Sapatiamentu den supermerkado


Nos tur konose e mirada klasiko ku bo mama ta wak bo ku ne den supermerkado ora bo disidi ku bo ta bai heringá den hende. Òf nò?

Ba pasa man kue un kaha di Froot Loops. Ku un kara seku seku bo mama ta bisabo “Awe nò! Bai pon’é bèk.” Un rabia i desesperashon ta drentabo. Bo mes no tin moda pa pag’é pero bo tabata anhela na djé. Anto pa awor bo mama bisabo nò?! Kens e ta?

Bo ta disidi di pèrsisti un tiki mas. “Aino mama plis!!!” Oferta ta kuminsa kai. Diripiente bo ke hasi mas trabòu di kas i asta kumpra auto nobo pa bo mama di abo bira grandi. E ta bira wak bo atrobe, span su wowo i bisabo “Ma bisabo awe nò!”.

Kolón a kima den bo paden. Ba sinti mane bo bida a pèrdè koló i ba kuminsa yora. E kos aki, na bo pareser, ta un gran inhustisia. Ignorando bo yoramentu bo mama ta bisabo pa “yuda saka kos f’oi garoshi bo stop di maha!”.

Abo i bo lagrimanan ku a keda ignorá ta disidi di harma un spetakel pará na kasa. Ya komo bo ke pa e kahera tambe wak kon mal hende bo mama ta, bo ta subi tono di bo yorá i kuminsa snek dramatikamente.  Bo mama ta bira wak bo atrobe, e biaha aki ku wowo mas grandi ainda. E ta punta su lepnan i bisabo den djente pa bo “Sera bo boka promé ku bo haña sla den hende”.

Desidido di bai kas ku bo paki di Froot Loops i keriendo ku e kos ei lo keda djis na un menasa ba disidi di benta bo kurpa abòu i promé ku b’a logra yega suela te pa bo a kuminsa sapatiá, sla a kue bo den hende. Si. Den hende. Den rei pará den supermerkado. Hopi bèrguensa.

Anto como si fuera poco, e mai pará bosnan tras, sin niun klase di piedat, ta bira bisa bo mama “Masha bon señora! Mucha mester siña tende.” Na kua bo mama ta kontesta “Si! Ami no ta kria porko. Mucha ta tende na bon òf na malu.”

Nunka hamas bo lo tribi di hasi e spetakel ei atrobe. Bon ya, esei ta si un biaha tabata sufisiente pa dunabo skrement.

Sinembargo, na Hulanda aki mi sa mira algu ku mi sa sigur ku ta un kriamentu di porko. Porko ku diploma.

Bo ta hañabo ku Wim ta pidi un snoepje. Pero su mama ta bis’é nò. Wim ta asta haña splikashon dikon e no por haña loke e ke. Pero tòg e ta para bira un kos ku no ta sirbi. Tazmanian devil en vivo i directo. Anto mama?

Sea e ta kue e kos ku Wim ta heringa pe ei i bent’é den garoshi pa Wim para ku e spetakel, òf e ta bise “Wim, mama vindt dit niet meer leuk”.

Como si fuera Wim tin arte òf parte den loke mama ta haña leuk òf laga.

Serka ami su mama ta te na e spanmentu di wowo e proseso aki tabata yega. Bo ta djis wak su kara, haña un flashback den bo subkonsensia i pone e kos bek bon mucha asina te kaminda bo a kue.

Lei no ta pèrmiti pa dal mucha i ta stimula un edukashon positivo di e sernan ku ainda ta fragil. Esaki ta pa motibu di abuzu ku a bin ta tuma luga kontra mucha pa hopi aña kaba. Pero mi a bin ta puntra mi mes si esaki ta nifika un kriansa di porko lagando mucha subi bo kabes i laga bo kara na bèrguensa den publiko.

Kon nos por disiplina den un situashon asinaki sin huza violensia?

 

Nicole

Advertenties