Kita e banderanan awo.


Den e último simannan aki tabata tin hopi kos a pasa riba nos isla. Pa kuminsá tabata tin yen korementu di kampaña di partidonan i debate kaminda tur politiko ta purba bende nan mes pa hende vota pa nan. Siman pasá Kòrsou a haña un spantu paso orkan Matthew tabata kier a pasa akibanda.  Manera hopi aña Señor a tene piedat di nos maske kuantu kos mahoso ta pasando akinan. Mayoría hende a hinka rudia i pidi miserikòrdia. Un danki na tur ku a resa pa tur esnan ku no a hasié. Kòrda ku no ta ora baka tei hoga na pos so mester resa pé.

Dor di menasa di Matthew a posponé elekshon. Tur mucha den nan ‘tentamenweek’ a haña liber i esaki tambe a wòrdu posponé pa despues di fakansi. Dimes ora naturalesa ta duna su señalnan bo no por bai kontra di dje pero mas dia a bai mas e kos di elekshon a kuminsá bira pisá. Loke ta remarkabel ta ku kamindanan di Kòrsou tin mas bandera ku bòrchi di partido politiko ku tin palu di lus. Ora a pidi pa kitanan pa menos riesgo ku e orkan por hasi daño ku nan, niun hende un tende i no a haña nesesario. Prioridatnan a bin bon kla dilanti. E ta bisa hopi mas di ken ta esnan ku kier bai goberná nos pais.

Papiando di bòrchi i bandera di partidonan politiko ta masha hopi mes tin. Kuminsando di Fuik bai te Westpunt. Banda Abou nan a lubidá un tiki riba dje manera semper i banda Ariba no tin asina tantu manera parti mei mei di Kòrsou. Riba brùg na e palunan di lus no tabata tin lugá mas pa pone un bandera. Saliña tambe ta pèstá ku bòrchi i Caracasbaaiweg no papia mes. No ta un partido so bo ta mira. Nan ta pone nan bandera di kóló banda di otro. Tur kóló bruá den otro meskos ku nan lista mes, de todo un poko.

Ami tabata puntra mi mes ku kiko e banderanan aki ta yuda kuné. Ku kiko e bòrchinan ku kara di hende i un slogan ta yuda kuné? Ta elekshon bèrdat i bo mester hasi propaganda pa bo partido pero asina tantu no tin nodi. Ora di debatí mes ta yen kos a wòrdu primintí pero niun no por splika kiko nan ‘plan van aanpak’ ta paso nan mes no sa kon drecha e tutu mal hasí ku Kòrsou a bira. Esaki ta un lastimá. Pa hinka asina tantu sèn den e propagandanan aki, dikon no uza esei den algu otro? Mi no sa mihó pero mi por imagina mi mes ku no ta ami so ta pensa asina aki.

Ayera tabata elekshon i tur kos ta tras di lomba. Danki Dios! Pero awor e trabou mes mes ta bai kuminsá. Nos tur tin speransa ku kos lo bai drecha pa bon awor. Promé kos ku nan por kuminsa hasi ta kita e banderanan i bòrchinan. Spera nan no laga esakinan para un luna mas manera e bankinan di Karnaval ku te ahinda tei kantu di kaminda.

Tur siman tin algu ta pasa. Tur siman tin un sensashon. Nos stima un bòmbòshi, un drama. Spera ku nos por forma un gobièrnu ku sero drama i no pa ku otro siman gobièrnu kai atrobe pa di mil biaha. Pueblo tin su kurason den man paso ayera el a pone su lastu pida speransa riba un pida papel. Elekshon a pasa, kiko awo?

 

Ku amor,

Richailine Elisa

 

Advertenties