1-2 is geen 3 hoor!


Nos tur gusta mustra representabel, nos tur ke ta “alguien” den bida. Pero kiko ta pasa si e kareda di “alguienheid” ei kuminsá kostabo bo bida mes? Lo bo sobra “algo” te pa bo ta “alguien”?

Nos kultura semper a para pa: ‘Sea kontentu ku loke bo tin i traha duru pa logra loke bo kier’.

Tur hende ta bai skol, siña pa bira algu pa asina nan por kontribuí positivamente na e komunidat, wòrdu pagá pa e kontribushon ei di manera ku nan por kumpra loke nan mester pa por disfrutá di bida. Esei ta normal! 1+1=2!

Pero kiko ta pasa ora ku un hende pretendé ku e mester tin algu ku e no por yega na dje òf ku no ta di dje? Stail di kòrta nanishi, daña kara. Ki ta e motivashon? Kiko ta sosodé ku salú di su famia si e ta skohe pa gasta loke e tin na algu ku ta duna plaser temporal enbes di invertié den su famia ku e tin pa semper? 1-1=0!

Ken bo ke gaña? Niun hende no tin e derechi di huzga niun hende basá riba kon kada hende ta gasta nan sèn. Pero e ta bira responsabilidat di un pueblo ora un mama di famia skohe konstantemente pa laga su yunan sin kuminda paso su uñanan i su kabei mester ta na òrdu “cueste lo que cueste”, e ta bira otro si un tata no por pone gasolin paso el a fuel su mes e anochi anterior. Ta bira un problema pa sosiedat kompletu ora un chabelito ku apénas por saka e kontesta di e título di e artíkulo aki ta pretendé ku si e no por yega na loke e ke, ku e por djis drenta den kas di un otro i kue loke e mester djis pa e bisa “mi tambe ta konta, mi tambe tin e”! 1-2=-1 mi shon!

Ken bo ke gaña? Señora bo no tin e status ei, bo ta riba ròl, un facade di make-up i bling bling pa gaña e tiradó di piropo ku no ta di bo! Mener bo no ta asina, bo no tin moda di manda tur hende rònt di serbes i broma nada na niun snèk paso ora bo yega kas, bo no sa kon pa komuniká ku bo famia! Chabelito bo no tin e “flatscreen” ei, ta di otro hende e ta, bo no a traha p’e! Damsita, bo no tin kurason di e kompai ei, ta un karchi di telefon so bo tin di dje i e tin kontròl riba bo flor. 0-1=-1!

E miedu/bèrguensa di no tin algu òf di no wòrdu rekonosé, ta bini di falta di balor propio (low selfesteem). Balora bo mes! Biba den realidat enbes di un bida di novela òf pelíkula! “Swag don’t pay no damn bills”!!! Invertí den kosnan ku tin balor berdadero. Bunitesa di bida ta den kosnan chikitu interno i no den buya temporal eksterno. Bo no ta muri si bo skohe pa paga un hende ku bo debe enbes di kumpra un sapatu mas pa bai un fiesta di 4 ora ku n’e pa despues bo tin ku kore skonde 4 luna largu pa bo kobradó no mirabo. Ki delitu bo tin? E hende ku bo a balia ku n’e no a ni mira bo sapatu paso e tabata muchu fuma. Pika! 1+2=3!

Nos ta biba muchu eksterno, pa otronan mira loke nos ke aparentá! Pa otronan gusta nos pa e manera ku nos NO ta. Pero ora un persona ke yega na e sentro di bo kurason òf sikiera den bo kas/kamber, e no por paso e zona ei no ta apto pa públiko. Ken bo ke gaña? Bin bei 1-2 is geen 3!

 

Skibi pa Nathaly Heyliger -Martina.

Advertenties