Dikon pueblo ta keda kere den webu di Gai?


Kampaña di elekshon 2016 ta den full swing. Papia o hasi algu inteligente klaramente no ta e ambishon di hopi ku ta partisipando. Ta parse ku mas koi bobo o for di sla nan papia mas eksito elektoral nan tin. Durante mi fakansi na Kòrsou hopi famia i konosí a puntrami kiko mi ta pensa di elekshon. Nan sa ku mi gusta e siensia di politika. Pero e nivel di politikeria aktual na Kòrsou si a pasa mi forsa i mi a opta pa keda leu i ignora elekshon mas tantu ku ta posibel.

Pa goberná un pais di 150 mil hende (kada unu ku nan mes nesesidatnan) efektivamente ta sumamente kompliká. Tin muchu faktor pa konsidera. Esaki ta hasi e materia i mensahe imposibel pa splika na plaka chiki den un korto tempu. Pa esey mes personalidat di e polítiko ta resaltá mas ku lokual e tin di bisa o para pe. Asina elekshon ta bira un sertamen di popularidat.  Mas un polítiko bende su mes, mas e grita loke hopi kìer tende enbes di splika su plan pa ku futuro di e pais, mas voto e por skor.

Loke no ta tumando luga ta e dialogonan tokante tópikonan di importansia pa futuro di Kòrsou. E pais ku nos tur lo muri bai laga atras pa nos yunan i nan yunan. Tópikonan manera; ki tipo di pais nos kier laga atras pa futuro generashon, konta bai hasi ora venesolanonan kuminsa bin buska refugio na Kòrsou, kua strategia ta bai ehekutá pa strukturalmente baha desempleo bou di hoben? Kon ta bai kubri e gastunan astronómiko di salubridat públiko den futuro? Kon ta garantisa ku kalidat di bida di e yu di Kòrsou lo krese den futuro? Kiko lo bai pasa ku Isla despues di 2019? Kon lo adaptá nos sektor di turismo ora Cuba kaba di habri su portanan? Un pais ku no ta pensa riba su futuro ta destiná pa frakasá.

Tin diferente rason pakiko nos ta fadá ku polítikonan na Kòrsou. Durante kampaña tin masha positivismo. Ta parse ku ni maske kon abou pueblo tene su ekspektativanan tòg polítikonan ta sabi di desapuntá sin importa ku nan a keda den e partido biew o nan a lanta unu nobis nobis yená ku karanan konosí.

Dikon pueblo ta keda eliginan sabiendo ku lo bai tin desapunto?

Ata mi prome 5 motibunan aki.

  1. Paso tin polítiko ku ta eksitoso i riku den nan bida priva. Ya ku hopi hende ta keda impreshona ku kèsh sin puntra to di unda e sen a bini. E echo ku un aspirante polítiko tin sen no ta bisa nada kon e lo anda ku sen di pueblo. Hopi no ta mire asina.
  2. Paso tin polítiko ta primintí eksaktamente loke pueblo kìer. Sin ku nan por splika kon ta bai logra/finansiá esey. Paso nan sa ku mayoría lo no kuestioná tòg. (por ehempel: hisa minimumloon)
  3. Paso tin polítiko ta huza e rabia ku ta biba den komunidat. (por ehempel: Mandanan bèk den body bag) Rabia ta peligroso pero ku rabia bo por skor voto bon.
  4. Paso pueblo a entregá i ta kere ku e siguente lo ta mihor. Ora un polítiko desapunta enormemente, kualke otro den su banda ta parse defuntu Nelson Mandela. Un persona no eduká lo no kompronde ku e no ta haña nada di resultado después di elekshon.
  5. Paso hende korupto mester di polítiko korupto. No kere mes ku tur hende ta di buena fe. Un parti grandi di pueblo gusta i kìer traha plaka di un forma inlegal. Pa nan un polítiko korupto ta e mihor opshon.

Kòrsou mester di un reality check prome ku fin di luna aki !

 

Advertenties

Auteur: Endilo Lourens

Un Yu di Kòrsou biba na Singapore ku for di e punto di bista personal lo kompara e situashon di Singapore ku esun di Korsou indikando di un manera positivo e lesnan ku Korsou por siña y ehekutá pa drecha e kalidat di bida di Dushi Kòrsou.

One thought on “Dikon pueblo ta keda kere den webu di Gai?”

Geef een reactie

Vul je gegevens in of klik op een icoon om in te loggen.

WordPress.com logo

Je reageert onder je WordPress.com account. Log uit / Bijwerken )

Twitter-afbeelding

Je reageert onder je Twitter account. Log uit / Bijwerken )

Facebook foto

Je reageert onder je Facebook account. Log uit / Bijwerken )

Google+ photo

Je reageert onder je Google+ account. Log uit / Bijwerken )

Verbinden met %s