Mami ta serka Dios

source: www.admepics.com

Kumbai mami? Mi tin yen kos di konta mami. Papa a bisami pa mi skibi nan i nos ta pòst nan pa Dios duna mami nan.

Oma a kontami ku ta hende ku ta bon hende só por bai den shelu serka Papa Dios. Tio tambe a bisami ku mami ta un angel. Un angel maron bunita. Ta mami ta mi angel wardador?

Awe skol a kuminsa atrobe. Mi gusta bai skol mami sa? Na skol tin hopi mucha pa mi hunga ku n’é. Pero ta Luna ta mi mihó amiga. Mañan mi ta hasi aña i mi ta bai parti bolo huntu ku Luna i Kesha.

Ang anto mi yufròu nobo yama yufròu Maartje. E ta masha lif mes. Awe el a duna nos tur mangel i steker.

Djasabra mi ta bai parke di bestia ku oma i papa. Tanchi Ana tambe ta bin un ratu ora e sali trabòu. Semper tanchi Ana ta kontami di lokenan e ku mami tabata hasi huntu. E ta bisami ku mami ta stimami hopi i ku maske mami ta den shelu, ainda mi ta mami su pretu di wowo.

Promé mi no tabata kompronde kiko esei ta nifiká. Pero papa a splikami ku ora bo ta pret’i wowo di un hende, e hende stimabo mas ku tur kos. Papa a bisami tambe ku mi mester hasi mi best na skol pa hasi mami orguyoso di mi.

Tin dia mi no ta kompronde dikon ta nèt ami su mama mester a bai serka papa Dios paso mi ta sinti mami su falta.  Ta bèrdat ku ta un previlegio pa ta un angel? Mi ta purba si di no rabia ku papa Dios paso mama ta serka dje. Papa ta bisami tur bia ku nos mester ta kontentu ku papa sí tei ainda. Eigenlijk mi ta kompara mi mes ku mi amiganan pero no ta bon. Porta nan no tin un papa manera esun di ami. Mi mama ta esun di mas master na mundu! Tur kos mi ta konta papa tambe.

 Mami mi a kansa di skibi. Mi ta pidi papa manda un potret di mi shimis nobo huntu ku e karta aki bon?

Kòrda sigui kuidami. Kuida Luna i Kesha tambe bon mami? Anto si mami por, pidi Dios un baiskel pa mi.

 Mi ta stima mami masha hopi mes.

Melania.

pinterest
source: http://www.pinterest.com

Imaginabo un mucha di mas o menos 8 aña ku a lanta sin su mama. Kiko su tata lo siñ’é? Kon su famia lo mester splik’é? Tur kos ku kautela paso niun hende no ke dañ’é.

Ku doló i duele den nos kurason, tur hende ta lamentá e asesinato inesesario ku a tuma lugá den punda. E tabata un shòk grandi pa nos komunidat, prinsipalmente mirando ku e suseso a laga mas ku un viktima atras. Unu ku a bai laga nos mundu, i hopi ku lo keda den un lucha kontra nan doló riba e mundu aki.

Lamentablemente no tin ningun manera pa sigurá nos pueblo ku algu por estilo lo no ripiti su mes. Parse manera nos isla ta birando un kampo di bataya kaminda ta buska kuenta pa regla sin para ketu i pensa. Awendia ta hasi esaki den publiko tambe. Pues hende inosente ta sufri konsekuensia di un wega di machu. Un wega kaminda tur hende ke tin e último palabra.

Di kurason mi ta desea tur famia i amistat di e dams aki forsa. Forsa pa lanta ariba un dia i sigui wak dilanti. Forsa pa podise un dia boso logra pordona esun ku a kita boso alegria. I tambe forsa pa siña e kriatura ku a keda atras kiko ta amor, pordon i perseveransia.

 

 Nicole