Kuater yuana.


Na Hato nan ta wardando nos.

Nos promé la di turista.

Diesdos na tur. Seis Hulandes ku nan maletanan yená ku ‘hageslag’ i pindakas – na Aldi nan ta mas barata ku na Van der Tweel-, dos Aleman, un hende di Belgïe ku tabata asina atento di bin ku chukulati bòns bòns, un Franses i dos Antiyano bòshi skeit, ku ta traha na Zuidas na Amsterdam.

Ta djis pa bo haña un mihó bista. No ta sigi ningun chiste entre un Hulandes k’e Belg, nin di e Alemen i e Hulandes. Djis p’e bista. Pa un tiki drama. Portá ta pantomina, kisas nò. Mi di mi ta gewon hasi’é. P’e bista. Pa bo haña un bista.

Nos ta wardando nan, pasó awe ta nos promé dia di ‘sight seeing tour’. Den un büs sin tualèt. Un maik, ku ta traha sigun su mes smak.

Lo bo a pensa ku nos lo kore pasa banda di Penha, dal un pará na Kurá Hulanda. Tira un bista lihé lihé riba nos brug Emma anto si nos logra wak show di dolfein na Sea Aquarium. Niun dje kosnei. E turistanan aki ta buskando e bida real. Sin kita sin pone. Mane e kos ta. Kiko ta pasa aki. Mas puru mas mihó.

Nos ta start e rekorido i ta kuminsa kore. Instrukshonnan ta sigi lihé, kombiná ku müsika di rèpdonan lokal den dje. Dimes nos ta bedei ku algun di rèpdonan aki ya kaba ta ‘Gone to soon’, ‘Rest in peace’, ‘Gone but never forgotten’.

“Na nos man robes nos ta mira nos tan famoso lugá di prostituta. Esaki ta úniko ku ta legal. Si bo mira bon, bo ta weta sinku rosa kòrá. Aki Samburo a ser matá. Un krimen pashonal. Riba e dia ei Samburo no kera pagá. Awèl e la paga si, ma ku su bida. Sesenta hinká e la haña di su amor di kampo; Ana Sofia. Nos ta tuma sinku minüt pa saka potrèt pa nos sigi. E rosanan kòrá por wòrdu uzá pa korono real di ‘snapchat’ ”.

Despues nos a sigi nos rekorido. Turistanan ta den nan zjilea i ta habri wowo skèrpi, pa nan no pèrdè nada nada. E kos aki ta den pelíkula so nan a yega di waknan. Asina tantu pobresa, muchanan ku ta kana pidi limosna. Bendedónan di droga ku ta bende nan kos abiertamente i ta pará na lus di tráfiko. 32 sekònde nan tin pa ora e lus kambia di kòrá bai bèrdè. Tesei so nan mester.

E dos turistanan Antiyano no ta komprondé. Nan a keda di plak na Hulanda despues di estudio, pero esaki si nan no a vèrwagt.

Next stop. E büs ta para kantu di kaminda. Banda di un porta grandi i ku ta mustra pisá. Tur dos banda tin muraya haltu. Djis den banda un kas di bewaker.

“Nos a haña pèrmit pa wak dies minüt paden. Aki nos ta pará dilanti di e prizonan luho. E prizonan aki ta di tur tempu, pero e kantidat a subi astronómikamente di 150 pa 1760. No ta kos pa tur hende esaki. Hende straño no por drenta. Siguridat ta garantisá i esei bo ta mir’é bèk den preis dje kasnan aki. E Hulandes ta sumamente entusiasmá. E kos aki ta parse ‘Het Gooi’ na Hulanda ayá, pero mas bunita. Ta ketu si, tin hende ta biba aki?”

Despues di dies minüt nos ta pará bèk pafó, ku flyer dje lugá, zjampaña i kos di pasa boka luhoso i asina chikí ku tur hende a keda ku mesun hamber. Un spòt leuk si. Algu otro. Apart. Tesei nos ke. Un tiki VIP. Sintibu importante.

Nos prèt no a dura pa largu. Un batimentu masha duru riba e büs. Limpiadonan di kas ku ta funshoná banda di esei tambe komo beibisit i kòki, ta pidi nos un kabe’i boto. E turistanan ta wakmi ku wowonan glas glas. “Aki si mi ta pone un paro. Mi no ta kai den nan trampa mas. Bo habri porta pa un estranhero drenta, tin 100 pará su tras. Kòrsou ta yen. Vol is vol.”

Nos tin un delaster stòp i a kuminsa bira sukú. Baha seru subi seru. Un rotònda. Ayanan un lus di tráfiko riba kòrá. Pasa riba brüg grandi. “Nò, nos no ta para pa saka niun potrèt. Muchu sukú, nada interesante. Si bo kumpra un postkaart di brüg Juliana i saká su potrèt, tambe bo tabata tei”.

Promé lus di tráfiko na bon man drechi. Nos ta serka di yega. E delaster anunsio ta sigi. “Nos ta yegando nos delaster parada, pero promé ku nos yega, mi ke duna algun instrukshon. Bou di bo stul bo ta haña  un vèst anti balas i tambe un flèshlait. E vèst ta ‘one size fits most’ kemen éksito. Bisti bo vèst, sende bo flèshlait i tene bo telefòn, kamara i verrekijker ei ei. Bosnan ta haña 15 minüt. Büs ta pará n’e otro banda di kaminda.

Büs ta kuminsa kore. Ta parse karnaval. Tur kaminda tin hende riba kaya, yoramente, gritamentu. Müzik di rèp ta zona duru. Polisnan ku ta pidi hende pa para na banda, ya nan por hasi nan trabou. Sinta  gel. Tur kaminda sinta gel pasá. Mucha. Mucha. Hendenan di ambulans, ku ta purba. Envano. No tin sentido mas. Un pastor ku ta sinti ku ta awe ta e dia pa papia k’e hendenan.

Ora e grupo yega serka nan ta mira bon. Tin kuater hende drumí, bentá abou. Tur kaminda tin sanger. Foi nan wowo, orea, nanishi. Tur kaminda. Sanger. Manera kuater yuana ku nan a habri pa saka mondongo. Asinei nan ta bentá. Kuater. Kuater yu di mama. Kuater tio di subrino. Kuater padrino di eha. Kuater tata di famia. Kuater hòmber di muhé.

Nan ta wak i wak. Loke ta riba bo kashi di wowo, bo no por veeg kita. E mainta despues bo por pasa ku un slang riba dje. Rib’e sanger. Esei por. E ora ei e no tei mas. E no a eksistí nunka. No a pasa. Bo ta pensa. Loke bo mira, nunka mas lo kita.

15 minüt a pasa. No a saka potrèt, no a uza verrekijker. Nada ku ‘snapchat’.

Esaki ta dimas. Asta pa turista esaki ta dimas.

 

 

 

Advertenties

Geef een reactie

Vul je gegevens in of klik op een icoon om in te loggen.

WordPress.com logo

Je reageert onder je WordPress.com account. Log uit / Bijwerken )

Twitter-afbeelding

Je reageert onder je Twitter account. Log uit / Bijwerken )

Facebook foto

Je reageert onder je Facebook account. Log uit / Bijwerken )

Google+ photo

Je reageert onder je Google+ account. Log uit / Bijwerken )

Verbinden met %s