Pa ken si?

Pic Credit: Curacao-Law.com

Ken no meresé bo voto?

Siman pasá djis prome ku elekshon a para mi a skirbi un blog i puntra ku e Yu’i Kòrsou lo resultá di ta mas sabí ku un buriku. Mi a skirbi entre otro ku “For di ora ku bo tin Menki Rojer, Elmer Wilsoe, Gibi Doran, Mercee Doran, Hunneley Felicia, Pik Pisas, Amerigo Thodé i Carlos Monk riba bo lista o bo tin Charles Cooper, Ivar Asjes, Jaime Cordoba, Gerrit Schotte, Amparo dos Santos o Alex Rosaria komo bo líder bo NO ta meresé niun voto.

Si bo no tin e inteligensia pa pone ni fanatismo ni materialismo un banda i konkluí ku e personanan aki no ta di konfia, no ta integro, a purba pero simplemente no tin e kapasidat pa yuda hiba Kòrsou dilanti ta kon bo ta kere pueblo por konfiabo?  Nota ku den e hendenan aki tin hopi probechado partisipando ku e speransa ku nan por bai sinta djòdjò di plaka di pueblo.

Kisas ta paso Kòrsou ta chiki, kisas ta paso nos a lanta den e kultura di “keda bon” ku tur hende paso bo no sa ki dia bo lo mester di nan ta pone ku hopi no ta kla pa bisa na bos haltu ken nan ta sostené den elekshon.  Di tur e reakshonnan ku mi a haña, esun ku mas a resaltá ta e pregunta: “Pa ken si awor?” E echo ku e pregunta aki a bini den mi inbox privá ta suprayá mi ponensia.

Hopi ta konfundí pero alabes konvensí ku e elekshon aki ta sumamente importante pa futuro di Kòrsou. Tin ta asta bisa ku den e elekshon aki pueblo lo tin ku skohe entre bon i malu. Bon mirá emberdat tin dos grupo. Pero bo no por vota pa un grupo, solamente pa un kandidato/a.

Neutralmente mira; Ken ta un bon eskoho?

Aunke mi sa ku na Kòrsou e mayoría no ta vota a base di plan di partido, ami tòg a lesa delastèr un manifestó ku mi por a haña, mi a huza Google pa sa kon un kandidato a profilá su mes prome ku kampaña. Dimes ku durante kampaña tur hende a mustra nan kara full na “make up”. Tin di nan Google no a rekonosé mes, otro ta konosí pero pa un motibu totalmente diferente. Banda di esaki mi a wak 1) Kon duradero i realìstiko e plan di partido ta. 2) Ku e kandidatonan ta integro , 3) Ki eksperensia e kandidatonan tin sea den nan ramo o den polítika.

A base di e puntonan ku ami ta haña importante mi a yega na e siguente konklushon:

  • MFK —  (Dubbele Min)

Niun hende riba e lista aki no merese bo voto

  • MAN ++ (Dubbele Plus)

Hensley Koeiman, Kenneth Gijsbertha, Giselle McWilliam, Elsa Rozendaal

  • Pueblo Soberano – – (Dubbele Min)

Niun hende riba e lista aki no merese bo voto

  • PAIS -+ (Min plus)

Etienne van der Horst

  • PAR – +(Min Plus)

Zita Jesus-Leito, Eugene Rhuggenaath, Marilyn Alcala-Walle, Eduard Braam

  • PNP – + (Min Plus)

Humphrey Davelaar, Suzy Camelia-Römer, Henny Reinilla, Elvin Gerard

  • Un Korsou Hustu ++ (Dubbele Plus)

Omayra Leeflang, Gwendell Mercelina, Magali Jacoba, Cor de Graaff, Billy Pandy

  •  Movemento Progresivo – – (Dubbele Min)

Niun hende riba e lista aki no merese bo voto

  •  Democratische partij – + (Min Plus)

Geraldine Scherperboer-Parris, Myra Biegelaar, Lysette Bor, Yolanda Faneyt

  •  PAS – – (Dubbele Min)

Felix Pinedo

  •  Korsou di nos tur – – (Dubbele Min)

Niun hende riba e lista aki no merese bo voto

  • Pro Korsou – – (Dubbele Min)

Niun hende riba e lista aki no merese bo voto

  • Kousia Promé – + (Min Plus)

Rene Rosalia

Ami no debe niun di e kantidatonan aki un fabor ni niun di nan no ta mi famia. Mi ta simplemente un Yu’i Kòrsou prekupa pa futuro di su país!

Ta keda na abo pa lanta para eksigí kalidat, integridat i kambio pa Kòrsou su futuro o sigui drumi i haña ku abo i bo yunan tin ku chupe lembé!

Picture Credit: Curacao-Law.com