Abrakadabra, chanchan fantasma


Ora yunan di tera bai biba Hulanda, hopi bia ta duna nan esaki komo konseho: “Wak pa bo no bai Hulanda bai bira gordo”.

No ta tur hende ta bira gordo na Hulanda. Kontrali, tin hende ta baha di peso. Paso nan mes a disidi, paso nan a kuminsa move mas òf paso heimwee i strès a kome nan vet.

Klaro ku kada hende ta diferente. Esun ta keda sin kome pa motibu di strès, i e otro ta kuminsa fretu tur loke e haña.

3 aña pasá mi a bin biba na Hulanda. Nunka mi no tabata flaku. Pero gordo tampoko. Laga nos bisa diki. Hopi a bisami pa mi paga tinu riba mi peso. Ma asta fada. Ma kuminsa drai wowo i kontesta “haha awel si”.  Pero ora ma yega Hulanda ma lubida limpi kuantu nan a bisami pa tene mi kurpa  nechi i òrdènt.

Verano tabata tremendo. Kalor mes mes. Shòrt ku t-shirt tabata manda. Pero den un fregá di wowo e temporada ei a pasa. Bientu a kuminsa supla duru i friw. Awaseru a kuminsa kai sin fin. Shelu tabata mas suku ku e tabatin lus.  Bo por a rei kaba. Heimwee a dal nos tur.

Bo ta sali kas, lastra pia yega skol. Asina lès kaba, hansha bin kas pa bo subi kama skonde pa friw. Henter dia bo ta baha bo sintimentu amargo ku stroopwafel, buskuchi, chips, eiskrim, pizza i limonada. Tòg nan ta inkreiblemente barata.

Pa bo konsenshi, bo no ta kumpra un balansa. Tur luna bo ta gaña bo mes ku e no ta pas den bo budget. Despues di lunas i años bo ta kuminsa konvense bo mes ku peso no ta konta, pero ta kon bo ta mustra ta importante.

Si, klaro. Ma subi di peso.  “Bira gordo” no ta zona nechi. “Ma yena djis un tiki”. Preferibel esei.

Na aña 2015 mi a bai Kòrsou despues di dos aña. Mi por a konta riba un man ken tur NO a duna komentario di mi kurpa i k’oi sinta. “Heeee eeeehhh ba bira gordoooww!!” Si, como si fuera mi no sa. E kos ei no a kansami. Mi a hinka den mi kabes ku ya, nunka mi no tabata flaku i ademas esei ta kos ku nan ta bisa tur hende ku bin for di Hulanda.

Naturalmente mi sais di karson a kambia. Ma subi “djis” 1 sais. Mi a spanta djis un tiki asina. Despues mi a pensa ku ta kos normal i ku mi no mester wòri muchu ku e kos ei.

Te dia ku mi a fòrsa mi mes pa kumpra un balansa i subi esaki pa mira kiko ta pasando.

Mi a bin realisa ku den 3 aña mi a subi por lo menos 10 kilo. E konfrontashon aki tabata difisil. Ku awa na wowo ma disidi di kompromete mi mes pa drecha mi salú. Mi estatura ta chikitu pues mi mester wak mi peso bon.

Awor ku mi a baha bek, e mesun persona nan ku tabata tin komentario riba mi subida di peso, tin e kurashi di bisami den mi kara ku mi no mester baha mas. “Sino bo ta keda mane hende ku ta hala coca”. Of ku “bo chanchan a kasi disparse”.

Moral di e historia: Nada no ta bon pa hende. Nèt nèt nada.No biba purbando di komplase tur hende rondo di bo, hasi loke bo ta hasi pa abo mes.

knowyourmeme
source: knowyourmeme.com

Stima bo mes. Stima i kuida bo salú. Wak pa abo ta sintibo bon den bo kueru. Si bo ta sintibo bon, bo ta bria automatikamente. Kada wea tin nan tapadera pues no preokupabo muchu. Disfruta di bo bida, ta di bo e ta i ta un so bo tin.

Nicole

Advertenties

2 thoughts on “Abrakadabra, chanchan fantasma”

  1. Danki Nicole pa un tremendo opservashon. Mi no por a keda sin hari e asuntu di kumpra balansa pasobra e stail di struisvogelpolitiek ei parsemi hopi. Great ku bo no a rabia ora ku ba bin bek i ku bo ta tende : ba bira gordoo, pasobra mi sa di hende ku ta kunsumi bira masha onsportief.
    Anto loke bo ta bisa:Wak pa abo ta sintibo bon den bo kueru. Si bo ta sintibo bon, bo ta bria automatikamente, mi ta kompletamente eens ku bo, ta bo mester sintibo bon, sobrá su asuntu, pasobra ta berdat ku nunka bo no por hasi tur hende kontentu. Bendishon!

    Like

Geef een reactie

Vul je gegevens in of klik op een icoon om in te loggen.

WordPress.com logo

Je reageert onder je WordPress.com account. Log uit / Bijwerken )

Twitter-afbeelding

Je reageert onder je Twitter account. Log uit / Bijwerken )

Facebook foto

Je reageert onder je Facebook account. Log uit / Bijwerken )

Google+ photo

Je reageert onder je Google+ account. Log uit / Bijwerken )

Verbinden met %s