Morkoi mes ta mas lihé!


Bida na Hulanda no ta nada fasil. E tin su benefisionan si mi tin ku bisa. Sí bo bai ku un meta i keda fuerte ora turbulensia kuminsa asota, bo lo ta un triunfadó. Loke mi ta gusta di Hulanda ta ku mayoría kos ku bo tin ku atende ta bai digital i bo no tin ku para den filanan masha largu. Manera den banko bo ta bai pa bo saka sèn, hasi informashon, atende asuntunan ku riba internèt bo no por hasi. Asta nan tin kòmpiuter poné pa hendenan ku portá no tin esaki òf si bo ta den sentro di siudat i bo mester atende algu via di bo kuenta, bo por hasie einan.

Tambe tin diferente kompanianan di telefòn manera Vodafone, Tele 2, KPN, T-mobile, Telfort, Hollands Nieuwe i asina e lista ta sigui. Tur e kompanianan aki tin diferente establesementu rònt Hulanda. Sí bo no por yega mes bo por yamanan i pa tur kos tin un telefonista pa yuda bo. Asta riba nan website bo por subi pa kontektá ku nan. Pa tur pregunta tambe bo manda nan un e-mail. Esaki nan ta tarda tin ora pa responde bo, kiermen mihó bo hasi nan un yamada. Bo ta keda kla muchu mas lihé.

Ora bo bini Kòrsou hende ta kuminsa bisa bo: ‘Bo a bini no kuminsa reklama dimas’. Wèl no ta reklama, pero solamente bo ta mira lokenan por bai un tiki mas mihó. Naturalmente Hulanda ta muchu mas grandi ku Kòrsou i nos no por kompará nan. Bo no por kambia e sistema di un isla, esei ta sigur. Na nos isla rumannan i e otronan den Karibe tambe tin kosnan ta pasa ku ta tipíko pa luganan ku tiki habitante. Manera Kòrsou tin basta lugá di ‘fastfood’. Sí bo komparé ku Boneiru ku tin un KFC, ta basta kos nos tin.

Akinan hendenan ta bai banko pa tur kos. Nos no tin hopi banko. Fin di luna, ora dianan di fiesta ta yegando òf djabièrnè promé ku wikènt bo por imagina bo kaba kon chòk bankonan ta. Bo ta haña filanan masha largu mes. Loke ta tristu ta ku bo no por bisa bo ta bai un otro paso ta mes un tantu lo bo tin ku para warda pa bo yega na turno. Tur ta mes un yen. Algu ku pa ami ku ta hopi remarkabel ta ku den henter un banko ku 5 lokèt ta 2 kahera so bo ta haña ta traha. Si unu tin ku bai ‘lunch’ ora ku banko ta yen yen, e ta bai masha trankil. No ta importa nan ku e hendenan lo tin ku warda mas tantu òf ku tin hende tin purá. Tambe tin wega di wak dilanti i patras di ken bo ta pará, pa bo bai sinta warda bo turno. Un hende drenta para den fila ta pensa ku tin 10 hende su dilanti, logá ta resulta ku ta mas ku 15 hende tin. Solamente 5 tabata sintá. Hopi malbèis e kos aki ta duna bo.

Tambe nos tin dos kompania grandi di telefòn ku no tin hopi establesementu. Via telefòn nan por yuda bo si bo kier puntra algu òf tin problema ku konekshon. Pero preferibel bai serka nan na e establesementu. Akinan atrobe bo ta haña bo ku asina un lugá grandi ku tiki hende pa traha aden. Bo ta haña bo ku un bewaker ku ta den su telefòn ta duna bo un number pa bo para warda i no ta ni bira wak bo. Outomatíko e kos a bira p’é kaba. Si no tin hopi hende mes kos ta kana masha slow. Bo ta para wak riba e pantaya te bira kèns. Atrobe, nan tin 5 lokèt ku tin 2 hende ta traha na dje. Dikon anto? Esei so ami kier sa.

image-1-4

Mi stima mi isla pero esei no ta kita ku mi no por bisa e kosnan ku por kambia. Asta e hendenan ku tin mil aña bibá na Kòrsou ta kue fadá di e tantu ku nan tin ku para den un fila. Bon trabou, nèchi lugá ku tur kos pero nos por kuminsa traha mas efisiente ku nos tempu tambe. Morkoi mes lo kansa para den e filanan largu ei!

 

 

 

Ku amor,

Richailine Elisa

 

 

 

Advertenties

Auteur: raedreamer

Mi a sali Kòrsou na aña 2011 pa bin studia na Hulanda. Un soñadó mi ta yama mi mes, paso dia mi a sali mi pais mi tabata tin soñonan grandi sin pensa den kuantu kos mi por pasa aden pa logra esna’i. Awor aki mi a lanta fo’i soño i mi kier kompartí mi eksperiensianan ku mas hóben. Realidat no ta asina bunita manera bo ta soñ’é. Mi a kaba e aña aki ku un dimi estudionan kual ta un acteursopleiding, mi ta ofisialmente Aktris. Culturele en Maatschappelijke Vorming ta mi di dos estudio, i esei mi ta trahando riba dje pa kaba tambe. Dos opleiding den un mi a hasi. Ku mi blog mi ke konsientisá hóbennan ku ta bin biba akinan òf ku ta biba akinan kaba. Sí bo no ta bin biba akinan, e blog aki tambe ta pa abo paso mi ta bai toka hopi otro temanan ku por siña òf yuda abo tambe. Pa ami ta hopi importante duna mi aporte na yuda forma nos generashon nobo. Mi no por kambia mundu, pero si mi por yuda mi mes pueblo. Ora bo ta leu bo ta wak hopi kos otro i sigur loke por mihó. Mi stima mi paraiso chikí..

One thought on “Morkoi mes ta mas lihé!”

  1. Full eens. Y no ta paso Hulanda ta grandi, paso sibo kue un dorp mes ku su gemeentehuis kosnan ta kana lihe dus aki por tambe. Pero aki nos ta pensa ke hende mester di nos dus e warda. Triest. Kana pronk enbes di juda manche hende ku ta warda. Gewoon domme mensen pone ne luganan incorekto.
    Bankonan of luganan di telefon yen balie pero pornada. Ta ora rij bira largu nan ta sali juda.
    Anto asina nos ta papia di e Bon Yu di Korsow of dushi hende? Pffff. Ora bo viaja of biba otro paisnan bo ta mira e verschil.
    Felis dia

    Liked by 1 persoon

Geef een reactie

Vul je gegevens in of klik op een icoon om in te loggen.

WordPress.com logo

Je reageert onder je WordPress.com account. Log uit / Bijwerken )

Twitter-afbeelding

Je reageert onder je Twitter account. Log uit / Bijwerken )

Facebook foto

Je reageert onder je Facebook account. Log uit / Bijwerken )

Google+ photo

Je reageert onder je Google+ account. Log uit / Bijwerken )

Verbinden met %s