E Yu’i Kòrsou ta mas sabí ku un buriku?

Pic credit; Mark Hamblin

Aki 2 dia bo tin e oportunidat pa kontribuí na futuro di nos país Kòrsou. E país ku ami i abo lo muri bai laga pa nos yunan, subrinunan i ñietunan. Tur esunnan ku awe ta menor di edat i no por vota den e próximo elekshon. Pa ku nan nos tin e deber di laga un país atrás kaminda nan por krese i gosa di un kalidat di biba mas haltu ku esun di nos. Hopi ta esnan ku no sa ahinda ken nan lo sostene. Ta prome biaha ku tin asina tantu opshon.

E lista!
E lista!

Pero si bo ta sinsero ku bo mes, bo ta atmití ku e opshon ta un ilushon paso un hende manera:

Alex Rosaria a demonstra di ta slap mane pan di ipiranga muha. 4 aña pasa mirá komo un persona konfiabel a resultá di a sostené /bira kara pa nos bergwensa nashonal di mas grandi esta M Wiels. Promove un Cleopa den su partid a sinta 4 aña ketu ketu boka será mane mucha manda den parlamentu. Awo den porta di elekshon e ta grita ku e kièr hisa minimumloon. Rumannan e hendenan aki ni nan partido no merese bo voto.

Charles Cooper ta mane e tumor maligno ku MAN tabata sufri di dje. E la kue un grupo di persona relativamente grandi ku gana di posishon bai lanta su mes sekta meskos ku Ivar Asjes i Sra Moses a hasi. Ku tur e añanan ku sr Cooper tabata den polítika Kòrsou no a bai dilanti, kiko a kambia pa ponebo pensa ku awor si e lo bai traha pa pueblo?. Un hende mane Cooper ni su partido no merese bo voto.

Asina tin hopi mas.

For di ora ku bo tin Menki Rojer, Elmer Wilsoe, Gibi Doran, Mercee Doran, Hunneley Felicia, Pik Pisas i Carlos Monk riba bo lista, bo no ta merese niun voto. Si bo no tin e inteligensia pa konklui ku e personan aki no ta di konfia o no tin e kapasidat pa yuda hiba Kòrsou dilanti na mi pareser bo no mester tin e derecho di vota tampoko. E hendenan aki tey djis pa yena lista i karga e speransa ku nan por bai sinta gana voto i asina bai sinta djòdjò di plaka di pueblo.  Si komo líder bo no por a traha un lista ku hendenan integro i konfiabel ta kon pueblo por konfia ku bo lo tuma medidanan na bienestar di nos yunan i futuro ñietunan?

A ser probá ku na Kòrsou pueblo no ta vota pa programa di partido sino mas bien pa esun ku ta papia bunita. Pueblo di Kòrsou a ser gañá hopi kos durante e temporada di elekshon aki atrobe te ku mi no sa kon pa yuda aklará algún kos.

Bin aden o chupe lembé

Un kos ta sigur e biaha aki no tin niun hende pa bin skapa nos. Sea pueblo ta lanta para eksigí kalidat i kambio pa ku su futuro o e ta keda drumi i hañe ta chupe lembé!

Un buriku no ta dal su pia dos bes na e mesun piedra.

Bo ta kere ku e yu’i Kòrsou ta mas sabí ku un buriku?

E desishon ta keda na bo!