Insel Air: piñata di pueblo


Después di orkan Matthew i Gerrit Schotte ta nos kompania nashonal di aviashon ta tópiko di kòmbersashon ùltimo dianan. Kara di hopi hende ta trèk ora bo menshona e nòmber di Insel Air. Ta manera kos ku ta un glas di binager ku èis bo a ofresé nan. Hopi retraso pa motibu di problemanan tekniko òf “crew” ku mester sosegá. Loke tambe sa wòrdu bisá ta ku tin varios avion den e asina yamá C-check. Di tur manera ningun di e motibunan aki no ta fria doló di e kantidat grandi di pasaheronan hostina.

Insel Air ta sufri di un virus ku mayoria bia ta surgi nèt den temporada di vòngkòngsi. Manera minister Nelson Navarro a yega di bisa: “Fasten your seatbelts”. Ora e virus manifesta su mes a ni hasidónan di brua kombiná ku dos indjan brabu no por paré. Bula ku Insel den e temporada ei ta bira mes kos ku kasa ku un muhé ku a yega di mata su kasá: un ora pa otro e por bolbe eksplota. No ta awor Insel ta sufri di retraso-ritritis. Mei ora òf un ora di retraso pa mayoria di nos no ta un problema pero asuntu di 6, 10 ora òf vuelonan ku ta keda kansela si ta bira dimas.

Insel Air ta un kompania ku trahadonan hopi motivá i flèksibel. Nan ta traha tur dia den un avalancha di kritika. Por ehèmpel e personal na tera. Bo sa kiko ta duru? Lanta mainta sabiendo ku atrobe bo por spera pasaheronan rabiá. Kobamentu di mama, menasa di agreshon físiko i palabranan manera “bosnan no ta sirbi” i “ mi ke mi sèn bèk awor” ta skèiru pa loko den nan orea. Tin hasta kaso kaminda a saka potrèt òf graba video pone riba internèt. Imagina bo si ta bo frei, kasá, ruman, mama, tata etc. Un kos nos tur ta di akuerdo kuné… Insel Air mester drecha su servisio pero laga nos tambe respetá su  trahadónan.

Mi mes a pasa den basta kataklisma ku Insel Air. Fo’i retraso, vuelo ku a sali mas trempan lagando mi na tera, maleta ku no a yega i avion ku a bira bèk después di tabata 30 minüt den laria. Mi a rabia, kunsumí i desea Insel Air for di dengue te malaria. Segun tempu ta pasa i Insel su retrasonan ta baha kaba subi pa na final bolbe baha mi a realisa algu. Pa mi sinta sofoka mi alma ku algu ku mi mes no por hasi mashá na dje mihó mi kai sinta trankil i por ehèmpel skibi e blog aki.

Laga nos ta sinsero ku otro. Tin hende ta reklama djis pa otronan sa ku nan ta bayendo di biahe. Ekspreshonnan manera: “oh i’m going to miss my connection to Atlanta” , “Ken ta paga e anochi pèrdí di mi hooowtèèèl na Mùrka” i “Oh my God, we are going to miss our cruise” ta zona pa bai dilanti riba Féésbuk. Tambe tin esnan ku ta bula nèt 1 bia pa aña pero ta pone drama hasi mané aeropuerto di Kòrsou ta nan di dos kas. Laga nos no lubida e èks trahadónan di DAE. Den nan tin un grupito ku no por warda Insel Air bai falliet pa nan bisa: drechi! Mi no sa kiko un of mas empleado di Insel Air lo a hasi pero aparentemente tin un odio ku hopi furia ta reina kontra di nan.

En fin. Ta parse ku awor si mi vuelo ta bai sali. Laga mi hasi un orashon promé mi subi avion. E blog aki kon ku para keda lo sali djamièrdè 12 or. Si mi no yega mi destino mi ke pa boso sa ku mi stima boso tur.

 

Felis wikènt

Advertenties