Prensa na Kòrsou ta desaster mundial


Pa años kaba nos pueblo ta wòrdu informá di tur loke ta pasa riba e pida isla pa medio di prensa. Ku esaki mi kiermѐn korant, radio i televishon. Awor aki tin asta un kanal di televishon ku ta pasa ‘live’ riba facebook. Nos a progresa i sigi ku e tempu riba redanan sosial. Ta algu sigur pa aploudí. Pero lastimamente ku no ta riba tur tereno nos ta bai dilanti. Mi ta pensa ku asta nos a bai atras na sierto punto òf porta awor aki e ta mas bisto dor ku e ta pasa riba internѐt te ku e ta yega riba instagram di ‘page’ nan hopi famá.

Pa ser mas spesífiko, mi ta papiando di nos korantnan lokal na Kòrsou. Hopi ta e biahanan ku mi ta mira nòmbernan di artistanan malu skibí òf un nòmber ku no ta kuadra ku e potrѐt ku nan ta hòrta gewon kon ku ta for di internѐt. Un mucha di shete aña ku kuminsa lesa mes por mira ku e no ta klòp. Otro biaha nan tradusí sierto palabra masha malu mes. Manera nan a tendé, asina nan ta skibié. Tambe nan sa duna informashon pa loko sin sa di bѐrdat ku e historia ku nan ta duna pueblo ta di bѐrdat. Tin ora sierto kasonan ta den investigashon ahinda nan ta pone nòmber ku potrѐt di hende sin buska drechi. Si e persona ta inosente boso nan a daña tur su nòmber pa pornada i famianan dje persona tambe ta sufri. No por!

No ta tur kos ku bo lesa den korant ta kos di kere fielmente. Mi ta kere ku nos no tin hopi periodista studiá na Kòrsou. Hopi hende ku ta traha den periodismo i prensa ta outo- didaktíko òf paso nan konose kaya bon nan tin nan trabou. Nan ta hasi di mayoria situashon un drama i ta parse ku prensa kier bende mas kos negativo posibel pa nan traha sѐn. Si bo ripara bon ta sanger ku hende di bui òf arma i droga na ‘frontpage’ nan ta pone. Asta kurpa sin bida tur na sanger nan sa pone. Mi kurason ta kue un stek ora mi mira esei pasa paso mi ta pensa kòrda si tabata un famia dimi. Ami sigur lo no kier pa nan hasi algu asina. Hopi kruel i falta di rѐspet. No tin un limité mas. Dimes tin biaha kosnan positivo tambe nan sa pone pero esei ta pasa ora no tin algu hopi malu a pasa. Kiermѐn e orei tin espasio pa algu otro.

Akinan un par di potrѐt di artistanan internashonal ku nòmber robes:

prensa2  prensa5prensa3

 

 

Kuantu tempu asina ta tuma pa por buska riba internѐt un nòmber i e potrѐt ku ta pas kuné? Mayoria hende sa kon uza google awendia. E ta bo ‘best friend’. Hasi uzo di dje. No ta un bes e fayo aki ta wòrdu hasí pero varíos biaha. Ban hopi serio. No tin hende ku ta duna e personanan aki un ‘waarschuwing’? Ki tipo di prensa i periodista nos ta kere den dje anto?

 

Otro ora nan no sa tampoko kon skibi nos mes idioma òf ta skibi kos robes pa drechi:

prensa4 prensa8

Si e hendenan ku ta traha pa korant por tuma par di lѐs di Papiamentu lo ta di apresia paso no por ta posibel bo ta eduká i informá un pueblo pero bo mes no sa kon papia òf skibi bo idioma. Ta un berguensa! Duna nan un pakete basíko sikiera.

 

Lastu suseso ku ta hopi falta di rѐspѐt ta esaki:

prensa6

A asesina dos persona den Alley na Punda i a bisa ku ta e rapper aki ku no ta biba na Kòrsou ni no tabata ku fakansi a hasi esaki. Pa kolmo ta poné ‘frontpage’. Unda nos ta bai? Nan ta duna nòmber di hende den proseso di investigashon den korant. NO POR!

