Hartá di hende kabes bashí

source: www.colorszine.com

Ban papia serio awe. Nos pueblo tin hopi tempu ta grita pa kambio. Largu bai nos ta kritika tur mandatario. Korupshon den polítika, mane un epidemia, tin nos isla asotá.

Ta parse ku tur hende a pèrdè speransa. Luna pasá un hende a puntrami si mi lo ke drenta polítika i promé ku ma logra hik, un otro a kontestá. Kontestá puntrando mi si mi tambe tin idea di estafá.

Estafá mi mes pueblo di su plaka, di su impuesto, di su soñonan, di su bondad, su gana di progresa i su dignidad. Nan a laga sa ku ta tur hende ta dispuesto pa hasi e chocheria nan ei. Tur hende tin un preis. Si, prinsipalmente esnan ku tin puesto.

Ok. Nos ke mira kambio. Pueblo ta grita i sklama tanten esnan na poder ta keda gaña. Nan si ta kome karkó of kabaron tanten ku e homber chikí no tin ni pa kuminda di kachó.

Awor puntje a kom bij paaltje. Atobe. Gobièrnu lo spanta i aktua? Nan lo mira ku for di e dia ta serio nos pueblo a bin ta papia? Of nos set di kosnan pasahero lo logra pa nos mes lo kibra nos mes? Ta ora asinaki bo ta mira si ta di bèrdat nos ke kambio òf nò.

Hopi ta grita i sapatiá paso nan no por ku e kalor, nan no por sin internet i no tin koriente pa nan sigui huza snapchat.

Konchale!! Habri bo mente. Sí, bo mente! No djis bo wowo.

Mi ta komprondé ku bida sin koriente ta fèrfelu. Pero hala wanta un ratu. E kos aki ta kome bebe hopi mas ku djis un dia den kalor.  Ami ta kita sombre i duna balor na esnan ku a tuma e kurashi di pone nan pan na peliger pa bringa pa nan derechonan. Si, no lubida ta kuantu rísiko nan tambe a tuma.

Djis pensa i realisá ku bo mester sembra ku awa na wowo si bo ke kosecha kantando. Den e kaso aki e sembramentu ta ku awa na kurpa. Ora sodó ta kore f’oi bo kurpa djis pensa kon e ta kore f’oi kurpa di otro hende ku ta traha duru sin haña loke nan meresé.

No lubida ta kuantu badabada tabata tin den pasado pa nos a yega awe kaminda nos ta. Niun lucha pa derechonan humano of pa humanidat no a wòrdu luchá djente afó.

Pensa riba e Revolushon Franses, Toussaint Louverture ku a libera Haiti i influensiá sobra pais/islanan, Tula i tambe Papa Godett. “Solo el pueblo, salva al pueblo!” Mare Tula ke sa kon difisil ta pa hiba un lucha den union mental riba su isla awendia.

Hopi a paga ku nan bida. Nan a hiba un lucha sin tembla. Basta a bini un kambio den loke nan tabata bringa p’é.

Ora ta trata di lucha kontra otro rasa si nos ta rèis pechu, saka huma f’oi orea i grita pa “kaba ku nan”. Anto awor nos mes no por sostené nos mes sin murmura i sulfura??

Nos mes no ta dispuesto na pasa un dia sin koriente paso nos ta muchu egoista. Blo ta kana bai bin ta supla paso bo “rib eye steak” i lomitu ta hòrna den frizer. Hopi nèrviá paso no tin koriente pa strika bo kamisa ni bo djòki di Calvin Klein.

Por fabor, no lubidá ku yu di e obrero tin hopi dia ta kome tuna, saldinchi i si kos ta bon corned beef. Anto kana ku paña machiká? Niun hende no a muri di esei.

Awoki nos pueblo ta murmurá. Awe ta di bo. Bo sa di mañan?

Amigas i amigos, hubentud no ta eterno. Tardi of trempan nos lo gosa di resultado di e infierno aki. Sera bo boka awor i sostené bo mes pueblo.

Caso cerrado.

Nicole