Bagabunderia na gran eskala


Hende tabata haña sierto susesonan ku ta pasando awor aki bergonsoso, nan tabata tabú antes. Kosnan ku na kas bo ta mira pasa òf bo ta tende di nan proménan aya, awor aki bo ta hañanan live mira. Sea bo mes ta presensiá nan òf bo ta hañé riba internѐt. Sierto hende ta bisa ku na Kòrsou mester kuminsá stòp di hasi rídikulo, stòp di kritika hendenan ku kier biba nan bida manera nan ta haña ta bon i stòp ku mentalidat di kouchi boulo. Nos tin dos tipo di mentalidat: sea bo ta e persona ku ta ‘full eens’ ku algu òf bo ta esun ku ta full kontra i no ta bayendo ku e tempu (hater). No tin un opshon entre e dosnan aki paso nos ta hendenan di pensamentu ekstremo, mentalidat ‘zwart- wit’ i komunidat ku malesa di karné (sigi kiko ku ta).

Lastu mi a haña un video mira riba mi what’s app kaminda hendenan ta baila masha mahoso mes riba kaya den multitut di hende. Ora mi a habri e video mi a kere ku ta hendenan di Jamaica tabata baila pero ora mi a tende e músika mi a bin ripara ku ta Tambú. Kiermѐn ta na Kòrsou mes. Mi a keda bisa e persona ku a manda e video pa mi ku imposibel ta na Kòrsou e kos aki ta pasando. Riba videonan di hendenan di afó mi ta mira hende baila asina. Jamaikino nan ta baila brutu, baila ‘dirty wine’. Nan tin e bailá ku e hende hòmbernan ta baila ku e muhénan manera ta sѐx nan ta sѐx ku nan pero ku paña na nan kurpa. E muhénan na nan turno ta hasi loke e hòmbu bisanan hasi, asta drumi abou habri pia hanchu habrí, pa despues e hòmbu bula riba nan i hasi yen tipo di kenshi. No ta un bista!

jama      jama1jama2

E bailá aki ta un baile típiko di e kultura di Jamaica. Pa nan no ta nada straño paso ta asina nan ta baila den club tambe. Nos no konosé e tipo di baile aki na Kòrsou. No ta di nos e ta. Tambú ta di nos i e baile ku ta bin kuné mes ta wòrdu konsidera komo bulgar i problematiko pero e ta parti di nos kultura. Remarkabel ta kon tur hende pará rondó di e hendenan ku tabata baila e baile bulgar aki tabata filma i hari pero niun hende unta bisa ku no por. Asta kantadónan di Tambú ta ‘hype up’ e akto aki. Atrobe nos tei kuminsa hasi ‘monkey see, monkey do’? Di esei tambe nos a kuminsa sufri awor? Kosnan a bai asina leu ku ta parse ku nos a degenerá mentalemente tambe.

Hopi bon ku nos ta purba kibra e tabúnan ku tin riba e isla pero esei no kiermen ku nos mester tuma tur akto indesente. Muhénan a empansipá, e generashon aki ta otro, tempu a kambia, sѐx ta bende i hende ku poko sintí no ta konta mas pero kosnan ekstremo ku no tabata nòrmal promé, awor aki sí ta nòrmal. Niun hende no mester ta edukadó pero rѐspѐt pa bo mes mester por keda den tur situashon i na tur momento. Tipo di aktonan asina no ta aseptabel ni maske kuantu argumento bo disidi di pensa. Mi ta puntra mi mes si e hendenan aki no tabata tin amigu òf famia den nan serkania pa bisanan ku loke nan ta hasiendo no ta bunita.

Awendia nos no mester kanta ‘Mama wak bo yu’ mas, si no ‘Yu wak bo mama’ paso hende grandi nan mes ta komportanan mes komo mucha. Mundu a ofresé nos asina tantu libertat ku nos no ta mira e diferensha entre bon, malu i NO POR mas!