Tin hopi mas.. Nos a yega asta THE SHADE ROOM riba instagram kaminda miones di hende ta wak. Paso prensa a hasi fayo den nòmber di artista. Kòrsou su nòmber ta resoná afó aya danki na e bon trabou di nos prensa. Kòrda bon mal fama tambe ta fama. Bon desaster mundial!

P.s: un danki na Nathaly Heyliger – Martina pa mayoria potrѐt .

Ku amor,

Richailine Elisa

 

 

 

Advertenties

Auteur: raedreamer

Mi a sali Kòrsou na aña 2011 pa bin studia na Hulanda. Un soñadó mi ta yama mi mes, paso dia mi a sali mi pais mi tabata tin soñonan grandi sin pensa den kuantu kos mi por pasa aden pa logra esna’i. Awor aki mi a lanta fo’i soño i mi kier kompartí mi eksperiensianan ku mas hóben. Realidat no ta asina bunita manera bo ta soñ’é. Mi a kaba e aña aki ku un dimi estudionan kual ta un acteursopleiding, mi ta ofisialmente Aktris. Culturele en Maatschappelijke Vorming ta mi di dos estudio, i esei mi ta trahando riba dje pa kaba tambe. Dos opleiding den un mi a hasi. Ku mi blog mi ke konsientisá hóbennan ku ta bin biba akinan òf ku ta biba akinan kaba. Sí bo no ta bin biba akinan, e blog aki tambe ta pa abo paso mi ta bai toka hopi otro temanan ku por siña òf yuda abo tambe. Pa ami ta hopi importante duna mi aporte na yuda forma nos generashon nobo. Mi no por kambia mundu, pero si mi por yuda mi mes pueblo. Ora bo ta leu bo ta wak hopi kos otro i sigur loke por mihó. Mi stima mi paraiso chikí..

One thought on “Prensa na Kòrsou ta desaster mundial”

  1. Loke ku ta wordu bisa den e relato aki ta berdat. Tambe mi kier a agrega aserka ku tur esakinan por a wordu evita si for di un prinsipio a pasa e lei “Media Beleid”.

    Esaki ta un lei ku ta EXIGI TUR hende ku ta traha den MEDIA aki na KÒRSÒU ta studia y diploma den e area ku nan tin di eherse nan labor debidamente sin tin buska redu y drechi di hende pa hasi negoshi barata kuné, papia pa loko of ofende otro persona negoshi of instancia.

    Mi ta korda den pasado tabatin un grupo di hobenan ku tabata bai UNA, a invita e doñonan/direktor di e respectivo korantnan na un debate pa asina mira ta na kua nivel e doñonan mes ta pa asina eherse nan trabou komo doño/direktor di un kompania ku aparentemente lo mester ta un kompania serio veridiko y na drechi. Mi por bisa ku e hobenan aki a “BAPULIA” algun di e doñonan ku si a presenta na e debate. No ta tur doño/direktor a bini paso sea nan a kobardia of lo tabatin un otro responsabilidat.

    Un biaha mas ta bini e situashon dilanti kaminda “STUPIDES” ta wordu bendi na KÒRSÒU anto ta hasi manera ta un grupo di hende ku no ta apto pa kompronde kiko ta pasa rond di nan.

    Algu hopi importante ta bini dilanti awor.

    “Ki dia e persona responsabel (Direktor) pa Bureau Telecommunicatie y e Minister responsabel lo sinta huntu kaminda ta saka e lei “MEDIA BELEID” for di den e lachi kaminda e lei a wòdru skondi y lo wordu atendi debidamente???”

    Liked by 1 persoon

Geef een reactie

Vul je gegevens in of klik op een icoon om in te loggen.

WordPress.com logo

Je reageert onder je WordPress.com account. Log uit / Bijwerken )

Twitter-afbeelding

Je reageert onder je Twitter account. Log uit / Bijwerken )

Facebook foto

Je reageert onder je Facebook account. Log uit / Bijwerken )

Google+ photo

Je reageert onder je Google+ account. Log uit / Bijwerken )

Verbinden met %s