Chèk e prima su joya, pero no bai zoyá den Acoya


Drumi den freskú riba mi stul kantu di pisina den kura, notification ta drenta riba mi telefon. Mi ta biba otrobanda di mundu, pero ora un Yu’i Kòrsou mester pasabo un boka di redu, e koi ta yega mas rápido ku Churandy por kore 200 meter. Mi a bira kara wak e telefon i lesa : Dji B na kareda riba Dr Maalweg. Mesora mi a dobbèl klik habri e mensahe. Na Kòrsou nunka nan a mira e dos “vinkjesnan” bira blou asina lihe.  A resultá ku esey tabata tur e “notisia”.  Ami a keda tur dudá paso mi konosé dos Dji B. Unu a bira masha skàrs foi dia e la drenta un sekta i kambia su bida. E otro ta un gran atleta, pero e lo mester a hasi un “valse start” si ya kaba e ta kore e ruta di FatumLoop. Tan ten mi tabata kibra mi kabes pa saka afó ta kua di nan dos ta na kareda, e siguente mensahe a drenta: “Muhe su tras ku bate den man mane Beyoncé den Lemonade. Gará Gará ta!

Miéntras shon ta den palasio, djaka ta den su mangasina

E blog aki ta inventá, pero e ta inspirami pa hasi un investigashon chikí i puntra mi amigu Google ku nunka ta keda debemi un kontesta:

Ta kon ta korta orea manera un profeshonal?

Sabiendo ku mi ta kanando riba e liña fini ku ta parti moral foi inmoral, permitími komparti tur lokual mi a enkontrá i siña aki:

  1. Praktika konsistensia. For di inisio krea e struktura den bo relashon kaminda un anochi den siman o weekend bo ta praktiká un deporte, hobby, capoeira, yoga, bai gym i asina bo tin un motibu di ta foi kas.
  2. No kustumbra bo paraha ku boso mester papia tur dia mainta, merdia, atardi i anochi. Manda message. Ta muchu mas fásil manda message ora bo ta operando undercover enbes di yama i papia.
  3. No krea amistad ku su amiga o amigunan. Menos hende konosé bo, menos hende lo rekonosé bo
  4. Distingui e industria ku nan ta labora aden. Abogadonan por ta kaba ku otro dilanti mesa bèrde, pero na Kòrsou tur konesé otro.
  5. No frekuentá establisimentunan konosí i evita kontaminashon. Si bo “main squeeze” ta regularmente den The View, e ora ey ta De Fles bo tin ku hiba “shorty”
  6. No konta niun hende. Un bon soldat no ta papia. No konfia niun amigu, tata, bisiña, kolega, líder di partido o pastor Simon. Nan lo konta maske ta un hende mas i prome ku bo realisá Kòrsou kompletu ta sa.
  7. No husa credit card pa niun transakshon. Transakshonnan manera pago di hotel o ticket pa Boneiru ta visibel riba bo statement. C-post lo entregá e karta ey nèt ora bo no ta na kas.
  8. No duna akseso na bo telefon. Telefon ta bo enemigu di mas grandi. 90% ta keda gará pa motibu di telefon. Ta pruebá ku den 60 sekònde un muhe ta scan bo telefon mihor ku wardakosta riba barku di fruta.
  9. Si bo mester usa bo telefon, sa ku tin app spesialmente pa skonde chats i potrèt tras di password miho ku e paspoort di Gerrit Schotte. Ademas bo thot su nomber den bo telefon tin ku kambia bira aka Franco Mobiel, Franco Trabou o Franco karpinté ( Klabadó)
  10. Si ahinda bo “Find my phone” ta aktivá, ta meskos ku Wilsoe invita bo bin kome piska na Mariepampoen. Hisa parew.
  11. Traha un email account speshalmente pa komuniká ku “forever #2”. No usa e email aki pa nada otro. Hasi e proseso di log out, delete temporary files i clean bo history (50%) un rutina. Zero history ta sospecho. Ojo
  12. Planea bon ki ora bo ta “plama lechi di direkteur”. Si bo sa ku bo kanika mester di dos dia pa yena i señora gusta su glas half vol, spar delaster un gota.
  13. Nunka trese “shorty” na bo mes kas. No ta importa si bo pareha ta leu i e mester kue 5 vuelo pa yega kas. Un muher por tin jet lag mes pero e ta rekonosé su peruvian foi tur otro mesora.
  14. Djòin un gym ku ta keda habri te lat. Asina riba dia di bo hobby (mira punto 1) bo por yega kas dushi bañá sin lanta sospecho. Ademas den gym o yoga ta normal ku bo ta paga bo telefon.
  15. Apartá bo protekshon i warde den bahul. Nada no ta lanta sospecho mas lihé ku un kondon di menos den bo lachi o un paki nobo nobo di 24. Niun hende no ta kana ku paraplu den Sahara.

Cheating-by-thebumbers

Ta keda na kada ken pa sa kon nan ta biba nan bida. Pero si bo ta kasá kune pero loko pa su prima pensé dos biaha prome, paso un dia nan lo garabu broder! I lo bo baila pio ku defuntu Plu.

Si bo no ta felis den un relashon, traha pa mehoré, kambia bo bida o laga lastra! Kortamentu di orea no ta e solushon. Esfuerso ta duna bida stansha.

PS: Huza e puntonan aki manera bo kièr. bo por kontrolá tur. Pues si sumpiña hinkabo, ta bo mes a bai kaminda e ta!

Advertenties

Auteur: Endilo Lourens

Un Yu di Kòrsou biba na Singapore ku for di e punto di bista personal lo kompara e situashon di Singapore ku esun di Korsou indikando di un manera positivo e lesnan ku Korsou por siña y ehekutá pa drecha e kalidat di bida di Dushi Kòrsou.

One thought on “Chèk e prima su joya, pero no bai zoyá den Acoya”

  1. Hi Endilio
    Kada bes atrobe mi ta keda asombrá di bo forma di skirbi. Bo komparashonnan ta hopi real i chistoso.
    E kurso di korta orea lo demotivá homber i muhé pa bai praktiké. Muchu kos pa tene kuenta ku ne.Mi ta spera ku nos parehanan lo skohe pa fieldat i invertí energia den aktividatnan ku lo kontribui na pas mental i felisidat.

    Like

Geef een reactie

Vul je gegevens in of klik op een icoon om in te loggen.

WordPress.com logo

Je reageert onder je WordPress.com account. Log uit / Bijwerken )

Twitter-afbeelding

Je reageert onder je Twitter account. Log uit / Bijwerken )

Facebook foto

Je reageert onder je Facebook account. Log uit / Bijwerken )

Google+ photo

Je reageert onder je Google+ account. Log uit / Bijwerken )

Verbinden met %s