara muchu pero mas bien opserva sin husga inmediatamente.

No tin duda ku Korsou tin hopi problema pero ta e kontradikshonan a resalta mas den mi opservashon.

Na yegada na Hato, imigrashon ta lagabo sa ku siguiente bes abo y bo yu mester pasa na e bali di “residence” pero bo kasa si no mag pasa eynan. Aunke tur tres tin e mesun pasport y más ku 15 anja sin ta biba na Korsou. E echo ku imigrashon por a yuda tur tres tòg ta indika ku e distinshon no ta nesesario. Alkontrario na bo banko amigu nan kier kita % for di bo kuenta nobo tur luna paso bo no ta “resident”. For di bo kuenta bieu si nan no ta kita nada paso esey ta habrí tempu ku bo tabata “resident”. Ta logika di amigu o ta ladonisia di amigu ta tumando luga asinaki?

Mi a skucha amigunan ku ta para dilanti klas (skol basiko y avansa) kon mas y mas nan tin ku dil ku muchanan ku problemanan di komportashon y di mal nutrishon. Konosinan den sektor di kuido a splikami ku rapidamente edad di pashèntnan ku problema diabétiko severo ta bahando. Ora dies pasá di shete mainta, un polis ta drenta panadería di banda (pa motibu di su gordura) y pidi un “ham and eggs” ku tur kos ariba, pika tambe, un webu herebe y un boter di Coca Cola. Terminando ku “mi tey warde den auto dushi” mi a kompronde tur kos mesora.

Mi a mira kon bunita e stèntnan di bende souvenir entre Riffort y Plaza Brion a keda riba e día ku ta tin barku krusero ña mega pir maske no ta hende lokal ta bendiendonan. Un día después ora e barku a bai bo por a mira kon fruz y sin kolo e mesun stentnan ey ta. Pa kolmo para na pía di brug rek wak den bahía y mira hopi fruta bieu, saku de plèstik, kaha di karton y asta tayer ta drif bin pega den e huki entre brug y hotel Otrabanda..Mi ta puntra mi mes “Si ami a mire, bo ta kere e turista a merele”? Mi no kier sa mes kon e situashon rondo di e barkunan di fruta lo ta.

Mi a keda enkanta kon kareteranan a keda después di renobashon. Mi a presensiá un presentashon di jazz tremendo den e área di Riffort.  Di otro banda den Punda ta yora so mi no yora di berguensa kon shushi y bashi e kayanan ta. Merdia den plaza tabata basta sukú y kasi no ta tin sirkulashon di airu fresku. Danki Dios ta kabes den tayo mi tabata paso si mi lo a wak e plafòn adelanta mi ta duda ku mi lo a kome eyden.

Un otro kos remarkabel ta ku di tur e kamindanan ku mi a frekuentá, ta na Banko, Plaza, Mensing Caminda y Pops Place na Caracasbaai so yu di Kòrsou a dunami servisio. Un tremendo servisio por sierto. Tur otro kaminda tabatin un of más estranhero ta traha. Nada kontra esey solamente mi ekspektativa tabata di topa mas yu di Kòrsou laborando. Mi a mira e yu di Korsou si,.. na porta di Toko Chines, hungando domino na e luga di taxi na plaza Brion, sinta den fresku na luga di laba auto, sinta bou di palu banda di barberia diskutiendo resultado di firmamentu di lista. Tin di nan mi a mira 10 dia tras di otro te ku mi ta sinti nan falta awor aki.

Ku asina tantu hende sosegando for mainta trempan te anochi ta kon e País ta bai dilanti?.

Aunke mi estadia tabata kòrtiku, mi ta kontentu di por a mira, tende y eksperensiá kon e situashon na Korsou ta. Mi ta konvensi ku e país ta un dushi luga i tambe ku awor mas ku nunka mi mester sigui duna mi aporte na mi pais maske kon chiki mi granito ta kompara ku grandura di e problemanan.

Awor no ta e momentu pa entrega!.

Advertenties

Auteur: Endilo Lourens

Un Yu di Kòrsou biba na Singapore ku for di e punto di bista personal lo kompara e situashon di Singapore ku esun di Korsou indikando di un manera positivo e lesnan ku Korsou por siña y ehekutá pa drecha e kalidat di bida di Dushi Kòrsou.

Geef een reactie

Vul je gegevens in of klik op een icoon om in te loggen.

WordPress.com logo

Je reageert onder je WordPress.com account. Log uit / Bijwerken )

Twitter-afbeelding

Je reageert onder je Twitter account. Log uit / Bijwerken )

Facebook foto

Je reageert onder je Facebook account. Log uit / Bijwerken )

Google+ photo

Je reageert onder je Google+ account. Log uit / Bijwerken )

Verbinden met %s