Pan ku Horkan


Manera ta konosí, den zona di Karibe for di komienso di yüni te komienso di desèmber por tin chèns riba horkan òf ola tropikal. Dios grasia Kòrsou no ta den e zona peligroso di e ruta kustumbrá di e fenómenonan menshoná aki manera Isla ariba. Pero e tiki biaha nan ku nos haña bishita di Horkan òf Ola tropikal e ta bini ku su kosnan.

Infrastruktura

Un weer shinishi ku un poko awa ta hinka e yu di Korsòu den un esfera romántiko. Pero mal tempu si no ta nada dushi, e ta laga bo kòrda tempu ku ki ora ku bo èks bisa bo e ta bai serka su amiganan, bo brò nan ta bisa bo nan a miré ku un gai ku yama Matthew.

Kòrsou no por ku hopi awa. Dòs plaka di awa so mester spat pa algun kaya transformá nan mes den un pisina. Roi nan yená ku kotèks, eiskast bieu i mata di behísima ta yena te basha afó ku bo no sa unda ta roi, unda ta kaya. Hopi Aña diferente gobièrnu a primintí nos ku nan si lo sòru pa un mihó infrastruktura. Ta bestèl trùknan kargá ku awa di breu pa laga parse mané ta masha drecha ta bai drecha kayanan. Un kos si. Masha hopi hende a kuestioná roinan yen e delaster dianan aki. Ni unu di nan no a buska un moda pa limpié. Asina nos ta. Reklamá pero hasi algu nos mes : “Ho maar”

Lo ta bon si pa otro aña lansa un kampaña ku lo karga e nòmber: “Tur hende limpia nan mes roi” Tur pero tur roi..basta e ta di bo.

Hèpenen

Tur kos na Kòrsou tin ku bira un happening. Ora ku un Horkan ta aserkando nos tambe:
Pòmp di gasolin nan tin rei mas largu ku e rei pa tuma karchi pòrnada di North Sea Jazz.
Kuminda di bleki ta bende mané oliebol na kermis di Tilburg. Den kada makutu na supermarket tin 3 flèshlait i 14 paki di bateria. Remarkabel ta kon e generashon nobo ta prepará nan mes pa horkan: Baki di eiskrim di Ben & Jerry’s, pink moscato, bara di lomitu, saku di chips, i kaha di durex.
Laga nos no lubidá tur e hòmbernan ku tin èkstra trabou den e temporada aki. Juan 7 porta mester kumpra eternit, ranka plak i manda limpia kurá pa tur su 7 muhénan.

Ekspertonan

Meskos ku ora di festival di tumba bo tin sesenta mil kompositor i areglista, ora di Horkan ta mes un kos. Hopi ta esnan ku ta hunga eksperto i mal informá e pueblo pa krea pániko innesesario. Nan mes ta Meteo pa eksagerá kon grave e tempu lo bira. Nan mes ta Minister Dick pa avisá mayornan pa no baha nan yu na skol. Por ùltimo nan mes ta disidí kuantor Ben Whiteman tin ku kome.
Aparte di e kosnan ariba menshoná nan ta tribi na insultá diferente organisashon ku tei pa kuida i guia nos den e temporada aki. Ku boka grandi nan ta
  • Koba mama di mandatarionan
  • Zundra polis
  • Yama nos ekspertonan di Meto idiot

Ora ku kos bai fo’i man si nan lo kore grita: Yama polis!!

Matthew

Kòrsou lo haña un bishita di orkan Matthew. Su rabu lo pasa banda di nos isla entre djaweps anochi pa djabièrnè durante dia. Grandinan ta bisa Nada no ta pasa pornada”. Matthew a presentá nèt riba dia di elekshon ku konsekuensia ku a posponé. Hopi ta e polítikonan ku a huma henter un kaha di sigá Velasquez pa tene Matthew leu fo’i Kòrsou pa elekshon sigui tòg. Lastimamente e no a yuda. Djaweps mainta nos a haña un ñapa di Matthew, un pal’i awa ku su konsekuenshanan. Monte Vèrdè mes t’asinaki, ban kòrda Punda!!
Dios kuida nos pida baranka di Horkan i polítikonan alakran!
Vader Volk
Advertenties