“K’oi chòmbòn OM ta hasi”


Medianan sosial, prensa, snèk, gym, trabòu, #younameit, tur a bira sentronan di diskushon. Diskushonnan supuestamente sano, pero kaminda amistatnan por asta kibra despues di interkambio di opinionnan fuerte i diferente.

Delaster dianan aki, ta lo siguiente ta punto di diskushon òf kombersashon den nos pueblo;

Un persona bastante konosí den nos komunidat a pone un vidio riba facebook kaminda e ta duna su opinion tokante un atrako kometí riba un politiko. E persona aki a duna di konosé ku e ta fadá di mira kon politikonan ta hòrta pueblo i keda ku nan libertat.

Den e siman ku a pasa aki, e persona aki a keda detené riba òrdu di ministerio publiko di Kòrsou pa “opruiing”.

Kiko  ta “opruiing”? “Opruiing” ta loke nos ta yama “instigashon” na Papiamentu. I e definishon hurídiko ta bisa ku esaki ta ensera kualke akto públiko, oral, por eskrito òf riba potret/vidio pa medio di kua ta enkurashá otro hende pa kualke akto kastigabel òf violento kontra outoridat públiko.

E detenshon aki a kousa un gran malkontentu serka nos hendenan. Tur hende ke huza nos libertat di ekspreshon i e echo ku nos ta biba den un pais demokrátiko komo argumento pa kiko e detenshon aki ta un inhustisia kontra un siudadano.

Pa hopi esaki ta un muestra di opreshon. Hopi ta pensa ku ta “djis pasó ta tokante politikonan” ministerio públiko a aktua.

Ban wak e kaso aki di un perspektiva kalmo i obhetivo.

Nos kompader a presenta su opinion ku un bon argumento. Algu ku sigur a pon’é gana simpatia di hopi hende. Nos tur ta kansá di mira inhustisia pasa ku nos pueblo. Niun hende no ke sigi mira korupshon pasa di dia kla, den nos kara, “na fini”, sin ku nada ta bin afó.

Sinembargo, di un perspektiva penal el a pinta di no a “djis duna su opinion”. E problema a kuminsa ora ku e charla a pasa di un dunamentu di opinion pa un enkurashamentu pa hasi, òf mihó bisá, sigui hasi loke a kaba di pasa. Ta akinan e vidio a bira material ilegal.

E no ta e promé siudadano ku ta keda detené pa instigashon. Motibu ku esaki ta keda konsiderá komo un akto ilegal ta pasó e intenshon di e charla riba su mes por pone orden i trankilidat públiko na peliger.

Pues nos amigu tabatin un opinion, unu fuerte, kual hopi di nos ta di akuerdo ku n’é, pero e enkurashamentu pa sigui ku kriminalidat a pone ku e situashon a sali for di man. Bon ta ku el a duna di konosé klaramente ku e no ta pro atrako. Esei por pone ku e ta sali kompletamente liber i inosente for di e kaso aki.

Enfin, nos por diskuti di awe te fin di mundu mes tokante e topiko aki. Pero mi ta spera ku nos tur a siña algu di esaki. Midi bo palabranan. Nos ta liber pa ekspresa nos mes pero esaki no mester bira un menasa pa nos prohimo.

free_speech_doesnt_mean_careless_talk_-_nara_-_535383
source: http://www.community.imgur.com

Nos tur ta hartá di korpushon, pues no stòp di duna bo opinion. No laga miedu di prizòn kita bo gana di ekspresa bo mes. Paso “djis opinion” semper lo ta legal i enkurashamentu di kosnan positivo tambe. Pues nos por sigui bringa pa pone un paro na korupshon, pero e bataya mester ta unu rashonal. Nos mester pensa promé nos papia i promé nos aktua. Keda ketu si no ta un opshon.

Manera Papa Godett a bisa: “Solo el pueblo, salva al pueblo”.

Nicole

Advertenties

One thought on ““K’oi chòmbòn OM ta hasi””

  1. E artikulo aki ta hopi bon skibi. E ta hopi balansá. A duna un analisis ku ni medionan di komunikashon, ku tey pa informa e pueblo, no a duna. Sin embargo, den e kaso aki tin un liña hopi fini ta kore entre opruiing i libertad di ekspreshon. Anto nos mester puntra nos mes ta kiko ta e motibunan real tras di e akshon aki di OM. Klaro ku OM ta bai huza argumentonan huridiko pa hustifiká nan akshonnan. Pero na mi opinion esaki simplemente tabata un muestra bajo di nan poder. E tabata un easy win pa siña e siudadano aki un lès ta ken ta autoridat. Pasobra ta fasil pa bai tras di un hende asina. Laga si tabata por ehempel defuntu Helmin Wiels. Mi ta puntra mi mes unda OM a keda dia defuntu Helmin Wiels a bisa ku makambanan ta bai bek Hulanda den body bag. Esey kisas ta pio ku opruiing, esey por hasta ta un menasa. Pero no a detené Wiels pa su ekspreshonnan. Dus depende ken bo ta bo ta wordu detené. Si bo mira tambe ku e meneer di e video aki no a ni aparese dilanti hues komisario pa huzga si su detenshon por wordu extendé, pasobra nan a lague bai promé ku e deadline ey a yega, ta kiko mi mester pensa di OM? Ta hurista nan ta, of no? E meneer aki a haña onmiddellijke invrijheidsstelling. Ta kosnan ku bo tin ku puntra bo mes. E kosnan aki ta duna’bo duda si emberdat ta pa opruiing na a detene of ta pasobra sierto hendenan klave den komunidat no a gusta e video aki i bou di kapa di opruiing a hasi un keho of algu por el estilo ariba kual OM a aktua. Ku otro palabra nan a malhuzá lei pa siñé un lès. Anto loke ta mas tristu ta ku prensa en general, kende mester ta e maksimo defensor di libertat di ekspreshon tabata hopi pero hopi ketu, siendo ku na mi pareser por hasi hopi interogatorio tokante di e detenshon aki. Huristanan meskos, pero nan a keda den silensio. Pasobra libertat di ekspreshon tin su limite berdat, pero e limite aki ta hopi spesifiko i hopi difisil pa alkansa sino no tin demokrasia. Chek por ehempel artikulo 10 di e tratado di derechinan humano EVRM den kual derecho di ekspreshon liber ta ankrá. Inkluso bo por provoká, bo por eksaherá, bo por ofendé bo por shock. Tin demasiado indikador den e kaso aki pa bo miré solamente for di e punto di bista penál kual ta opruiing. Ministerio Publiko mas bien por yama nan mes MISTERIO PUBLIKO (ban spera nan no bin pami awor)

    Like

Geef een reactie

Vul je gegevens in of klik op een icoon om in te loggen.

WordPress.com logo

Je reageert onder je WordPress.com account. Log uit / Bijwerken )

Twitter-afbeelding

Je reageert onder je Twitter account. Log uit / Bijwerken )

Facebook foto

Je reageert onder je Facebook account. Log uit / Bijwerken )

Google+ photo

Je reageert onder je Google+ account. Log uit / Bijwerken )

Verbinden met %s