Hipokresia di tur dia

source: www.boasnovas.tv

Un bon bini kordial na e sertamen di hipokresia kaminda diferente realidat lo wòrdu revelá i tambe kaminda respèt i admirashon pa esnan respetá den komunidat lo somenta.

Un aplauso pa partisipante number 1, Graciela. Mucha di pariba, lantá den un bon famia. Graciela no a kaba skol pero tòg a logra yega na un puesto haltu den gobiernu. Orguyo di su wela. Su famia no sa ku ta ku aktonan inmoral el a yuda su kurpa pa e por a e haña puesto i tambe promoshon.

Den tur su gloria el a kònkel kos i kue plaka ku tabata destiná pa proyektonan di hubentud i traha su mansion kant’i playa. Naturalmente nada un bin afó.

Elokuensia ta e regalo di mas grandi ku bida a duna Graciela. E por papia asina bunita i saka su mes for di tur kos. Asta hues el a logra haña na su fabor.

Partisipante number dos ta Tio Lukas. E kompader aki ta sirbi misa tur djadumingu sin falta i tambe ta duna lès di katisashi. Un hòmber di bèrdat dediká na misa i supuestamente na Dios tambe.

Remarkabel ta ku sierto di e muchanan, prinsipalmente esnan hòmber, no ta gusta bai lès pa motibu ku nan no ta komodo banda di tio Lukas. Maikel si a tuma kurashi i konta su mama ku tio a sunchi su pimpilinchi pa fria su doló dia ku Andres a dal’e skòp eibòu sin ku e por a yuda.

Sen a sali for di  un ke otro pòt di organisashon i finansia tur kos pa Maikel a kambia skol den silensio. E silensio di Maikel su mama tambe a keda pagá for di e pòt aki. Tremendo oportunidat pa hasi un selebrashon ekstravagante pa su risibimentu.

Por lo resto, tio Lukas sa bon kon pa tene su postín manera esun di un santu i resa rosario sin pèrde rosea.

Nos ultimo partisipante ta jufròu Van Dijk ku ta duna kímika na un skol HAVO/VWO renombrá i privá. Un dams yòng, bon studiá i tambe bon kuidá. Alumnonan sa duna komentario ku regularidat tokante su k’oi sinta.

Bon, manera semper tin algun alumno ku difikultad pa haña un bon punto. Jufròu Van Dijk, ku tur su kariño i amor, ta ofresé splikashon adishonal asta na e alumnonan di otro klas. Numa ta parse ku ora Jay keda durante pausa pa yudansa, ta un otro kímika ta keda diskutí. Jay a kaba di hasi 18 aña, kiermen juf por habri afó sin preokupa ku hustisia lo persigui’e.

Apesar di juf su gusto pa gai chikí, e ta duna lès masha bon mes. Semper e ta kla pa yuda i a asta keda koroná komo dosente “role model”.

zazzle.fr
source: http://www.zazzle.fr

Ganador absoluto di e sertamen aki ta plaka i tambe nos falta di dominio propio. Ta hende nos ta. Bèrdat. Un espesie animal nos tambe ta. Nos tambe tin nesesidat. Pero parse ku nos a kuminsa ta laga nos abilidat pa rasona un banda. Plaka i sèks tin nos komunidat, tantu hòmber komo muhé, ta komporta nan manera poko animal salbahe. Subi, baha i mata pa ami kome. Pero ya…. Manera Gentz di “min por warda mas” i bo ta “perde ku nes” numa… Ta un biaha so bo ta biba tòg?

Esakinan ta 3 ehempel fiktívo pero kopiá for di e realidat di tur dia riba nos isla pero tambe den mundu henter. Hipokresia a penetrá den polítika, religion i tambe edukashon. Integridat ta pertenesé na pasado i honestidat ta parse di a bira algu chapo.

Si bo ke bo ta hasi malu, ta Dios so por huzgabo. Pero no lubida riba Mama Karma. She’s everywhere.

Saludos,

Nicole