Hend’i mondi nos ta?


“Unda Kòrsou ta bai?” “Kik’esaki ta para bira?!” Hopi a asta manda, no unu ni dos, pero diferente grandi despues di e bagabunderia ku a tuma lugá. Pa kiko?

Kòrsou ta un beibi. Nò, un mucha di kasi 7 aña. Nos tin hopi mas pa siña, hopi mas pa lucha i tambe hopi mas pa bringa. Si, pa BRINGA! Pero bringa HUNTU!! No pa bringa otro.

Kiko a pasa ku “union ta hasi forsa”? Kiko a pasa ku e rèspèt ku nos mester duna otro? Kiko a pasa ku madures i profeshonalismo? Kiko a pasa ku dominio propio?

Ayera señora Jacintha Constansia a laga demasiado di desea. DE MA SIA DO.

“Si pero Giselle McWilliam mes a buska. Masha ora e tabata tira palabra”.

Baho, simplemente baho. Tur dos hende. Baho.

Polítikonan den kua nos pueblo a depositá su konfiansa a mustra nan inkapasidat di solushoná un krísis polítiko, riba un isla chikitu manera esun di nos, di un manera profeshonal. Kangament’i saya den parlamento? Ta pa hende di kaya nos a vota?

Si madame McWilliam ker a tira puña na su antoho, mester a lag’é. Mata ku no haña awa ta seka di su mes. El a akusa señora Constansia inhustamente? Ministerio Públiko ta djis ey! Un kaminda hurídiko por a wòrdu kaná pa difamashon. Si ta esei tabata e problema.

Pero nò, e sistema di hend’i mondi tabata mas fasil, mas lihé pero al final mas karu tambe. Ku violensia bo ta pèrdè tur e rason i sosten ku bo por tabata tin inisialmente. Despues di un tal akto violento, simplemente señora a pèrde. Pèrdè rason i pèrdè rèspèt.

Awo mi ta bin pa boso, pueblo di Kòrsòu.

Ora tin tiroteo, atrako, ladronisia i bringamentu nos tur ta man na kabes. Nos tur ta puntra unda nos ta bai. Nos ke kore bisa ku e hubentut di awendia no ta sirbi pa nada. Pero konta ku e èhèmpel ku nos mester haña di esnan enkargá ku gobernashon di nos pais?

Señor Dos Santos a falta respet publikamente riba un vidio ku a bai rònt. Kon nos pueblo ta reakshona? Gran parti a gosa e kos masha, komparti e vidio i komenta “hahah masha bon!”.

Boso a lubida ku ora boso ta vota, boso ta hinkando futuro di Kòrsou den man di e persona en kuestion. Ta den man di hende inkapas, inmadurá ku no konosé e konsepto di aktua profeshonal nos ke laga Kòrsou? Awor ku e webu a chòk, tur hende tin mil opinion.

Boso no ta haña ku ta mas mihó pa duna boso voto na esnan ku ta mustra nan mes kapas, íntegro, madurá i inteligente sufisiente pa goberná un pais? No kualke pais! No lubida! Un pais ku ta den un tempu krusial di su desaroyo. Un pais ku awor mas ku nunka mester di union den nos pueblo i polítikonan.

Pueblo, hisa bo standarte. Paga nos ta paga, nos tin derechi di eksigi kalidat!

Ora tin bòmbòshi, tur hende ke pusha palu bòu di kandela. Pero tòg tur hende ta sorprendí awor.

Lagami kòrda boso ku no ta promé bia ku señora Constansia ta komportá su mes di un manera agresivo den públiko. Pero den parlamento a bai leu dimas.

Esaki tabata un falta di rèspèt grandi pa nos pueblo. Falta di rèspèt imenso.

Hoben desapuntá,

Nicole

Advertenties

One thought on “Hend’i mondi nos ta?”

  1. Kon ta bai Nicole, komo adulto di riba 60 aña ma sinti un bergwensa hopi grandi ora ma lesa loke ba skirbi. Ki ehempel berdat esaki ta pa nos hobennan?
    Ku ki kara nos por reklama ora hobennan hasi kos foi sla? Un kos mi por bisa: Mi ta spera ku loke a pasa awe den parlamento ta un wake up call pa tur e sobrá hendenan ku sea tabata den Parlamento of ku a mira loke a pasa na tv i ku for di awe nos por kuminsa na komporta nos mes manera debe ser, duna un bon ehempel na nos hobennan i laga redu i kangamentu di saya foi den nos Parlamento. Despensa na abo Nicole i tur otro hoben ku mester a mira algu mahos asina.

    Like

Geef een reactie

Vul je gegevens in of klik op een icoon om in te loggen.

WordPress.com logo

Je reageert onder je WordPress.com account. Log uit / Bijwerken )

Twitter-afbeelding

Je reageert onder je Twitter account. Log uit / Bijwerken )

Facebook foto

Je reageert onder je Facebook account. Log uit / Bijwerken )

Google+ photo

Je reageert onder je Google+ account. Log uit / Bijwerken )

Verbinden met %s