E Pos Bashí


E ultimo 1 aña i mei mi a skirbi 76 blog. Den hopi di nan mi a duna opinion skèrpi tokante susesonan na Kòrsou o trese ideanan dilanti ku lo por kontribuí na un miho Kòrsou. Tin di e topíkonan tabata asta kontroversial. Manera por a spera mi a haña basta message i comments riba e blognan. Tres kategoria di reakshon tin, Positivo; esta esnan ku ta “eens” ku mi i ku ta laga un mensahe kortiku atrás. Negativo; esnan ku no ta komparti mi opinión i ta laga un mensahe largu atrás. Silensio; E grupo di mas grandi ta esunan ku ta lesa sin laga niun komentario, like o share atrás. Mi sa di nan paso e statistiknan di Facebook ta mustrami delaster un detaye.

E grupo silensioso aki ta mas interesante ku e prome dosnan aunke mi ta apresia tur. Na mi pareser e ta mustra kon pueblo di Kòrsou ta hinká den otra. Un grupo chiki ta sea rebeldía, murmurá, kontribuí enfin laga nan bos zona positivamente o negativamente. Pero na mes momento un grupo muchu mas grandi ta skohe pa keda ketu i sigui riba kaminda BAU – Bida As Usual -. Delaster un hende den e grupo aki lo tin nan motibu pa aktua asina.

Ora mi hala atrás, bisti mi bril krítiko i generalisá, mi konklushon ta ku nos pos di “Fe den Desaroyo di Kòrsou” ta bashí. Ta mane nos ta den un tunnel pa basta ratu kaba sin ta mira e lus na final anto pesey konhuntamente Kòrsou a disidi ku ta bon asina. Kòrsou tine asina bon ku nos no sa mes ku por mihor. Nos tine asina bon ku hopi no ta sinti nan mes yamá pa move, ni subi kaya demonstra, ni duna prohimo un man mas. Nos sistema polítiko ta antikuá i nos polítikonan falta e vishon i liderazgo pa yuda solushoná e tantísimo problemanan struktural na Kòrsou.

Pa motibu di tur esakinan Kòrsou ta keda skohe prioridatnan robes. No laga nos gaña nos mes, lo no bin kambio tampoko paso banda ku un Gobiernu nobo no por kambia kos di awe pa mañan, tin muchu hopi hende ta probechando di e prioridatnan robes aki. E grupo inteligente ta keda ketu pa motibu di miedu i e grupo ignorante ta borotá masha konfidente.

Pa hopi porblema na Kòrsou sèn no ta e (uniko) solushon. Méritokrasia, esfuero, komunikashon, i simplemente un mente ku ta pensa den solushon enbes di problema ta yega mas lew i solushoná muchu mas ku nos ta pensa.

Pa SDK no tin sèn, henter aña muchanan no por a haña zwemlès.

Pa skolnan no tin plaka, pa bachelor opleiding di polis si tin.

Pa traha kruithuis no tin plaka pa fiesta di North Sea Jazz si tin.

Pakiko drecha e servisio di Insel Air, ora ku mester di sèn Gobiernu lo yuda tòg.

Pakiko drecha kasnan kantu di ruta, Karnaval lo pasa den kaya tòg

Pakiko drecha entregamentu di bòm di gas, Curoil tin ganashi tòg

Pakiko drecha servisio bankario, kliente lo para den rei i paga 5 florin pa kada chèk depositá tòg

Pakiko papia berdat den sala di parlamentu, korantnan lo publiká mentira tòg

Loke no ta tumando luga ta e dialogonan tokante tópikonan di importansia pa futuro di Kòrsou. E pais ku nos tur lo muri bai laga atras pa nos yunan i nan yunan. Tópikonan manera; konta bai hasi ora venesolanonan kuminsa bin buska refugio na Kòrsou, kua strategia ta bai ehekutá pa strukturalmente baha desempleo bou di hoben? Kon ta bai kubri e gastunan astronómiko di salubridat públiko den futuro? Kon ta garantisa ku kalidat di bida di e yu di Kòrsou lo krese den futuro? Kon lo adaptá nos sektor di turismo awor ku Cuba a habri porta?

Un pais ku no ta pensa riba su futuro ta destiná pa frakasá.

Maske mi DNA ta ponemi den grupo number unu. Pa 2017 mi a palabra ku mi mes pa bai keiru den grupo number 3 un ratu. Lo bai ta difisil, pero ratu ratu lo bo tin ku sali for di e comfort zone. Lo mi bai tene e boka será pa un ratu indefiní i pensa un otro manera pa kontribuí.

Den 2017 mi opinión lo keda pami!.

So long readers! So Long