Danki Dios a kimé!


Na mucha mi a wak Telenotisia tur santu dia. For di e tempu ey mi no tabata gusta Errol Cova. Kada bes ku e Humpty Dumpty ey aparase na televishon tabata paso e kìer a invita tur maestro pa bini reunion bou di ora di skol su siguente dia. No tabata importé kon duru bo a siña pa proefwerkweek ni kua topíko yufrou lo trata e siguente dia. Borotá e tabata borotá mane alma malu. E no por a skonde su set pa poder.

Fast foward pa 2016 mi ta bolbe miré i ripara mesora ku ainda e tin e mesun set. Despues ku e la frakasá komo polítiko, e no a subi sinta riba un muraya manera Humpty lo a hasi. Alkontrali e ta sapatiando i harmando un show ketubai den e mundo Sindikal. Un mundu yen di lidernan swàk ku gritunan populista, agresivo i solamente un strategia: grita “Nos kìer sen, sino nos ta pone trabou abou”! Rey ken semper tey presente komo instigadó i pushando su mes ruman un banda pa e hiba palabra?. Loke ta frapante e biaha aki ta ku señor Cova ta sinta na diferente mesa i alabes na tur dos banda di e mesa. E mes ta konsehero di PDVSA, konsehero di Gobiernu, konsùlant di e team Multidisiplenario (MDPT) i awor e ta duna sostén na e trahadonan di kontratista den Isla tambe. E sa muchu bon ku no tin mas sen ni no tin niun areglo tokante un lump sum firmá. Si tabata asina nan lo a kana kaminda di korte mesora tòg?!

Pueblo di Kòrsou no tin ni arte ni parte den henter e bulùlù aki. Sintá pueblo ta mira kon polìtikonan probechadó ta mete mientras e situashon ta bai atrás i eskalá. Meskos ku pueblo en general a hasi e ultimo 20 añanan relashoná ku e edifisio di Sentro Pro Arte. Un grupo chiki a salí defende e teatro, un grupo mas chiki a investiga si por dreché, un grupito a hür e parkeerplaats ku APC i traha plaka i na 2007 un suidadano a tene welga di hamber. For the rest niun hende no a ril ni tril nan yangado pa 20 aña largu.

Korsou tin un héroe nobo. Un hende ku a mustra kurashi, un ku desididamente a mustra ku no por sigui i a tuma akshon. Un simpel botèr di gasolin i un lusafè! Den un tiru e la trese lus, hala tur hende su atenshon i además skapa nos 18 mion Florin. Esey ta igual na 120 florin pa kabes bibá na Kòrsou! Ta kos pa hinka rudia i bisa na bos haltu; Danki Dios a kimé! E ta deskonosí, pero e persona aki merese un kaya na su nomber: Kaya Baluarte Deskonosí; Honrá pa pone kos kana mane un “lopend vuurtje”

Pika o Libera?
Maldishon o Bendishon?
Pic source: Caroline Castendijk

Realidat ta ku un sala nobo, high tech of no, ku donashon di Disney o La Reina Maxima mes lo bai pasa simannan para será sin ningun funshon. Laga hipokresia un banda, ken a sinti falta di SPA durante añanan? Ken a keda sin bai komedia, konsierto òf balèt paso SPA tabata un chollhouse? Kòrsou tin sufisiente lugá pa organisá arte den un esfera muchu más kultural.

E Yu di Kòrsou lo no paga 50 Florin pa wak un “musical” Peña saka!. E penshonado ta bashí, e trahado di Isla ta manipulá i e generashon hóben no ta balora teatro. Nan kapasidat di konsentrashon ta limitá i nan kìer entretenimentu barata. Facebook, Snapchat, #Thotgate, #KeepingUpWithTheJansens i Cine ta mas barata i aksesibel ku teatro.

Mi no ta sugerí pa stop di selebrá, apresiá o apoyá nos kultura teatral. Pero si nos ta realístiko, Kòrsou a haña un bon ayudo ku kimamentu di e koroto aki. Pueblo tin ku stop di drumi i warda tempu pasa enbes di saka su lès i invertí den ideanan i proyektonan ku lo kambia e fundeshi di komunidat.

Ta solamente matando hamber, pobresa, ignoransia i fanatismo polítiko nos por salba nos dushi Kòrsou!

Laga e kandela aki ta e komienso!

Pictures credit: Caroline Castendijk
Advertenties

Auteur: Endilo Lourens

Un Yu di Kòrsou biba na Singapore ku for di e punto di bista personal lo kompara e situashon di Singapore ku esun di Korsou indikando di un manera positivo e lesnan ku Korsou por siña y ehekutá pa drecha e kalidat di bida di Dushi Kòrsou.

2 thoughts on “Danki Dios a kimé!”

  1. Endilo, bo ta zona mesun frustra ku nos politikonan ku a bringa pa no drecha un orgullo patrimonial di korsou. E style di papia aki tin nos isla den e situacion(hode) manera e ta. Tur hende ta grita loke nan ta kere den dje pa konvensi e hendenan rondo di nan sin tene kwenta ku otro ! Tur hende ta bai nan mes lucha, abo ta claramente infekta ku e virus di ” bati boka grita duru pa atension “. Bo style ta mesunkos ku esun di Errol Cova. Bai purba convense nos artistanan respeta i berdadero di bo pensamentu nan. Laga e hendenan ku di berdad ta kere den nos kultura papia i bin ku kritika ku nos por hasi algu ku ne I no grita kos pa loko paso e 120 florin pa kabes aki na Korsou ku lo no ser inverti den sentro pro atre mas ta bai den saku di bo lider politiko. Pa drecha nos pueblo mester kuminsa na nos fundeshi i orgullo propio anto un di eseynan tabata sentro pro arte !!

    Bo di:
    Korsou tin sufisiente lugá pa organisá arte den un esfera muchu más kultural.

    Ruman di berdat bo ta? 36 anja bo tin ? Nunka bo no a drenta sentro pro arte? Basta di papia koi loko ! Nombra nan anto ….. Anto soru pa nan ta di nos di Korsou !

    Danki

    Like

  2. Nada bon no ta nase fo’i destrukshon ku no por a nase sin destrukshon. Un dje plannan tabata pa kambie den un sentro low cost pa hoben por train teatro, baile, deklamashon, ku airco solar pa e sala grandi so of dak habri ku un amfiteatro di beton den e sala i pafó. Bo ta malinformá. Tin masha tiki espasio pa kultura na Korsou..

    Like

Geef een reactie

Vul je gegevens in of klik op een icoon om in te loggen.

WordPress.com logo

Je reageert onder je WordPress.com account. Log uit / Bijwerken )

Twitter-afbeelding

Je reageert onder je Twitter account. Log uit / Bijwerken )

Facebook foto

Je reageert onder je Facebook account. Log uit / Bijwerken )

Google+ photo

Je reageert onder je Google+ account. Log uit / Bijwerken )

Verbinden met %s