Muhé marka kabei falsu


Ami semper a lanta mira hende muhé ta pone pida kabei falsu pa kambia nan stail di kabei. Den mi famia mi no a mira esaki ta bin hopi dilanti pero sí tin di nan ku ta hasié i no gusta nan mes kabei manera e ta. Nos hende di koló no a kustuma mira nos mes ku nos kabei krus. E pensamentu Oropeo ku muhé blanku kabei las ta bunita, nos a kue tene duru. Esaki ta bin di hopi aña kaba bin abou te awor aki. For di chikí ta kue e mucha muhé ta straight su kabei paso no por atende su kabei duru. Òf ta peñé flѐgtu òf gueni. Tambe tin di e mamanan ku ta peña e yu yen ‘kachu’ ku ta keda tira tur banda. Nos no a siña kon trata nos kabei. Nos mamanan tampoko.

Awor aki kosnan ta kambiando i nos a kuminsa stima nos mes manera nos ta ku tur e kabei duru ku mester yen produkto. Pero ahinda nos falta hopi mas pa bai. Ami mes tin kabei ‘krul’ ku semper mi a skѐiru, peña saka tur e krulnan mata tur mi kabei. Awor na grandi aki mi a bin siña serka un eksperto,  ku mi a haña riba mi kaminda, i e interes ku a lanta serka mi dor di wak yen video riba internѐt. Lastu mi a disidi ku mi kier pone Marley Twist pa protehé mi kabei. Mi a mira par di potrѐt riba internѐt i lesa tokante di esaki hopi, promé mi a tuma e desishon di bai hasié. Asina mi ta sintá den otro. Mi no tabata sa ku abo mes mester kumpra bo paki di kabei i despues bai serka peñadó kuné. Ata mi awor ta kana buska luga di kabei falsu pa puntra. Mi a keda mustranan e paki kabei riba mi telefòn te ora mi a bin hañé. Henter un mundu a habri pa mi. Henter e rѐki mi a kumpra paso ta basta kabei mi tabata tin mester.

Ora mi a drenta e luga diferente muhé a keda wak mi ku wowo straño. Ami mes tabata sinti mi straño paso nunka mi a pensa ku lo mi a drenta luga di kabei pa mi wak kabei pa mi mes. Mi no por splika masha bon kon mi tabata sinti. En todo kaso mi a kumpra mi kabei i bai kas. Hopi dia mi a keda ansioso pa sa kon lo mi keda ku un otro stail di kabei. Dia a yega mi a peña, sinta oranan largu i mi a keda hopi kontentu. Pero si mi mester kustuma ku e idea di tin kabei falsu riba mi kabes plùs e drumimentu e promé anochinan tabata hopi malu. Kabei ta muchu strak. Ademas mi kabei mes ta ‘krul’ kiermen nan a brua kaba den e mesun siman ku mi a hasié. Tabata great pa eksperimentá pero mi ta kere ku awor en adelante mi ta keda ku mi mes kabei manera semper.

Dor di e eksperiensia aki mi a haña hopi rѐspѐt pa muhénan ku ta pone peluka, weave, kabei falsu riba nan kabes. The struggle is real! Paso:

  1. Si ta peluka bo tin bo ta tapa bo kabes full di moda ku e no ta kue hairu. E kos ei por mùf i grawata masha kruel mes.
  2. Weave ta laga bo keda bati kabes manera ta sarna bo tin den kabes.
  3. Kabei falsu ta strak i ta laga bo keda manera ta kara bo a bai trѐk i tambe ta grawata.
  4. Bo no por laba bo kabei regular kiermen bo kabes no ta haña un alivio den largu tempu.
  5. Ta MASHA SÈN muhé mester saka pa mantené e kabei nan aki. Keda kumpra kabei, paga peñadó.

Mi por bisa tambe di e muhénan ku no ta tene e nan kabei pero esei ta bira otro blog. E benefisio di pone kabei falsu ta ku bo por keda kambia modѐl. Ku bo mes kabei bo keda kòrta kambia stail ta dura años pa e por krese. Ademas no ta tur hende su kabei ta krese lihé ni bira largu. Muhénan marka kabei falsu: I SALUTE YOU!

 

Ku amor,

Richailine Elisa