Laga redu òf puntra bo mama

source: www.lifehacker.com

Bibando na un otro pais, ta lógiko pa bo integrá den e pais. Esaki bo ta hasi siñando nan idioma, konosiendo nan kultura i tambe kustumbernan.

Sinembargo, tin sierto kosnan ku bo a wòrdu lantá ku n’é ku a ankra te den bo igra i ni maske kiko bo hasi òf unda bo bai, nan lo keda den bo te dia ku nan hisabo pareu.

Esaki ta trese ku n’é ku bo por irita bo mes imensamente na sierto aktonan i aktitutnan di otro hende. Pero bo ta hañabo ta guli manda abòu tin bia tòg ora ta trata di un diferensia di kultura. Paso ya, mane mi mama sa bisa nos, bo no por bai den lugá di hende bai traha nan lei.

Hopi biaha mi ta skohe pa no reakshona mesora riba sierto kosnan i djis analisa promé.

Loke mi ta bai konta aki, mi a kere pa hopi tempu ku ta diferensia kultural. Pero awor mi a realisá i konfirmá ku no ta djis diferensia di kultura pero hende riba nan mes.

For di chikitu nan ta siña nos pa no keda wak hende muchu largu ni no koba den kos di hende. Paso no ta di abo. Simpel.

Derechonan humano ta duna tur individuo riba e mundu aki derechi di privasidat. Esei ta un konsepto amplio. Bo por huze pa defende bo mes ora bo marí ke koba den bo telefon pero tambe den kasonan mas serio ku por resultá dilanti di hues. Pero que hubo di e hendenan ku ta wak den bo telefon of kompiuter sam sam ku bo ora bo ta sinta den un espasio publiko? Ta kos pa daña mi henio den un fregá di wowo.

Wèl siman pasá mi tabata sintá den klas na skol. Na un skol kaminda supuestamente tur hende tin dòs plaka di sintí pa sa kiko por i kiko no por.

Ami ku mi amiga tabatin un kombersashon sumamente interesante i personal alabes riba whatsapp. Na un dado momento mi telefon a paga i mi a sigui e kombersashon riba facebook. Un dams sintá banda di mi, enbes di atende su mes asuntu i e sí paga tinu den lès, e ta disidi ku e ta bai lesa kiko mi ta papiando ku mi amiga.

Klaro, mi ta un tipo di fenómeno eksotiko kaba riba mi mes. Kueru maron, kabei krul, di un pais ku playa bunita. Dikon no koba den mi asuntu numa pa diskubri ki tesoro mas mi tin skondí?

E kombersashon tabata na papiamentu, hulandes i un tiki ingles. E jufi aki den su konfushon a lubida ku ta redu e ta wak, ku ta stelashi di hende e ta kobando aden, i ku no ta su asuntu loke mi ta papia ni na kua idioma mi ta papié, i el a bira puntrami ku su kara di sanosente “wat voor taal is dat eigenlijk?”.

Kualke bon yu di tera lo a bira wak e i respond’é “De taal van je moeder”. Pero mi no a hasi esei. Ma djis bira wak e. Mi kara só tabata sufisiente kaba.

2181e8a577008bafbccfe199572d448184fc1657e468211456dd69e3f0af6b59
source: http://www.quickmeme.com

Como si fuera basta, un otro kolega di skol ta yega riba un otro dia i kue mi laptop. Kuminsa habri mi tab nan un pa un i wak kiko mi ta hasi riba internet. “Ang no, djis mi ta wak ta ki model di paña bo ta kumpra online”. Esei bo por puntrami tambe, òf nò?

Lamentablemente mi no por mira esaki komo diferensia kultural mas. Den mi bista ta un falta di rèspt pa bo bai den kos di hende sin nan pèrmit. Pues mi ta skohe pa no generalisá i atribui esaki na un kultura. Simplemente tin hende porko i sin edukashon na e mundu aki.

 

Pueblo, purba kontene boso mes ora gana di sa redu ta subiendo boso kabes. No para bira spetakel asinaki.

 

Nicole