‘Badabada’ na entiero


Antes hendenan tabata dera nan sernan kerí ku masha rѐspѐt den silensio. Hendenan ta bisti na blanku òf pretu òf un kombinashon di tur dos koló. Tur hende por pasa pone un flor den e kaha si esaki ta habrí. Ora kaha ta bai sera famianan mas serka por tuma despedida di e defuntu. Kaha ta sera. Esaki ta un dje partinan mas difisil paso bosa ku ora kaha sera di bѐrdat nunka mas bo no ta bai mira su kara. E momentu di bѐrdat mi ta yama esei. Despues e hòmbernan di famia ta hisa kaha pa hiba e defuntu su lastu lugá di sosiegu. Promé ku esei ta pasa ku ‘wabi di morto’ dilanti e defuntu su kas i ora e pasa bai ta tira awa ku habon su tras. No muchu buya. Despues di entiero ta warda bishita na kas ku chukulati kayente i lѐter.

Dimes bo ta haña bo ku e hendenan ku ta bin entiero speshalmente pa sinta wak ken tur a bini, kuantu hende tabata tin, kon tristu entiero tabata, kon bunita e tabata pa su doño i esnan ku ta kue ѐkstra lѐter hinka den tas pa haña na kas. Nan no ta keda afó. Antes e hendenan aki no tabata tin telefòn ku kamara pa graba kiermen ta na entiero mes nan graba tur kos ku nan wowo pa konta despues. E rekuerdo di un entiero ta keda pa hopi tempu graba den hende su memoria paso e momentu ei ta unu sigur tristu.

Awendia mi ta haña kosnan a bai muchu leu ora ta trata di dera un persona. Ta parse ku ta un fiesta e kos a bira. Un ban topa. Lastu tempu tambe ta hopi hoben nos ta dera. Algu masha tristu. Pero e manera ku ta hiba e defuntunan na nan kaminda di sosiegu ta unu remarkabel i di berguensa. Tur hende mester sa kon nan ta dera nan ser kerí. Naturalmente tin un diferensha ora bo ta dera un hende ku a fayesé dor di malesa, morto repentino òf el a fayesé dor ku nan a tiré mata. Òf si e hende tabata hende grandi òf hoben. Tur esakinan bo ta tene kuenta kuné.

Lastu mi ta mira nan a dera un hoben ku masha ‘fanfara’ rondó di e entiero. Parse ku e hoben tabata gusta un likor tempu e tabata na bida. Awѐl, nan a yena e kaha ku masha plachi ku e bibida aki na luga di flor. Tur miembro di famia, bario, amigunan i konosínan a bisti un T-shirt ku e defuntu su potrѐt ariba manera ta na un kompetensia pa apoya un hende nan a bai. Otronan ta kana den e awa ku habon ku nan a tira ria kaya manera ta nada. Nan a pone fever den kaya, habri e porta di e ‘wabi di morto’ pa huma drenta eiden. Henter un espektakulo. Hobennan ta saka telefon filma kuantu hende tin den kaya pará, turesten ku nan ta firma nan ta papia riba hende sin tin kunes nan ta post esaki riba facebook.

Asina leu nos a yega!

Ta bai entiero saka potrѐt dje defuntu den kaha, ta saka selfie ku asina un smile bisa ku ta sinti e defuntu su falta kaba. Henter un ‘photoshoot’ na entiero. Unda nos ta bayendo anto? Humanidat ta dunando mi walmentu di stoma kada dia mas i mas. Tin sierto Yu’i Kòrsou ku ta hiba e kosnan abnormal den direkshon di hasinan normal. Norma i balor nan tur ta bayendo pѐrdí. Awor ta tur siman tin ‘badabada’ riba internѐt.

Porfabor respetá defuntu i famia di e defuntu. Entiero no ta karnaval ni un ban topa. Respetá doló di hende. Pesei no ta keda mi nada straño ku hende no ta tuma bishita mas na kas despues di dera. Humanidat ta bayendo den su ‘muskònt’. Wake up!

 

Ku amor,

Richailine Elisa

Advertenties