Kosnan ku ta hasimi doló


Mi no por sigui ignorá mi mes mas.

Zonido ta hasimi hopi doló, manera ora un hende huñabo den bo kara òf ora bo trapa riba anglo òf ora bo bolbe dal bo pia na punta di e bendita kashi pa di mil bia sin ku e sla di bia pasá a kaba di fria ainda.

Pero zonido ta kalmami tambe, manera ora mi drenta den un tobo di awa lou i un bisiña leu ta toka un longplay di big band di añanan 20 òf ora mi por dera mi pianan den santu despues di a forsa kana dèftu henter dia riba sapat’i hilchi.

Zonido por dunami agonia, manera ora un hende a kaba di hòrta mi tas fo’i mi i mi ta mir’é ta kore bai ku n’e i ma kaba di lanta tur mi salario.

Zonido ta ponemi haña nervio, manera ora nan keda tentabo ku un kos dushi na punta di kuchara, tres’é te dilanti di bo boka, kaba hal’é atras nèt promé ku bo logra hap e.

Anto tòg zonido por hasimi kontentu, manera ora mi sali trabou pa bai disfrutá di un “long weekend” òf e momentu ku nan yama nos komo pasaheronan di tal vuelo pa pasa na tal gate i mi ta bayendo un lugá ku mi no konosé ainda.

Hopi lo no komprondémi paso mi ta haña ku nan ta robòt, mester ta ku nan no ta sinti nada, nan zonido ta yega te na nan orea i kai kibra na filingrana abou band’i nan pia, pero di mi si ta keda zona, e ta keda kana manera vruminga dor di mi kabes, òf kore manera awa na mi garganta, kishikí mi kurason òf keda lora rondó di mi lombrishi.

Niun hende no ta mira kiko mi tin, kiko mi ta sinti, kon mi ta bira, kuantu mi ta fòrsa, “ik doe echt m’n best”, keremi, pero mi no por sigui ignorá mi mes mas: mi tin Misophonia i mi no por ku bochincha!! Hende ku ta papia duru mester haña but! Mi no por ku bo stèm yorá i ral aunke di mi tambe ta asina, p’esei mi ta sera mi boka si mi no tin nada na drechi di papia. Mi no por ku e manera ku bo “s” ta zona, bo tin un kos ta zona tras di bo stèm ku ta ras den mi kabes, bo komementu miéntras ku bo ta papia ku mi na telefòn ta kasi ponemi saka, mara ora por para mes, djis pa mi no tende e oloshi hasi tek, tek, tek.

Por fabor kou bo bals ku bo boka será i 10 meter for di mi, mi ta tende kon skupi ta wòrdu kreá bou di bo lenga pa yudabo fòrsa bo djente grandinan riba un pida rùber. No kou tapa di pèn, mi no ke! Sino mi tin ku lanta, kana bai te kaminda bo ta, si, e por ta 100 meter mes, mi ta tendebo! Mi no ke ponebo guli e kabes di pèn ei, aunke m’a trein ratu kaba den mi kabes kon ma pasabo un wanta, djis pa bo stòp di hasimi doló. Bo no sa mes. Bo no ta mira mi kara? Bo no ta komprondé? Ora abo ta sinta wak leu i keda primi e chanchan di e pèn den bo man, ta manera ami ta sinta lagabo keda bora mi wowo ku kada primí di e pèn. Ora bo ta kanta den bo mes ta manera bo tin un kangu mará na mi kabes.

Mi no por sigui ignorá mi mes mas. Ta kuantu suku bo a pone den bo te ku bo tin ku drei e kuchara 2,734 bia i mei pa e suku larga? Pa malu bo ta kumpra mangel ku papel krish krish pa ora bo ta sintá den misa bo habrié nèt ora pastor ta bai kuminsá papia, bo ta pone mi nòh… Dios pordonami! Si bo no por kana riba sapatu di hilchi por fabor kana pia abou paso e stail ku ta bo kana ta manera un hende ta pui mi ku un tutpik den mi lombrishi. E ta hasi doló.

Ora un hende ta maniak, bo no ta riska kana ku saya chikí su dilanti pa e no kue bo tene, dikon bo ta riska kanta falsu pareu ku e radio den mi besindario anto? Bo no tin miedu di mi? Bo no sa kiko ma hasi ku bo den mi kabes? Mi tin Misophonia, zonido ta hasi mi doló!

Loke ta kalma mi i kita mi doló:

– Un blachi solitario ku ta bula den bientu
– E bai bin suave di laman mei mei di algun piedra
– Krakmentu di garganta
– Tur melodia den minor, mas melodia, mió
– Coca-Cola fresku bashá
– Ora bientu supla over di un vèlt di yerba
– Bonchi di Barb’i yònkuman den bientu
– Bientu mes!
– Bos ku welek
– Áwaseru
– Un kombersashon ameno
– Kita plèstik for di aparato nobo
– Un presentashon di un tokadó di jazz solitario
– Zonido di fèn
– Algun para ku ta kanta (den distansia)
Advertenties

Auteur: raedreamer

Mi a sali Kòrsou na aña 2011 pa bin studia na Hulanda. Un soñadó mi ta yama mi mes, paso dia mi a sali mi pais mi tabata tin soñonan grandi sin pensa den kuantu kos mi por pasa aden pa logra esna’i. Awor aki mi a lanta fo’i soño i mi kier kompartí mi eksperiensianan ku mas hóben. Realidat no ta asina bunita manera bo ta soñ’é. Mi a kaba e aña aki ku un dimi estudionan kual ta un acteursopleiding, mi ta ofisialmente Aktris. Culturele en Maatschappelijke Vorming ta mi di dos estudio, i esei mi ta trahando riba dje pa kaba tambe. Dos opleiding den un mi a hasi. Ku mi blog mi ke konsientisá hóbennan ku ta bin biba akinan òf ku ta biba akinan kaba. Sí bo no ta bin biba akinan, e blog aki tambe ta pa abo paso mi ta bai toka hopi otro temanan ku por siña òf yuda abo tambe. Pa ami ta hopi importante duna mi aporte na yuda forma nos generashon nobo. Mi no por kambia mundu, pero si mi por yuda mi mes pueblo. Ora bo ta leu bo ta wak hopi kos otro i sigur loke por mihó. Mi stima mi paraiso chikí..

2 thoughts on “Kosnan ku ta hasimi doló”

Geef een reactie

Vul je gegevens in of klik op een icoon om in te loggen.

WordPress.com logo

Je reageert onder je WordPress.com account. Log uit / Bijwerken )

Twitter-afbeelding

Je reageert onder je Twitter account. Log uit / Bijwerken )

Facebook foto

Je reageert onder je Facebook account. Log uit / Bijwerken )

Google+ photo

Je reageert onder je Google+ account. Log uit / Bijwerken )

Verbinden met %s