 

Ku amor,

Richailine Elisa

Advertenties

Auteur: raedreamer

Mi a sali Kòrsou na aña 2011 pa bin studia na Hulanda. Un soñadó mi ta yama mi mes, paso dia mi a sali mi pais mi tabata tin soñonan grandi sin pensa den kuantu kos mi por pasa aden pa logra esna’i. Awor aki mi a lanta fo’i soño i mi kier kompartí mi eksperiensianan ku mas hóben. Realidat no ta asina bunita manera bo ta soñ’é. Mi a kaba e aña aki ku un dimi estudionan kual ta un acteursopleiding, mi ta ofisialmente Aktris. Culturele en Maatschappelijke Vorming ta mi di dos estudio, i esei mi ta trahando riba dje pa kaba tambe. Dos opleiding den un mi a hasi. Ku mi blog mi ke konsientisá hóbennan ku ta bin biba akinan òf ku ta biba akinan kaba. Sí bo no ta bin biba akinan, e blog aki tambe ta pa abo paso mi ta bai toka hopi otro temanan ku por siña òf yuda abo tambe. Pa ami ta hopi importante duna mi aporte na yuda forma nos generashon nobo. Mi no por kambia mundu, pero si mi por yuda mi mes pueblo. Ora bo ta leu bo ta wak hopi kos otro i sigur loke por mihó. Mi stima mi paraiso chikí..

4 thoughts on “Bagabunderia na gran eskala”

  1. Komo un sosiologo mi ta konstata ku esaki tin di haber ku e krisis di identidat ku nos pais ta konfronta kune. E konsepto “cultural appropriation” ta konta pa tur pais, pero dor di nos historia kolonial nunka nos no a echt logra defini e kultura Kurasolenjo. Ku konsekuensia tur kos ku ta popular, nos tambe ke ta bon den dje. Un ehempel di esaki ta ku na Korsou nos ta kere nos por baila bachata miho ku e Dominikano nan. Na mi opinion a yega ora pa nos echt ta sinsero ku otro i defini un kultura (maske kon difisile debate nashonal lo ta).

    Liked by 1 persoon

      1. Den diferente buki basiko di sosiologia bo por sinja kon identidat di hende individual i di un pueblo ta wordu forma (Sociology di Anthony Giddens ta un bon komienso).

        “Curaçao, 30 mei 1969: verhalen over de revolte”,ta un bon buki pabo lesa tokante e kultura di korsou. Via di e link aki bo por download e buki ; ): http://www.academia.edu/11413110/_ed._Cura%C3%A7ao_30_mei_1969_Verhalen_over_de_revolte._Amsterdam_Amsterdam_University_Press_1999

        Den e buki e autor ta resumi lokual ku a pasa na 30 di mei, pero tambe e ta papia trinta anja despues ku diferente akademiko, profeshonal i hende nan ku puesto haltu den nos komunidat. Nan ta analisa kiko a pasa i dikon e pueblo (ku tur hende a kere ta mansu) por a eksplota di e forma ey. Tin hopi faktor ku nos no ta para ketu riba dje (of miho bisa nos no ke para ketu riba dje), a hunga un rol den e kreamentu di e kultura Kurasolenjo i vooral di e hende di e klase social abou. Diferente punto di preokupashon a bini dilanti pa loke ta trata nos kultura, pero lastimamente te ku dia di awe nan no a wordu “aangepakt”.

        Saludos,

        Liked by 1 persoon

Geef een reactie

Vul je gegevens in of klik op een icoon om in te loggen.

WordPress.com logo

Je reageert onder je WordPress.com account. Log uit / Bijwerken )

Twitter-afbeelding

Je reageert onder je Twitter account. Log uit / Bijwerken )

Facebook foto

Je reageert onder je Facebook account. Log uit / Bijwerken )

Google+ photo

Je reageert onder je Google+ account. Log uit / Bijwerken )

Verbinden met %s