Kòrsou ta bunita..


Despues di dos siman di fakansi mi tei bѐk na tera friu. Basta friu porsierto tambe. Awor aki ta ‘Herfst’ kaminda tur blachi a kuminsa kai for di palu i riba kaya bo ta mira tur tipo di blachi maron te hel. Hopi bunita pa mira pero e friu si ta kansa bo, mas si bo a kaba sali for di Kòrsou ku ta 30 grado. Den e simannan ku mi tabata na mi dushi isla mi a ripara yen kos, pasa den situashonnan laf i asta mi tabata furioso riba sierto kompanianan ku no tin ni sentido di menshoná.  Loke a kaptura mi atenshon mas tantu ta e bunitesa di e isla den su totalidat.

Kada aña ku mi bai Kòrsou ta ѐgt pa mi famia i amistadesnan di mil kampaña. Mi ta purba pasa mas tantu tempu posibel huntu ku nan i tambe landa, sinta wak solo baha i tende e zonido di laman. No tin nada ku por iguala esaki. Tur ora nos ta reklama ku kosnan no ta kana bon riba nos isla. Esaki ta bѐrdat mirando ku tin hopi kriminalidat. Pober ta hòrta pober i riku ta sigi bira mas riku. Tin un pobresa ku dia pa dia mas hende ta kompartí pa otro mira riba internѐt. No esei so pero e pobresa ta visibel riba kaya, den barionan i asta den nos sentro di siudat. Nos polítikonan ku ta aktua manera mucha chikí no kier traha ku otro, ta gaña riba otro pa saka esun fo’i koalishon, hòrta for di pueblo, priminti nos yen kos sin kumpli na final. Pueblo ta bruá i no sa kiko mas tin ku kere. Na nos komunidat ku gusta sensashon i bòmbòshi tambe bo por mira ku kosnan no ta bai bon. Sierto ta prefera kana tur na paña di marka i biba den kas ku ta serka di basha den otro. Un bon refleho di nos dushi hendenan bo ta mira na ‘Oompie su inbox’ di tur siman.

Hopi kos menos bunita ta pasando na Kòrsou, pero esakinan tapa motibu di nos mes hendenan. Nos pida baranka riba su mes ta un bunitesa total. Mayoria di nos ku ta biba riba dje no sa di balora e bunitesa paso esei ta e úniko ku nos a lanta mira, nos no konose otro. Bishitantenan di eksterior sí ta miré mes ora. Ami ku ta biba na Hulanda ta miré kada aña ku pasa mas i mas. Nos tin diferente playanan bunita ku awa blou kla, piskánan kolorido, santu blanku i solo skѐrpi. Kosnan ku hopi ta desea di tin tur dia.image1

Nos tin un panorama masha bunita mes ora nos subi i baha nos Julianabrug. Tantu den dia komo anochi. Otrobanda i Punda tur na koló ku ta reflehá e hende kaluroso ku un bon Yu’i Kòrsou ta. Nos por planta nos mes fruta i bѐrduranan riba nos tera, kual nos mester kuminsa hasi mas. Nos tin nos seru di Christoffel ku nos por subi, para mei mei di nubianan, wak kilometernan leu riba nos isla i oceano ku ta rondoná nos. Hopi bista presioso nos tin ku por hòrta bo kurason.

Tin ora bo no ta para ketu na e kosnan bunita ku bida ta duna bo ni e kosnan ku bo tin. Un ehѐmpel, portá tin yen shushi riba kaya pero e un flor ku nase mei mei di nan ei por kaptura bo bista i hasi bo kontentu. Sea e flor ei pa bo pais. Den tur kos mahos ku pasa keda mira e parti positivo i keda ku speransa ku kosnan bon ta na kaminda. Ami no kier pѐrde fé. Tin kosnan ta desapunta mi di pais Kòrsou pero lo mi mantene fé ku kosnan lo kambia di direkshon. Portá no awoki pa ami, pero despues pa mi yunan.

image5

 

Ser un ehѐmpel pa otro, enkurashá otro pa bai dilanti, apresia loke bo tin pa mas bendishon por bini pa bo. Kòrsou no ta ami ni abo so, e ta nos tur!

 

Ku amor,

Richailine Elisa

 

Advertenties

Auteur: raedreamer

Mi a sali Kòrsou na aña 2011 pa bin studia na Hulanda. Un soñadó mi ta yama mi mes, paso dia mi a sali mi pais mi tabata tin soñonan grandi sin pensa den kuantu kos mi por pasa aden pa logra esna’i. Awor aki mi a lanta fo’i soño i mi kier kompartí mi eksperiensianan ku mas hóben. Realidat no ta asina bunita manera bo ta soñ’é. Mi a kaba e aña aki ku un dimi estudionan kual ta un acteursopleiding, mi ta ofisialmente Aktris. Culturele en Maatschappelijke Vorming ta mi di dos estudio, i esei mi ta trahando riba dje pa kaba tambe. Dos opleiding den un mi a hasi. Ku mi blog mi ke konsientisá hóbennan ku ta bin biba akinan òf ku ta biba akinan kaba. Sí bo no ta bin biba akinan, e blog aki tambe ta pa abo paso mi ta bai toka hopi otro temanan ku por siña òf yuda abo tambe. Pa ami ta hopi importante duna mi aporte na yuda forma nos generashon nobo. Mi no por kambia mundu, pero si mi por yuda mi mes pueblo. Ora bo ta leu bo ta wak hopi kos otro i sigur loke por mihó. Mi stima mi paraiso chikí..

Geef een reactie

Vul je gegevens in of klik op een icoon om in te loggen.

WordPress.com logo

Je reageert onder je WordPress.com account. Log uit / Bijwerken )

Twitter-afbeelding

Je reageert onder je Twitter account. Log uit / Bijwerken )

Facebook foto

Je reageert onder je Facebook account. Log uit / Bijwerken )

Google+ photo

Je reageert onder je Google+ account. Log uit / Bijwerken )

Verbinden met %s