The sheep is live now!


Den e tempu di awor hopi di nos kier ta artista, nos kier atenshon, nos tur kier hopi plaka i nos no tin kunes kiko hende pensa di nos. Hende kier fama dor di hasi nada òf jùist bai ku e multitut ku ta biba den un mundu di fantasia. Nos ta biba den un tempu kaminda muhénan ta kòrta orea mas tantu ku hòmbernan mes i no ta importanan ku nan ta haña un nòmber mahos den boka di pueblo. Awor aki tambe hòmbernan ta papia mas tantu ku muhénan i no tin berguensa pa hende sa ku nan boka ta mas lòs ku un panty sin elastik. Kada dia e ta bira mas visibel.

Bo no ta tende hendenan ta sinta papia nan ku nan bou di palu òf den bario mas. Nan ta graba pa otro hende tambe por mira i skucha. Skucha, esaki espesifiko. No pa nan konosínan òf hende di konfiansa nan ta hasié pero pa tur ku tambe ta interesá i ta biba bida di otro. ‘Laga nos ban duna nan mas kos di papia’ – ta e mentalidat. ‘Fuckboy’ òf ‘bad bitch’ ta e palabranan nobo den nos dikshonario pa splika kiko ta hende hòmber i hende muhé. Nos kier ta mas duru posibel. No na saku so pero tambe na sintimentu. Bon ya, esei hende kier laga mustra aworaki.

Riba Facebook tin un fenomeno ku ta asotando tur kas di famia. Ni maske bo kier bo no por sera wowo p’é i hasi manera bo no a mira paso bo ta keda haña un ‘notification’. Mi ta papiando di baimentu ‘LIVE’. Asina Wambimba bai live bo ta haña un notifikashon ku: ‘Wambimba is live now’. Mi ta haña masha great ora un hende kier promote su fiesta, su negoshi, ora e mustra kiko e ta hasiendo pa e bai dilantu den bida, ora e ta mustra su hobby òf portá e ta den un bemben i kier kontagiá otronan ku su alegria. Tambe tin biaha si un persona kier kompartí algu positivo ku otronan òf portá e kier motivá un otro pa bai dilanti. Si bo hasi uzo di e opshonnan aki mi ta habri bo video ku smak. Esei ta ami.

Lamentabel ta ku ta tiki ta e hendenan ku ta uza baimentu di live pa promote algu ku tin sentido. Tin diferente tipo di hende ku ta bai live awendia:

  • Esunnan ku no tin nada di hasi i ta buska kombersashon dor di bai live. Ora nan ta live nan no tin nada di bisa i ta puntra hende pa bin ku un topiko.
  • Esunnan ku ta den fiesta i ta sintinan laf pero kier mustra ku nan ta na e fiesta pasando ‘bon’.
  • Esunnan ku ta bai live pa bo keda wak den nan buraku di nanishi paso nan tin e kamara poné malu.
  • Esunnan ku ta kuminsá ku un topiko pa papia riba atras di otro hende na lugá di papia di nan mes bida.
  • Esunnan ku ta sinta mira kuantu view nan tin i ken ku ken tur ta wak nan.

facebook-liveimage-1

No ta pa kibra ningun hende paso mester siña biba i laga biba. Bѐrdat, tur rason. Pero nos no por bira lomba pa e bѐrdat ku yu’i Kòrsou semper kier hiba un trend ‘next level’ òf hasi abuzu di dje. Pa dia hopi hende mes ta bai live i ora bo habri e kos ei, no ta nada ku tin un tiki sabiduria aden. E tristu ta ku no ta muchanan i hobennan so ta bai live pero hende grandi tambe. Nos mester siña uza teknologia un tiki mas konsiente i baha man na sigi tur kos ku nos mira paloko manera karné. Mundu ta basta konfundí kaba, purba keda bo mes i no pѐrdѐ bo mes den e multitut.

 

Ku amor,

Richailine Elisa

 

 

 

Advertenties